Gajwel Tahsildar Suspended: భూసమస్య పరిష్కారం కోసం ప్రభుత్వ కార్యాలయానికి వెళ్లిన రైతుకు ఊహించని అవమానం ఎదురైంది. తన కష్టాన్ని చెప్పుకొనేందుకు వచ్చిన అన్నదాతను ఓ అధికారి హేళన చేస్తూ మాట్లాడిన తీరు తీవ్ర వివాదానికి దారితీసింది. తెలంగాణలోని సిద్దిపేట జిల్లా గజ్వేల్ తహసీల్దార్ చిట్టంపల్లి స్వామి రైతుతో వ్యవహరించిన తీరు సోషల్ మీడియాలో తీవ్ర విమర్శలకు కారణమైంది. రైతు సమస్యను పరిష్కరించాల్సిన అధికారే అవమానకరంగా మాట్లాడారన్న ఆరోపణలపై జిల్లా యంత్రాంగం స్పందించింది. విచారణ అనంతరం తహసీల్దార్‌ను సస్పెండ్ చేస్తూ జిల్లా కలెక్టర్ ఉత్తర్వులు జారీ చేసినట్లు సమాచారం.
రైతును చూసి హేళనగా వ్యాఖ్యలు
గజ్వేల్ పరిధికి చెందిన ఓ రైతు తన భూమికి సంబంధించిన సమస్యపై ఫిర్యాదు చేసేందుకు తహసీల్దార్ కార్యాలయానికి వెళ్లారు. అక్కడ తన సమస్యను వివరించేందుకు ప్రయత్నించగా తహసీల్దార్ చిట్టంపల్లి స్వామి అనుచిత వ్యాఖ్యలు చేసినట్లు ఆరోపణలు వచ్చాయి. ‘హేయ్.. బతికే ఉన్నావా? నువ్వు పురుగుల మందు తాగలేదా?’ అంటూ రైతును ప్రశ్నించినట్లు వైరల్ వీడియోలో కనిపిస్తోంది. ఈ వ్యాఖ్యలతో తీవ్ర మనస్తాపానికి గురైన రైతు.. ‘చచ్చిపోతున్నాం సార్.. మా పరిస్థితి చూస్తే నవ్వొస్తుందా?’ అని ఆవేదన వ్యక్తం చేశారు. దీనికి అధికారి ‘అవును.. నవ్వొస్తది.. బరాబర్ వస్తది’ అంటూ సమాధానం ఇవ్వడం వివాదాన్ని మరింత తీవ్రం చేసింది.
సోషల్ మీడియాలో వీడియో వైరల్
రైతుతో తహసీల్దార్ మాట్లాడిన వీడియో సామాజిక మాధ్యమాల్లో వైరల్ కావడంతో అధికారుల తీరుపై విమర్శలు వెల్లువెత్తాయి. భూమికి సంబంధించిన సమస్యలతో కార్యాలయాల చుట్టూ తిరుగుతున్న రైతులకు పరిష్కారం చూపాల్సింది పోయి అవమానించడం ఏమిటని పలువురు ప్రశ్నించారు. బాధిత రైతు కూడా తహసీల్దార్ వ్యవహారంపై జిల్లా కలెక్టర్‌కు ఫిర్యాదు చేశారు.
అసలు వివాదం రీజినల్ రింగ్ రోడ్డుదే!
ఈ ఘటనకు సంబంధించి మరో కీలక విషయం వెలుగులోకి వచ్చింది. బాధిత రైతును గజ్వేల్ మండలం మక్త మాసాన్‌పల్లి గ్రామానికి చెందిన యేసుగా గుర్తించారు. రీజినల్ రింగ్ రోడ్డు (RRR) కోసం సేకరించిన వ్యవసాయ భూమికి పరిహారం అందడంలో ఎదురైన వివాదం కారణంగా ఆయన తహసీల్దార్ కార్యాలయానికి వెళ్లినట్లు తెలిసింది. ఈ ఘటన సుమారు ఆరు నెలల క్రితం జరిగినట్లు రైతు తరువాత వెల్లడించారు. భూవివాదం పరిష్కారమై, పరిహారం కూడా అందినట్లు ఆయన స్పష్టం చేశారు. అయితే పాత వీడియో తాజాగా వైరల్ కావడంతో వివాదం మళ్లీ తెరపైకి వచ్చింది.
కలెక్టర్ హైమావతి సస్పెన్షన్ ఉత్తర్వులు
ఈ వ్యవహారాన్ని సిద్దిపేట జిల్లా కలెక్టర్ కె. హైమావతి తీవ్రంగా పరిగణించారు. ఘటనపై రెవెన్యూ డివిజనల్ అధికారి విచారణ జరిపి ప్రాథమిక నివేదిక సమర్పించారు. ఆ నివేదిక ఆధారంగా తహసీల్దార్ చిట్టంపల్లి స్వామిని విధుల నుంచి సస్పెండ్ చేశారు. తదుపరి అనుమతి లేకుండా ప్రధాన కార్యస్థానాన్ని విడిచి వెళ్లకూడదని కూడా ఆదేశించారు.
అధికారుల వ్యవహారశైలిపై చర్చ
రైతు భూవివాదం పరిష్కారమైనప్పటికీ, అధికారుల ప్రవర్తనపై ఈ ఘటన కీలక ప్రశ్నలను లేవనెత్తింది. ప్రభుత్వ కార్యాలయానికి సమస్యతో వచ్చే ప్రజలను గౌరవంగా చూడటం అధికారుల బాధ్యత. ముఖ్యంగా భూమి, పరిహారం వంటి సున్నితమైన సమస్యలతో బాధపడుతున్న రైతుల విషయంలో మరింత సహనంతో వ్యవహరించాల్సిన అవసరం ఉంది. గజ్వేల్ ఘటనలో కలెక్టర్ తీసుకున్న చర్య అధికారుల జవాబుదారీతనంపై మరోసారి చర్చకు దారితీసింది.
Read also: Team India Schedule: 27 రోజుల్లో 10 టీ20లు.. క్రికెట్ ఫ్యాన్స్‌కు పండగే.. భారత్‌ బిజీ షెడ్యూల్ ఇదే!
Groundnut Farmers: వేరుశనగ పంట ఎండిపోతోంది.. రాయలసీమ రైతుల్లో ఆందోళన..
