Sabarimala Mandala Yatra 2026: ‘స్వామియే శరణం అయ్యప్ప’ నామస్మరణతో శబరిగిరులు మార్మోగుతున్నాయి. వార్షిక మండల యాత్ర ప్రారంభం కావడంతో తొలి రోజే వేలాది మంది భక్తులు సన్నిధానానికి చేరుకున్నారు. నవంబర్ 16 సాయంత్రం ప్రారంభ క్రతువుల కోసం ఆలయాన్ని తెరిచారు. నవంబర్ 17 తెల్లవారుజామున 3 గంటలకు కొత్త ప్రధాన అర్చకుడు అరీఘర సుబ్రమణియన్ శంకరన్ నంబూదిరి పూజలతో మండల యాత్ర దర్శనాలను ప్రారంభించారు. అదే సమయంలో మాళికప్పురం ఆలయంలోనూ పూజలు మొదలయ్యాయి.
రోజుకు 80 వేల మందికి దర్శనం.. పంబలో స్పాట్ బుకింగ్ ఉండదు
రద్దీ నియంత్రణ కోసం రోజువారీ ప్రవేశ పరిమితిని 80 వేల మందిగా నిర్ణయించారు. నవంబర్ 16న వెల్లడైన వివరాల ప్రకారం సాధారణ వర్చువల్ క్యూ ద్వారా 60 వేల స్లాట్లు, నీలక్కల్లో స్పాట్ బుకింగ్ ద్వారా 10 వేల స్లాట్లు అందుబాటులో ఉంటాయి. ఎరుమేలి, పుల్లుమేడు అటవీ మార్గాల్లో ఒక్కో మార్గానికి 3 వేల చొప్పున, వండిపెరియార్ సత్రం మార్గంలో 2 వేల ఆన్లైన్ స్లాట్లు కేటాయించారు. అక్టోబర్ ప్రకటనలో బుకింగ్ కోటాల విభజన భిన్నంగా ఉంది. అందువల్ల ప్రయాణానికి ముందు ఎంచుకున్న తేదీ, మార్గానికి అందుబాటులో ఉన్న స్లాట్లను అధికారిక పోర్టల్లో చూసుకోవాలి. పంబలో స్పాట్ బుకింగ్ సదుపాయం లేదు.
దర్శనం ఎప్పటి నుంచి? నెయ్యాభిషేకం ఏ సమయంలో?
యాత్ర సీజన్లో ఆలయం తెల్లవారుజామున 3 గంటలకు తెరుచుకుంటుంది. ఉదయం 3.30 నుంచి 11 గంటల వరకు నెయ్యాభిషేకం నిర్వహిస్తారు. మధ్యాహ్న పూజ అనంతరం ఒంటి గంటకు ఆలయాన్ని మూసి, మధ్యాహ్నం 3 గంటలకు తిరిగి తెరుస్తారు. రాత్రి 11 గంటలకు హరివరాసనం అనంతరం ఆలయం మూసివేస్తారు. తొలి రోజే రద్దీ పెరిగిన నేపథ్యంలో దర్శనానికి పట్టే సమయం క్యూ పరిస్థితిని బట్టి మారుతుంది. వర్చువల్ క్యూ స్లాట్ బుక్ చేసుకున్నవారు తమ పాస్లోని తేదీ, రిపోర్టింగ్ సమయాన్ని చూసుకుని బయల్దేరాలి. Onmanorama
డిసెంబర్ 27న మండల పూజ.. జనవరి 14న మకరవిళక్కు
డిసెంబర్ 27న మండల పూజ నిర్వహించి, అదే రోజు తొలి విడత యాత్ర ముగింపుతో ఆలయాన్ని మూసివేస్తారు. మకరవిళక్కు సీజన్ కోసం డిసెంబర్ 30న తిరిగి తెరుస్తారు. 2027 జనవరి 14న మకరవిళక్కు ఉత్సవం జరుగుతుంది. భక్తులకు జనవరి 19 వరకు దర్శనానికి అవకాశం ఉంటుంది. జనవరి 20న ఆలయాన్ని మూసివేయడంతో వార్షిక యాత్ర సీజన్ ముగుస్తుంది.
ఇవీ చదవండి: Secunderabad: శబరి ఎక్స్ప్రెస్లో షాకింగ్ ఘటన.. భార్య కళ్లెదుటే ప్రియురాలితో కలిసి విషం తాగిన భర్త
Kerala CM Salute Viral Video: స్కూల్ క్యాడెట్కు లేచి సెల్యూట్ చేసిన కేరళ సీఎం.. కొచ్చి వీడియో వైరల్






