India Visa Rules 2026: పర్యాటకం, చదువు, వైద్యం, వ్యాపారం కోసం భారత్‌కు వచ్చే విదేశీయులు తమ ప్రయాణానికి సరైన వీసాను సులభంగా ఎంచుకునేలా కేంద్ర ప్రభుత్వం వీసా విధానాన్ని మార్చింది. ప్రధాన వీసా కేటగిరీలను 13 నుంచి 9కి, ఉప కేటగిరీలను 49 నుంచి 23కి కుదించింది. మొత్తం 23 ఉప కేటగిరీల దరఖాస్తు ఫారాల్లో నింపాల్సిన అంశాలను 65–70 శాతం తగ్గించినట్లు కేంద్ర హోంశాఖ నవంబర్ 11న వెల్లడించింది. ఒకే తరహా ప్రయాణ అవసరాలను ఒకే విభాగం కిందకు తీసుకురావడం, దరఖాస్తు పరిశీలనను వేగవంతం చేయడం ఈ మార్పుల లక్ష్యం. pib.gov.in
టూరిస్ట్‌ వీసా ఇక విజిటర్‌ వీసా
టూరిస్ట్‌ వీసాను విజిటర్‌ వీసాగా మార్చి, V-1, V-2 అనే రెండు ఉప విభాగాలను ఏర్పాటు చేశారు. V-1 వీసా 30 రోజులు చెల్లుబాటవుతుంది. ఆ గడువులో పలుమార్లు భారత్‌లోకి ప్రవేశించవచ్చు. పర్యాటకంతో పాటు స్వల్పకాలిక వ్యాపార సమావేశాలు, వైద్య సంప్రదింపులు, స్వల్పకాలిక చికిత్స, భారతీయ భాషలు, సంగీతం, కళలకు సంబంధించిన చిన్న కోర్సులు దీని పరిధిలోకి వస్తాయి. V-2 వీసా అర్హత, ప్రయాణ అవసరాన్ని బట్టి ఒకటి, ఐదు లేదా పదేళ్ల చెల్లుబాటుతో లభిస్తుంది. పర్వతారోహణ కోసం ఆరు నెలల మల్టిపుల్‌ ఎంట్రీ వీసా నిబంధనను చేర్చారు.
వైద్య చికిత్సకు ఏడాది మల్టిపుల్‌ ఎంట్రీ వీసా
సాధారణ వైద్య చికిత్స కోసం M-1, ఆయుష్‌ వైద్యం కోసం M-3 వీసాలు ఉంటాయి. ఈ రెండింటికీ, వాటి ఈ-వీసా రూపాలకూ సాధారణంగా ఏడాది చెల్లుబాటు, పలుమార్లు ప్రవేశించే సదుపాయం కల్పిస్తారు. దశలవారీ చికిత్స లేదా ఫాలోఅప్‌ పరీక్షల కోసం భారత్‌కు తిరిగి రావాల్సిన రోగులకు ఇది ఉపయోగపడుతుంది. M-1 వీసా ఉన్న రోగికి తోడుగా వచ్చేవారికి M-2, M-3 వీసా ఉన్న రోగి సహాయకులకు M-4 వర్తిస్తాయి.
విద్యార్థులు, పరిశోధకులు, వ్యాపారవేత్తలకు ఏ వీసా?
పాఠశాల, డిగ్రీ, పీజీ చదువులకు S-1 వీసా వర్తిస్తుంది. పీహెచ్‌డీ, పరిశోధన, ఇంటర్న్‌షిప్‌లు, విద్యార్థి మార్పిడి కార్యక్రమాలకు S-2 ఉంటుంది. ‘స్టడీ ఇన్‌ ఇండియా’ పోర్టల్‌ ద్వారా భారత విద్యాసంస్థల్లో చేరిన అర్హులైన విదేశీ విద్యార్థులకు కోర్సు వ్యవధి లేదా ఐదేళ్లలో ఏది తక్కువైతే అంతకాలం e-S1 మల్టిపుల్‌ ఎంట్రీ వీసా ఇవ్వవచ్చు. పరిశ్రమ లేదా వ్యాపార సంస్థ ఏర్పాటు వంటి దీర్ఘకాలిక కార్యకలాపాలకు B-1, సదస్సులు, సినిమా చిత్రీకరణ, స్వల్పకాలిక సాంకేతిక పనులు వంటి అవసరాలకు B-2 వర్తిస్తుంది.
కొత్త వీసాల జారీ ఎప్పటి నుంచి?
సవరించిన విధానంలో బిజినెస్‌, డిప్లొమాటిక్‌, వర్క్‌, జర్నలిస్ట్‌, మెడికల్‌, అఫీషియల్‌, స్టూడెంట్, విజిటర్‌, మిసెలేనియస్‌ అనే తొమ్మిది ప్రధాన కేటగిరీలు ఉంటాయి. కేటగిరీల కుదింపు నిర్ణయాన్ని ఆగస్టు 27న తీసుకున్న హోంశాఖ, ప్రస్తుతం ఐటీ వ్యవస్థలను అప్‌డేట్‌ చేస్తోంది. 2026 చివరి నాటికి సవరించిన విధానంలో వీసాల జారీ ప్రారంభిస్తామని తెలిపింది. ప్రస్తుతం 172 దేశాల పౌరులకు 13 ఉప కేటగిరీల్లో ఈ-వీసా సదుపాయం ఉంది. అర్హత, దరఖాస్తు వివరాలను భారత ప్రభుత్వ ఈ-వీసా పోర్టల్‌లో చూడవచ్చు.
ఇవీ చదవండి: H1B Visa: భారతీయులకు షాక్.. హెచ్‌1బీ వీసాపై $1 లక్ష ఫీజు మరో ఏడాది పొడిగించిన ట్రంప్.. దరఖాస్తుల పరిశీలన మరింత కఠినం
Australia Student Visa 2026: ఆస్ట్రేలియా స్టూడెంట్ వీసాలపై కఠిన నిబంధనలు.. భారతీయ విద్యార్థులకు భారీ షాక్.. రిజెక్షన్ రేటు 10 ఏళ్ల గరిష్ఠానికి!
