Gautam Menon: సౌత్ సినీ పరిశ్రమలో ప్రత్యేకమైన స్టోరీ టెల్లింగ్‌తో పేరు తెచ్చుకున్న దర్శకుడు గౌతమ్ వాసుదేవ్ మీనన్‌కు కోర్టు నుంచి పెద్ద షాక్ తగిలింది. నిర్మాత సంస్థ ఆర్‌ఎస్ ఇన్ఫోటైన్‌మెంట్‌తో జరిగిన ఆర్థిక వివాదంలో మద్రాస్ హైకోర్టు తాజాగా కీలక తీర్పు ఇచ్చింది.
2008లో జరిగిన ఒప్పందం
2008లో తన ప్రొడక్షన్ సంస్థ ఫోటాన్ ఫ్యాక్టరీస్ బ్యానర్‌పై ఒక తమిళ సినిమా నిర్మించేందుకు గౌతమ్ మీనన్, ఆర్‌ఎస్ ఇన్ఫోటైన్‌మెంట్ సంస్థ నుంచి రూ.4.25 కోట్లను ఒప్పందం ప్రకారం తీసుకున్నారు. అయితే కొన్ని కారణాల వల్ల ఆ సినిమా ప్రాజెక్ట్‌ను తర్వాత నిలిపివేశారు. కానీ తీసుకున్న మొత్తాన్ని తిరిగి ఇవ్వలేదని నిర్మాత సంస్థ ఆరోపించింది.
హైకోర్టులో కేసు
దీంతో ఆర్‌ఎస్ ఇన్ఫోటైన్‌మెంట్ అప్పట్లోనే మద్రాస్ హైకోర్టును ఆశ్రయించింది. అప్పటి నుంచి ఈ కేసు కోర్టులో కొనసాగుతూ వస్తోంది. ఇటీవల ఈ కేసుపై మళ్లీ విచారణ జరగగా గౌతమ్ మీనన్ తన వాదనను కోర్టు ముందు వినిపించారు.
గౌతమ్ వాదనను తిరస్కరించిన కోర్టు
ఆర్‌ఎస్ ఇన్ఫోటైన్‌మెంట్‌తో చేసుకున్న ఒప్పందం ప్రకారం తాము తెరకెక్కించిన ‘నీతానే ఎన్ పొన్వసంతం’ సినిమానే ఆ ప్రాజెక్ట్‌గా భావించాలని గౌతమ్ మీనన్ కోర్టుకు వివరించారు. అయితే ఆ సినిమా వేరే ఒప్పందం కింద రూపొందిందని కోర్టు పేర్కొంటూ ఆయన వాదనను తిరస్కరించింది.
వడ్డీతో డబ్బు చెల్లించాలని ఆదేశం
గౌతమ్ మీనన్ తీసుకున్న రూ.4.25 కోట్లను తిరిగి చెల్లించాలని మద్రాస్ హైకోర్టు ఆదేశించింది. అంతేకాదు 2010 మే నుంచి ఈ మొత్తంపై సంవత్సరానికి 12 శాతం వడ్డీతో చెల్లించాల్సిందేనని స్పష్టం చేసింది.
సుప్రీం కోర్టుకు వెళ్లే యోచన
కోర్టు తీర్పుతో అసంతృప్తిగా ఉన్న గౌతమ్ మీనన్ ఈ కేసును సుప్రీం కోర్టులో ఛాలెంజ్ చేసే ఆలోచనలో ఉన్నట్లు సమాచారం. ఈ పరిణామం ప్రస్తుతం సౌత్ సినీ పరిశ్రమలో చర్చనీయాంశంగా మారింది.
ఇవీ చదవండి: Telugu Movie Directors: గోల్డెన్ ఛాన్స్‌లు వృథా చేసిన దర్శకులు… పాన్ ఇండియా అవకాశాలు ఎందుకు ఉపయోగించుకోలేకపోయారు?
Directorate General of Civil Aviation: విమాన ప్రయాణికులకు హెచ్చరిక: దురుసు ప్రవర్తనపై కఠిన నిషేధాలు – డీజీసీఏ కొత్త ప్రతిపాదనలు
Enforcement Directorate: ఈడీ కేసులో మాజీ ఐఏఎస్ బీపీ ఆచార్యకు భారీ ఊరట
