Thalapathy Vijay: తమిళ స్టార్ హీరో తలపతి విజయ్ నటుడిగా వీడ్కోలు చెప్పిన చిత్రం ‘జన నాయగన్’. రాజకీయాల్లో పూర్తి స్థాయిలో అడుగుపెట్టే ముందు ఆయన చేసిన చివరి సినిమా కావడంతో ఈ చిత్రంపై దేశవ్యాప్తంగా భారీ అంచనాలు నెలకొన్నాయి. విడుదలైన తొలి షోల నుంచే సినిమాకు పాజిటివ్ టాక్ రావడం విశేషం. అయితే సినిమాకంటే ఎక్కువగా చర్చ జరుగుతున్న అంశం విజయ్ తీసుకున్న పారితోషికం. పలు మీడియా నివేదికల ప్రకారం, ఈ చిత్రానికి విజయ్ రూ.220 కోట్ల నుంచి రూ.275 కోట్ల మధ్య రెమ్యునరేషన్ అందుకున్నట్లు ప్రచారం జరుగుతోంది. దీనిపై చిత్ర నిర్మాణ సంస్థ అధికారికంగా స్పందించనప్పటికీ, నిజమైతే భారతీయ సినీ చరిత్రలో అత్యధిక పారితోషికాల్లో ఇది ఒకటిగా నిలుస్తుంది.
ఒక్క విజయ్ మాత్రమే కాదు.. దర్శకుడు, సంగీత దర్శకుడికి కూడా భారీ చెల్లింపులు
‘జన నాయగన్’కు దర్శకత్వం వహించిన హెచ్. వినోద్కు సుమారు రూ.25 కోట్ల పారితోషికం అందినట్లు సినీ వర్గాల్లో టాక్ వినిపిస్తోంది. ఇది ఆయన కెరీర్లోనే అత్యధిక రెమ్యునరేషన్గా చెబుతున్నారు. ఇక సంగీత దర్శకుడు అనిరుధ్ రవిచందర్కు రూ.13 కోట్ల వరకు చెల్లించినట్లు సమాచారం. ఇప్పటికే ‘లియో’, ‘జైలర్’, ‘జవాన్’ వంటి బ్లాక్బస్టర్ చిత్రాలకు సంగీతం అందించిన అనిరుధ్, ప్రస్తుతం భారతీయ సినీ పరిశ్రమలో అత్యంత డిమాండ్ ఉన్న సంగీత దర్శకుల్లో ఒకరిగా కొనసాగుతున్నారు.
స్టార్ క్యాస్ట్కు కోట్లలో పారితోషికాలు
ఈ సినిమాలో కథానాయికగా నటించిన పూజా హెగ్డేకు సుమారు రూ.6 కోట్లు అందినట్లు ప్రచారం జరుగుతోంది. కీలక పాత్రలో కనిపించిన బాలీవుడ్ నటుడు బాబీ డియోల్ రూ.5 కోట్ల నుంచి రూ.10 కోట్ల మధ్య పారితోషికం తీసుకున్నట్లు సమాచారం. అలాగే ప్రకాష్ రాజ్కు రూ.5 కోట్లు, ప్రియమణికి రూ.3 కోట్లు, గౌతమ్ వాసుదేవ్ మీనన్కు రూ.3 కోట్లు, నరైన్కు రూ.2.5 కోట్లు చెల్లించినట్లు సినీ వర్గాలు చెబుతున్నాయి. యువ నటి మమితా బైజుకు రూ.60 లక్షల నుంచి రూ.2 కోట్ల మధ్య పారితోషికం అందినట్లు వార్తలు వినిపిస్తున్నాయి. అయితే ఈ వివరాలన్నీ మీడియా కథనాల ఆధారంగానే వెలువడినవే. చిత్రబృందం నుంచి అధికారిక ధృవీకరణ లేదు.
టైటిల్ కార్డ్తోనే థియేటర్లలో సంబరాలు
విజయ్ సినిమాల్లో టైటిల్ కార్డ్కు ప్రత్యేకమైన క్రేజ్ ఉంటుంది. ‘జన నాయగన్’లో కూడా అదే మ్యాజిక్ కనిపించిందని అభిమానులు చెబుతున్నారు. ముఖ్యంగా ఆయన రాజకీయ ప్రస్థానాన్ని గుర్తు చేసే అసెంబ్లీ సిగ్నేచర్ స్టైల్ను టైటిల్ కార్డ్లో చూపించడం అభిమానులను విశేషంగా ఆకట్టుకుంది. థియేటర్లలో విజయ్ ఎంట్రీకి విజిల్స్, చప్పట్లతో ప్రేక్షకులు హోరెత్తిస్తున్నారు. సోషల్ మీడియాలో కూడా ఈ సన్నివేశాలు వైరల్ అవుతున్నాయి.
నటుడిగా ముగింపు.. రాజకీయాల్లో కొత్త అధ్యాయం
దాదాపు మూడు దశాబ్దాల పాటు తమిళ సినీ పరిశ్రమలో స్టార్ హీరోగా కొనసాగిన విజయ్, ఇప్పుడు పూర్తిస్థాయి రాజకీయ నాయకుడిగా కొత్త ప్రయాణానికి సిద్ధమయ్యారు. ఆ నేపథ్యంలో ‘జన నాయగన్’ కేవలం ఒక సినిమా మాత్రమే కాదు.. ఆయన సినీ కెరీర్కు వీడ్కోలు పలికే ప్రతీకాత్మక చిత్రంగా అభిమానులు భావిస్తున్నారు. ఒకవైపు భారీ రెమ్యునరేషన్, మరోవైపు పాజిటివ్ టాక్, మరోవైపు రాజకీయాల్లో కొత్త ఇన్నింగ్స్.. ఈ మూడు అంశాలతో ‘జన నాయగన్’ ప్రస్తుతం దేశవ్యాప్తంగా హాట్ టాపిక్గా మారింది. ఇక బాక్సాఫీస్ వద్ద ఈ సినిమా ఎలాంటి రికార్డులు సృష్టిస్తుందో చూడాలి.
Read also: CM Vijay Cake: త్రిష ఒక్క ఫొటోతో మారిపోయిన బేకరీ రేంజ్.. రెండు వారాల్లో 400 కేకుల విక్రయం!
Vijay Movies: విజయ్కు భార్యగా.. ప్రియురాలిగా.. తల్లిగా నటించిన హీరోయిన్ ఎవరో తెలుసా? ఈ రికార్డు ఆమెకే సొంతం!