Fake Currency: యూట్యూబ్ వీడియోలు చూసి నకిలీ కరెన్సీ తయారీ నేర్చుకున్నాడు. హైదరాబాద్ శివారులో ఓ ఇంటిని అద్దెకు తీసుకుని ఏకంగా ప్రింటింగ్ యూనిట్ ఏర్పాటు చేశాడు. రూ.500 నోట్లను భారీగా ముద్రించి మార్కెట్‌లోకి తీసుకురావడానికి ప్రయత్నించాడు. అంతటితో ఆగకుండా పోలీసుల అవతారమెత్తి అసలు డబ్బులు దోచుకునేందుకు మరో ముఠాను సిద్ధం చేశాడు. చివరకు ఓ కారు తనిఖీతో ఈ భారీ నకిలీ కరెన్సీ దందా గుట్టు రట్టయింది. తెలంగాణ పోలీసులు నలుగురిని అరెస్టు చేసి, సుమారు రూ.6.78 కోట్ల విలువైన నకిలీ నోట్లను స్వాధీనం చేసుకున్నారు.
కారులో రూ.8 లక్షలు.. తీగ లాగితే రూ.6.78 కోట్ల దందా!
నవంబర్ 1న రామోజీ ఫిల్మ్ సిటీ సమీపంలోని జాతీయ రహదారి-65పై అబ్దుల్లాపూర్‌మెట్ పోలీసులు, షాద్‌నగర్ స్పెషల్ ఆపరేషన్స్ టీమ్ సంయుక్తంగా వాహన తనిఖీలు చేపట్టారు. అనుమానాస్పదంగా కనిపించిన కారును ఆపి పరిశీలించగా రూ.8 లక్షల విలువైన నకిలీ రూ.500 నోట్లు బయటపడ్డాయి. కారులో ఉన్న నలుగురిని అదుపులోకి తీసుకుని విచారించగా హైదరాబాద్ శివారులోని కుంట్లూరులో నకిలీ కరెన్సీ తయారీ కేంద్రం నిర్వహిస్తున్న విషయం వెలుగులోకి వచ్చింది.
అద్దె ఇంట్లోనే నకిలీ నోట్ల ఫ్యాక్టరీ!
పోలీసులు కుంట్లూరులోని అద్దె ఇంటిపై దాడి చేసి మరో 134 కట్టల నకిలీ నోట్లను స్వాధీనం చేసుకున్నారు. వీటి విలువ సుమారు రూ.6.70 కోట్లు ఉంటుందని అంచనా వేశారు. కారులో లభించిన నోట్లతో కలిపి మొత్తం రూ.6.78 కోట్ల నకిలీ కరెన్సీ పట్టుబడింది. అక్కడ కలర్ ప్రింటర్లు, స్కానర్లు, ల్యాప్‌టాప్, లామినేషన్ యంత్రం, నోట్లను కత్తిరించే పరికరాలను గుర్తించారు. సాధారణ నివాస గృహంలోనే ఇంత పెద్ద మొత్తంలో నకిలీ కరెన్సీ తయారీకి ఏర్పాట్లు చేయడం పోలీసులను ఆశ్చర్యానికి గురిచేసింది.
యూట్యూబ్ వీడియోలతో నేర్చుకున్న ప్రధాన నిందితుడు!
ఫ్యూచర్ సిటీ పోలీస్ కమిషనర్ డాక్టర్ తరుణ్ జోషి వెల్లడించిన వివరాల ప్రకారం, ప్రధాన నిందితుడు మడుపోజు కర్ణాకర్ యూట్యూబ్ వీడియోలు, సోషల్ మీడియా ద్వారా నకిలీ కరెన్సీ తయారీ గురించి తెలుసుకున్నాడు. అసలు రూ.500 నోట్ల నమూనాలను డిజిటల్ పద్ధతిలో మార్చి నకిలీ నోట్లు ముద్రించినట్లు విచారణలో తేలింది. రూ.లక్ష అసలు నగదుకు బదులుగా రూ.3 లక్షల నుంచి రూ.4 లక్షల నకిలీ నోట్లు ఇస్తామని ఆశ చూపి కొనుగోలుదారులను ఆకర్షించేందుకు ప్రయత్నించారు. అయితే ఆశించిన స్థాయిలో కొనుగోలుదారులు ముందుకు రాకపోవడంతో ముఠా మరో మోసానికి తెరతీసింది.
నకిలీ పోలీసుల అవతారంలో అసలు డబ్బుల దోపిడీ!
నకిలీ కరెన్సీ విక్రయించడమే కాకుండా పోలీసుల పేరుతో డబ్బులు దోచుకోవడానికి ముఠా పథకం రచించింది. ముందుగా అసలు నోట్లను చూపించి కొనుగోలుదారుల్లో నమ్మకం కలిగించేవారు. ఆ తర్వాత నకిలీ పోలీసు గుర్తింపు కార్డులు, వాకీటాకీలు, డమ్మీ తుపాకులతో పోలీసులుగా నటిస్తూ రంగప్రవేశం చేసేవారు. నకిలీ నంబర్ ప్లేట్లు అమర్చిన వాహనాల్లో వచ్చి కేసులు పెడతామంటూ బెదిరించి అసలు నగదును తీసుకుని పరారయ్యేవారని పోలీసులు తెలిపారు. ఈ తరహాలో ఇద్దరి నుంచి రూ.2 లక్షలు, రూ.3 లక్షలు చొప్పున దోచుకున్నట్లు గుర్తించారు.
నలుగురు అరెస్టు.. మరో ముగ్గురి కోసం గాలింపు!
ఈ కేసులో మడుపోజు కర్ణాకర్, చిన్నోళ్ల మాణిక్య రెడ్డి, చెరుకుపల్లి రత్నాకర్ రెడ్డి, కరణం అజయ్ కుమార్‌లను పోలీసులు అరెస్టు చేశారు. మరో ముగ్గురు నిందితులు జెల్లి వెంకటేశ్, కుంజ బాలరాజు, కంపసాటి శ్రీనివాస్ పరారీలో ఉన్నట్లు సమాచారం. నిందితుల నుంచి నకిలీ పోలీసు గుర్తింపు కార్డులు, డమ్మీ తుపాకీ, వాకీటాకీలు, నాలుగు మొబైల్ ఫోన్లు, కారు కూడా స్వాధీనం చేసుకున్నారు. అబ్దుల్లాపూర్‌మెట్ పోలీస్ స్టేషన్‌లో సంబంధిత చట్టాల కింద కేసు నమోదు చేశారు. నకిలీ కరెన్సీని ఇప్పటికే ఎక్కడైనా చలామణి చేశారా? ఈ ముఠాతో మరెవరికైనా సంబంధాలు ఉన్నాయా? అనే కోణాల్లో దర్యాప్తు కొనసాగుతోంది.
ఇవీ చదవండి: Currency Notes: కరెన్సీ నోట్లలో జంతువుల కొవ్వా? పాలిమర్ నోట్ల వెనుక ఆసక్తికర నిజం.. భారత్‌లో ఏం జరుగుతోంది?
Polymer Banknotes: భారత్‌లో ప్లాస్టిక్ కరెన్సీ రానుందా? ప్రయోజనాలు, నష్టాలు, ప్రపంచ దేశాల అనుభవం.. పూర్తి వివరాలు
Obsession OTT: రూ.7 కోట్ల బడ్జెట్‌తో రూ.4,000 కోట్ల వసూళ్లు?.. ఓటీటీలో హారర్ థ్రిల్లర్ సందడి!
