నెగెటివ్ ప్రచారంపై సందీప్ ఆగ్రహం
‘సిగ్మా’ను లక్ష్యంగా చేసుకుని ఎక్స్‌ వేదికగా కొంతమంది వరుస పోస్టులు చేస్తున్నారని సందీప్ కిషన్ స్పందించారు. తనను, తన కొత్త సినిమాను టార్గెట్ చేస్తూ జరుగుతున్న ప్రచారం వెనుక డబ్బులు ఉన్నాయని, ఈ వ్యవహారం ఎక్కడి నుంచి నడుస్తుందో తనకు తెలుసంటూ ఆయన ఘాటుగా వ్యాఖ్యానించారు. ఇదే కొనసాగితే సంబంధిత వ్యక్తులు నష్టపోవాల్సి వస్తుందని హెచ్చరించారు. డైరెక్టర్‌కు సంబంధించిన వివరాలు బయటకు వస్తే ఈ వ్యవహారంలో ఉన్నవారంతా బయటపడతారనే స్థాయిలో సందీప్ చేసిన వ్యాఖ్యలు ఇప్పుడు వైరల్‌గా మారాయి. సందీప్ కిషన్ చేసిన ఈ పోస్టుపై సోషల్ మీడియాలో అభిమానులు, సినీ ప్రేక్షకులు స్పందిస్తున్నారు.
జేసన్ సంజయ్ తొలి సినిమా
‘సిగ్మా’తో జేసన్ సంజయ్ దర్శకుడిగా వెండితెరకు పరిచయమవుతున్నారు. విజయ్ కుమారుడు కావడంతో సినిమా ప్రకటన దశ నుంచే ఈ ప్రాజెక్ట్‌పై ప్రత్యేక ఆసక్తి ఏర్పడింది. అయితే దర్శకుడిగా తనకంటూ ప్రత్యేక గుర్తింపు తెచ్చుకోవాలనే ఉద్దేశంతో కథను ఎంచుకున్నానని జేసన్ సంజయ్ ప్రమోషన్లలో చెబుతూ వస్తున్నారు. సందీప్ కిషన్ కూడా జేసన్ చెప్పిన కథ, ఆయన నెరేషన్ నచ్చడంతోనే ఈ ప్రాజెక్ట్‌లోకి వచ్చినట్లు వెల్లడించారు.
యాక్షన్‌తో హీస్ట్ కామెడీ
‘సిగ్మా’ను యాక్షన్, అడ్వెంచర్, హీస్ట్ కామెడీ నేపథ్యంలో రూపొందించారు. సందీప్ కిషన్, ఫరియా అబ్దుల్లా ప్రధాన పాత్రల్లో నటించగా.. రాజు సుందరం, సంపత్ రాజ్, శివ పండిట్, అన్బు థాసన్, యోగ్ జపే తదితరులు కీలక పాత్రలు పోషిస్తున్నారు. ఎస్. థమన్ సంగీతం అందించిన ఈ సినిమాకు కృష్ణన్ వసంత్ సినిమాటోగ్రఫీ, ప్రవీణ్ కేఎల్ ఎడిటింగ్ బాధ్యతలు నిర్వహించారు. సందీప్ కిషన్ ఇప్పటికే ‘సిగ్మా’ను ఎపిసోడిక్ యాక్షన్ కామెడీగా అభివర్ణించారు. అన్ని రకాల ప్రేక్షకులను అలరించే అంశాలు సినిమాలో ఉన్నాయని ఆయన తెలిపారు. దీంతో సినిమా కథ, యాక్షన్ ఎపిసోడ్స్‌తో పాటు జేసన్ సంజయ్ మేకింగ్ ఎలా ఉంటుందనే దానిపై ఆసక్తి పెరిగింది.
చిరంజీవి ప్రశంసలతో హైప్
హైదరాబాద్‌లో జరిగిన ‘సిగ్మా’ ప్రీ రిలీజ్ ఈవెంట్‌కు మెగాస్టార్ చిరంజీవి ముఖ్య అతిథిగా హాజరయ్యారు. యువ ప్రతిభను ప్రోత్సహించడం తన బాధ్యతగా భావిస్తానని చెప్పిన చిరంజీవి.. జేసన్ సంజయ్‌ను అభినందించారు. జేసన్‌ను చూసినప్పుడు విజయ్ తన కెరీర్ ప్రారంభ దశలో ఉన్న రోజులు గుర్తుకు వచ్చాయని కూడా చిరంజీవి పేర్కొన్నారు.
అక్టోబర్ 2న గ్రాండ్ రిలీజ్
లైకా ప్రొడక్షన్స్ బ్యానర్‌పై సుభాస్కరన్ నిర్మించిన ‘సిగ్మా’ను తెలుగు రాష్ట్రాల్లో మైత్రీ మూవీ డిస్ట్రిబ్యూటర్స్ విడుదల చేస్తోంది. తమిళంతో పాటు తెలుగులోనూ ఒకేసారి సినిమా థియేటర్లలోకి వస్తోంది. సీబీఎఫ్‌సీ నుంచి U/A సర్టిఫికెట్ కూడా లభించింది. ఇదిలా ఉంటే, సినిమా విడుదలకు ముందు సందీప్ కిషన్ చేసిన ఘాటు వ్యాఖ్యలు ‘సిగ్మా’ చుట్టూ చర్చను మరింత పెంచాయి. జేసన్ సంజయ్ తొలి దర్శకత్వ ప్రయత్నం, సందీప్ కిషన్–ఫరియా అబ్దుల్లా కాంబినేషన్, హీస్ట్ యాక్షన్ కథాంశం, థమన్ సంగీతం.. ఇలా పలు అంశాలతో అక్టోబర్ 2 విడుదలపై ప్రేక్షకుల్లో ఆసక్తి కొనసాగుతోంది.
Read also: Sandeep Reddy Vanga: అర్జున్ రెడ్డి, యానిమల్‌కు పూర్తి భిన్నంగా.. సందీప్ రెడ్డి వంగా సమర్పణలో రోమాంచకం ఎలా ఉందంటే?
Sandeep Reddy Vanga: ‘దురంధర్’పై సందీప్ రెడ్డి వంగా ట్వీట్ వైరల్.. విమర్శకులపై ఘాటు వ్యాఖ్యలు
