Nepal Prime Minister Balen Shah: నేపాల్ రాజకీయాల్లో కొత్త అధ్యాయం ప్రారంభమైంది. ర్యాపర్‌గా కెరీర్ ప్రారంభించి రాజకీయ నాయకుడిగా ఎదిగిన బాలేంద్ర షా (బాలెన్) నేపాల్ దేశానికి కొత్త ప్రధానమంత్రిగా ప్రమాణ స్వీకారం చేశారు. శుక్రవారం (మార్చి 27) కాఠ్మండులోని శీతల్ నివాస్‌లో రాష్ట్రపతి కార్యాలయంలో ఆయన ప్రమాణ స్వీకారం నిర్వహించారు. మధ్యాహ్నం 12:34 గంటలకు రాష్ట్రపతి రామ్ చంద్ర పౌడెల్ ఆయనకు ప్రమాణం చేయించారు.
అతి పిన్న వయస్కుడైన ప్రధాని
35 ఏళ్ల వయసులోనే ప్రధానమంత్రి బాధ్యతలు చేపట్టిన బాలెన్, నేపాల్ చరిత్రలో ఈ పదవిని చేపట్టిన అత్యంత పిన్న వయస్కుడుగా నిలిచారు. అలాగే మధేష్ ప్రాంతం నుంచి ప్రధానమంత్రి అయిన తొలి వ్యక్తి కూడా ఆయనే. ఆయన ఇంజనీర్‌గా కూడా పనిచేశారు.
ప్రత్యేకంగా జరిగిన ప్రమాణ స్వీకారం
బాలెన్ ప్రమాణ స్వీకార కార్యక్రమం హిందూ, బౌద్ధ సంప్రదాయాల సమ్మేళనంగా జరిగింది. కార్యక్రమంలో
ఏడుగురు బ్రాహ్మణులు శంఖనాదం చేశారు
108 మంది బటుక్‌లు వేద మంత్రాలు పఠించారు
107 మంది లామాలు బౌద్ధ మంగళ పఠనం చేశారు
ఈ విధంగా సంప్రదాయ పద్ధతుల్లో కార్యక్రమం నిర్వహించడం ప్రత్యేక ఆకర్షణగా నిలిచింది.
జెన్-జెడ్ ఉద్యమాల తర్వాత మార్పు
గత ఏడాది నేపాల్‌లో జరిగిన జెన్-జెడ్ నిరసనలు దేశ రాజకీయాల్లో పెద్ద మార్పుకు దారితీశాయి. అవినీతి వ్యతిరేక ఉద్యమాల నేపథ్యంలో కేపీ శర్మ ఓలీ ప్రభుత్వం కూలిపోయింది. అనంతరం జరిగిన ఎన్నికల్లో బాలెన్ నేతృత్వంలోని రాష్ట్రీయ స్వతంత్ర పార్టీ (RSP) భారీ విజయాన్ని సాధించింది.
భారీ మెజారిటీ
నేపాల్ ప్రతినిధుల సభలో మొత్తం 275 స్థానాలు ఉండగా, బాలెన్ పార్టీ 182 స్థానాలు గెలుచుకుని స్పష్టమైన మెజారిటీ సాధించింది. దీంతో రాజ్యాంగంలోని ఆర్టికల్ 76(1) ప్రకారం ప్రభుత్వం ఏర్పాటు చేసే అవకాశం లభించింది.
చిన్న మంత్రివర్గం
బాలెన్ షా 15–18 మంది సభ్యులతో చిన్న మంత్రివర్గాన్ని ఏర్పాటు చేసే అవకాశం ఉందని రాజకీయ వర్గాలు చెబుతున్నాయి. యువ నాయకత్వం, అవినీతి రహిత పాలన లక్ష్యంగా ఆయన ప్రభుత్వం పనిచేస్తుందని పార్టీ వర్గాలు పేర్కొంటున్నాయి.
ఇవీ చదవండి: Nepal : సోషల్ మీడియా పవర్.. నేపాల్ ప్రధాని కేపీ ఓలీ రాజీనామా
Nepal : నేపాల్‌లో అల్లర్లు.. సోషల్ మీడియాపై నిషేధం – ఖాట్మండులో కర్ఫ్యూ
ENG vs ITA: ఈడెన్ గార్డెన్స్‌లో ఇటలీ సంచలనం.. ఇంగ్లాండ్‌ను వణికించిన బెన్ మానేంటి వీరబాదుడు
