Raptadu School Attack: అమ్మానాన్నల ఆశలను నిజం చేయాలని.. బాగా చదువుకుని జీవితంలో ఉన్నత స్థాయికి చేరుకోవాలని ఎన్నో కలలతో బడికి వెళ్లిన ఓ చిన్నారిపై ఊహించని దారుణం జరిగింది. ఇంట్లో నుంచి పుస్తకాల సంచి భుజాన వేసుకుని సంతోషంగా పాఠశాలకు వెళ్లిన ఆ బాలిక.. కొద్దిసేపటికే తీవ్రగాయాలతో ఆసుపత్రి పాలైంది. పిల్లల భవిష్యత్తుకు పునాది వేయాల్సిన తరగతి గది ఒక్కసారిగా భయానక ఘటనకు వేదికైంది. ఉపాధ్యాయుల సమక్షంలోనే ఓ దుండగుడు పదో తరగతి విద్యార్థినిపై అత్యంత కిరాతకంగా దాడి చేశాడు. రంపంతో బాలిక ముఖం, మెడ భాగాలపై విచక్షణారహితంగా దాడికి పాల్పడ్డాడు. అడ్డుకునేందుకు ప్రయత్నించిన మరో విద్యార్థిని కూడా గాయపడింది. అనంతపురం జిల్లా రాప్తాడులో శనివారం (అక్టోబర్ 31) ఉదయం జరిగిన ఈ హృదయవిదారక ఘటన తీవ్ర కలకలం రేపింది.
క్లాస్ జరుగుతుండగానే రంపంతో దాడి
రాప్తాడులోని ప్రభుత్వ ఉన్నత పాఠశాలలో ఉదయం 10 నుంచి 10.30 గంటల మధ్య ఈ దారుణం చోటుచేసుకుంది. పదో తరగతి విద్యార్థులు క్లాస్‌రూమ్‌లో పాఠాలు వింటున్న సమయంలో సుమారు 25 నుంచి 30 ఏళ్ల వయసున్న ఓ వ్యక్తి లోపలికి ప్రవేశించాడు. తన వెంట తెచ్చుకున్న కలప కోసే రంపంతో విద్యార్థినిపై అకస్మాత్తుగా దాడి చేశాడు. ఈ దాడిలో బాలిక ముఖంపై తీవ్రగాయాలయ్యాయి. కుడిచేతికి కూడా అత్యంత తీవ్రమైన గాయాలైనట్లు వివరాలు వెల్లడయ్యాయి. దాడిని అడ్డుకునేందుకు ప్రయత్నించిన మరో బాలిక కూడా గాయపడింది. అనూహ్య ఘటనతో భయాందోళనకు గురైన విద్యార్థులు తరగతి గది నుంచి బయటకు పరుగులు తీశారు. తీవ్రంగా గాయపడిన బాలికలను వెంటనే అనంతపురం ప్రభుత్వ ఆసుపత్రికి తరలించారు. ఒక విద్యార్థిని మృతి చెందినట్లు కూడా వివరాలు వెలువడగా, బాధితుల పరిస్థితిపై స్పష్టత రావాల్సి ఉంది.
టీచర్ ఉన్నా ఆగని దారుణం.. స్కూల్లోకి ఎలా వచ్చాడు?
దాడి జరిగిన సమయంలో తరగతి గదిలో ఉపాధ్యాయుడు ఉన్నట్లు పాఠశాల ప్రధానోపాధ్యాయుడు వెల్లడించారు. పాఠశాలలో నిర్మాణ పనులు కొనసాగుతుండటంతో పలువురు కార్మికులు వచ్చి వెళ్తున్నారని తెలిపారు. దాడికి పాల్పడిన వ్యక్తిని కూడా నిర్మాణ పనుల కోసం వచ్చిన కార్మికుడిగా భావించామని, అతడు ఎవరో గుర్తించలేకపోయామని వివరించారు. ఘటన జరిగిన వెంటనే పోలీసులకు సమాచారం అందించినట్లు చెప్పారు. అయితే ప్రమాదకరమైన రంపంతో బయటి వ్యక్తి పాఠశాలలోకి ఎలా ప్రవేశించాడన్న ప్రశ్న ఇప్పుడు అందరినీ కలచివేస్తోంది. నిర్మాణ పనులు జరుగుతున్నాయనే కారణంతో ఎవరినైనా పాఠశాల ప్రాంగణంలోకి అనుమతిస్తారా? విద్యార్థుల భద్రతను పర్యవేక్షించాల్సిన వ్యవస్థ ఏమైందన్న ప్రశ్నలు తలెత్తుతున్నాయి.
మా పాపను ఇలా చేస్తారా?.. బంధువుల కన్నీళ్లు
తీవ్రగాయాలతో ఆసుపత్రిలో చికిత్స పొందుతున్న బాలికను చూసి కుటుంబ సభ్యులు కన్నీరుమున్నీరవుతున్నారు. తమ బిడ్డను ఎవరైనా వేధిస్తున్నట్లు ఇంట్లో ఎప్పుడూ చెప్పలేదని బాలిక మేనత్త ఆవేదన వ్యక్తం చేశారు. ప్రతిరోజూ ఆటోలో పాఠశాలకు వెళ్లే తమ చిన్నారికి ఇలాంటి పరిస్థితి ఎదురవుతుందని ఊహించలేదని విలపించారు. ప్రభుత్వ పాఠశాలలో కూడా ఆడపిల్లలకు రక్షణ లేదా అని ప్రశ్నించారు. నిందితుడు ఎవరైనా, చివరకు తమ బంధువైనా కఠినంగా శిక్షించాలని డిమాండ్ చేశారు. నిందితుడికి ఉరిశిక్ష విధించాలని ఆగ్రహం వ్యక్తం చేశారు. మరోవైపు దాడికి పాల్పడిన వ్యక్తి బాలికకు బంధువనే వివరాలు వెలువడుతున్నాయి. దాడికి గల కారణాలు, నిందితుడి పూర్తి వివరాలు పోలీసుల దర్యాప్తులో తేలాల్సి ఉంది.
ఘటనపై మంత్రి లోకేశ్ తీవ్ర దిగ్భ్రాంతి
రాప్తాడు విద్యార్థినిపై జరిగిన దాడిని రాష్ట్ర విద్యాశాఖ మంత్రి నారా లోకేశ్ తీవ్రంగా ఖండించారు. తీవ్రగాయాలతో ఉన్న చిన్నారిని చూసిన తర్వాత కన్నీళ్లు ఆగడం లేదని, గుండె బరువెక్కిందని ఆవేదన వ్యక్తం చేశారు. ఇలాంటి దారుణాలకు పాల్పడే ఉన్మాదులను ఉక్కుపాదంతో అణిచివేస్తామని హెచ్చరించారు. ఆడపిల్లలు, మహిళల వైపు కన్నెత్తి చూడాలంటే భయపడేలా చర్యలు తీసుకుంటామని స్పష్టం చేశారు. మరోవైపు రాప్తాడు ఘటన రాష్ట్రంలోని పాఠశాలల భద్రతపై తీవ్ర ప్రశ్నలను లేవనెత్తింది. పిల్లలను చదువుకోమని బడికి పంపే తల్లిదండ్రులకు వారి క్షేమంపై భరోసా కల్పించాల్సిన అవసరాన్ని ఈ ఘటన గుర్తుచేస్తోంది. ఒక చిన్నారి ప్రాణాలతో పోరాడాల్సిన పరిస్థితి ఏర్పడటం ప్రతి ఒక్కరినీ కలచివేస్తోంది. బాధిత విద్యార్థినులకు మెరుగైన వైద్యం అందించడంతోపాటు, ఈ దారుణానికి బాధ్యులైన వారిపై కఠిన చర్యలు తీసుకోవాలని కుటుంబ సభ్యులు కోరుతున్నారు.
ధర్మవరం రైల్వేస్టేషన్‌లో నిందితుడు హేమంత్ అరెస్టు
రాప్తాడు ప్రభుత్వ పాఠశాలలో పదో తరగతి విద్యార్థినిపై రంపంతో అమానుషంగా దాడి చేసిన నిందితుడు హేమంత్‌ను పోలీసులు అదుపులోకి తీసుకున్నారు. ధర్మవరం రైల్వేస్టేషన్‌లో అతడిని అరెస్టు చేశారు. నిందితుడిని ధర్మవరం మండలం నాగలూరుకు చెందిన హేమంత్‌గా గుర్తించారు. తల్లిదండ్రులు చనిపోవడంతో పదేళ్ల క్రితం అయ్యవారిపల్లెకు వచ్చిన హేమంత్.. అప్పటి నుంచి అక్కడ తన అక్క వద్ద ఉంటున్నట్లు వివరాలు వెల్లడయ్యాయి. బాలికపై దాడికి గల కారణాలపై పోలీసులు దర్యాప్తు చేస్తున్నారు.
ప్రధానోపాధ్యాయురాలు, క్లాస్ టీచర్‌పై సస్పెన్షన్ వేటు
రాప్తాడు ఘటనను రాష్ట్ర విద్యాశాఖ మంత్రి నారా లోకేశ్ తీవ్రంగా పరిగణించారు. పాఠశాలలోకి ప్రమాదకరమైన ఆయుధంతో బయటి వ్యక్తి ప్రవేశించి విద్యార్థినిపై దాడి చేయడంపై ఆగ్రహం వ్యక్తం చేశారు. ఈ ఘటనలో పాఠశాల ప్రధానోపాధ్యాయురాలితోపాటు సంబంధిత క్లాస్ టీచర్‌ను సస్పెండ్ చేయాలని ఆదేశించారు. ఘటనపై సమగ్ర విచారణ జరిపి నివేదిక సమర్పించాలని జిల్లా విద్యాశాఖ అధికారిని ఆదేశించారు. పాఠశాలల్లో విద్యార్థుల భద్రత విషయంలో నిర్లక్ష్యాన్ని సహించేది లేదని స్పష్టం చేశారు.
బాధిత కుటుంబానికి సీఎం చంద్రబాబు పరామర్శ
రాప్తాడు ఘటనపై ముఖ్యమంత్రి చంద్రబాబు తీవ్ర దిగ్భ్రాంతి వ్యక్తం చేశారు. విద్యార్థినిపై జరిగిన అమానుష దాడిని తీవ్రంగా ఖండించిన ఆయన.. నిందితుడిపై కఠిన చర్యలు తీసుకోవాలని హోంశాఖను ఆదేశించారు. బాలిక ఆరోగ్య పరిస్థితి, ఆసుపత్రిలో అందుతున్న చికిత్స వివరాలను తెలుసుకున్నారు. మాజీ మంత్రి పరిటాల సునీత ద్వారా బాధిత కుటుంబ సభ్యులతో రెండుసార్లు ఫోన్‌లో మాట్లాడి పరామర్శించారు. దాడికి పాల్పడిన వ్యక్తిని ఎట్టి పరిస్థితుల్లోనూ వదిలిపెట్టబోమని కుటుంబ సభ్యులకు భరోసా ఇచ్చారు. బాలికకు మెరుగైన వైద్యం అందించాలని అధికారులను ఆదేశించారు.
ఎస్పీతో మాట్లాడిన హోంమంత్రి అనిత
రాప్తాడు విద్యార్థినిపై దాడి ఘటనపై రాష్ట్ర హోంమంత్రి వంగలపూడి అనిత స్పందించారు. అనంతపురం జిల్లా ఎస్పీతో ఫోన్‌లో మాట్లాడి ఘటనకు సంబంధించిన పూర్తి వివరాలు తెలుసుకున్నారు. బాధిత విద్యార్థిని ఆరోగ్య పరిస్థితి, అందుతున్న వైద్యసేవలపై అధికారులను ఆరా తీశారు. బాలికకు అత్యుత్తమ వైద్య చికిత్స అందించాలని ఆదేశించారు. నిందితుడిపై చట్టపరంగా కఠిన చర్యలు తీసుకోవాలని పోలీసు అధికారులకు స్పష్టం చేశారు. పాఠశాలల్లో బాలికల భద్రతకు ప్రాధాన్యం ఇవ్వాల్సిన అవసరాన్ని ఈ ఘటన మరోసారి గుర్తుచేసింది.
Read also: Prakasam Crime News: ప్రకాశం జిల్లాలో దారుణం.. ఐదేళ్ల చిన్నారిపై లైంగిక దాడి.. చికిత్స పొందుతూ మృతి!
Chennai Crime News: పెళ్లయి 8 నెలలే.. చెన్నైలో నవవివాహిత అనుమానాస్పద మృతి.. ఆర్డీవో విచారణ!
