Pratyusha : తెలుగు సినీ ఇండస్ట్రీలో ఒకప్పుడు వెలుగొందిన నటి ప్రత్యూష మరణం రెండు దశాబ్దాల తర్వాత మళ్లీ చర్చనీయాంశంగా మారింది. 2002లో ఆమె ఆత్మహత్య సినీ ప్రపంచాన్ని షాక్కు గురిచేసిన విషయం తెలిసిందే. ఇప్పుడు ఆ కేసులో నిందితుడు గుడిపల్లి సిద్ధార్థ్ రెడ్డి, అలాగే ప్రత్యూష తల్లి సరోజినీదేవి దాఖలు చేసిన క్రిమినల్ అప్పీళ్లపై సుప్రీంకోర్టు తీర్పును రిజర్వ్ చేసింది.
కోర్టు వాదనలు – తీర్పు రిజర్వ్
జస్టిస్ రాజేశ్ బిందాల్, జస్టిస్ మన్మోహన్ లతో కూడిన ధర్మాసనం ఈ కేసును విచారించింది. హైకోర్టు తగ్గించిన శిక్షను సవాల్ చేస్తూ సిద్ధార్థ్ రెడ్డి దాఖలు చేసిన పిటిషన్తో పాటు, శిక్షను పెంచాలని కోరుతూ ప్రత్యూష తల్లి దాఖలు చేసిన అప్పీళ్లను కలిసి విచారించి తీర్పును రిజర్వ్ చేసింది.
ప్రేమ కథ నుంచి విషాదాంతం వరకు
సినిమాల్లోకి రాకముందే ప్రత్యూష, తనతో ఇంటర్లో చదువుకున్న సిద్ధార్థరెడ్డితో ప్రేమలో పడ్డారు. తరువాత ప్రత్యూష సినిమాల్లో బిజీగా ఉండగా, సిద్ధార్థ్ ఇంజినీరింగ్ చదువుతున్నాడు. 2002 ఫిబ్రవరి 23 సాయంత్రం ఇద్దరూ పురుగుమందు కలిపిన కూల్డ్రింక్ తాగి ఆసుపత్రికి చేరారు. తదుపరి రోజు ప్రత్యూష మృతి చెందగా, సిద్ధార్థ్ చికిత్స అనంతరం మార్చి 9న డిశ్చార్జ్ అయ్యాడు.
పరీక్షల్లో ఇద్దరూ తాగిన పానీయంలో ఆర్గానోఫాస్పేట్ ఉన్నట్లు తేలింది. ప్రభుత్వం నియమించిన వైద్యుల బృందం ప్రత్యూష మరణానికి ఇది కారణమని, ఊపిరాడకుండా అనిపించడం లేదా లైంగిక దాడి జరుగలేదని స్పష్టం చేసింది.
కోర్టుల్లో కేసు ప్రయాణం
సీబీఐ దర్యాప్తు అనంతరం, సిద్ధార్థ్ రెడ్డిపై IPC సెక్షన్ 306 (ఆత్మహత్యకు ప్రేరేపించడం), 309 (ఆత్మహత్యకు యత్నం) కింద ఛార్జీషీట్ దాఖలు చేసింది.
2004లో హైదరాబాద్ మెట్రోపాలిటన్ సెషన్స్ జడ్జి
→ 5 ఏళ్ల కఠిన కారాగార శిక్ష + రూ. 5,000 జరిమానా విధించారు.
2011లో హైకోర్టు
→ శిక్షను 2 ఏళ్లకు తగ్గించి, జరిమానాను రూ. 50,000కు పెంచింది.
దీని మీద 2012లో సిద్ధార్థ్ రెడ్డి, సరోజినీదేవి ఇద్దరూ సుప్రీంకోర్టును ఆశ్రయించారు.
సుప్రీంకోర్టులో వాదనలు
సీబీఐ తరఫున సీనియర్ న్యాయవాది నచికేత్ జోషి
→ “సాక్ష్యాధారాలు స్పష్టంగా ఉన్నాయి. సెక్షన్ 302 కింద శిక్ష విధించాలి. లేదంటే సెక్షన్ 306 కింద గరిష్ట శిక్ష విధించాలి” అని వాదించారు.
నిందితుడి తరఫున న్యాయవాదులు నాగముత్తు, ఎల్. నరసింహారెడ్డి
→ “ఇద్దరూ కలిసి పురుగుమందు తాగారు. కాబట్టి అతను ఉసిగొల్పాడని చెప్పడం సరైంది కాదు” అని వాదించారు.
ధర్మాసనం అన్ని వాదనలు విని తీర్పును రిజర్వ్ చేసింది. త్వరలో తుది తీర్పు వెలువడనుంది.
ఇవీ చదవండి: Telangana : గజ్వేల్లో విషాదం: అత్తింటి వేధింపులు భరించలేక నవవధువు ఆత్మహత్య
Dowry Harassment: పెళ్లైన నాలుగు నెలలకే యువతి ఆత్మహత్య