Assembly elections schedule: దేశంలో కీలక రాష్ట్రాలైన తమిళనాడు, కేరళ, పశ్చిమ బెంగాల్, అసోం రాష్ట్రాలతో పాటు కేంద్రపాలిత ప్రాంతం పుదుచ్చేరిలో జరగనున్న అసెంబ్లీ ఎన్నికల షెడ్యూల్‌ను కేంద్ర ఎన్నికల సంఘం (ECI) ప్రకటించింది. ఢిల్లీలో నిర్వహించిన ప్రెస్‌మీట్‌లో ప్రధాన ఎన్నికల కమిషనర్ (CEC) ఈ వివరాలను వెల్లడించారు. మొత్తం ఐదు ప్రాంతాల్లో ఎన్నికలను పారదర్శకంగా, నిష్పాక్షికంగా నిర్వహించేందుకు అన్ని ఏర్పాట్లు పూర్తి చేసినట్లు తెలిపారు.
ఈ ఎన్నికల్లో మొత్తం 824 అసెంబ్లీ నియోజకవర్గాలకు పోలింగ్ జరగనుంది. ఈ ఐదు ప్రాంతాల్లో కలిపి సుమారు 17.4 కోట్ల మంది ఓటర్లు తమ ఓటు హక్కును వినియోగించుకోనున్నారు. ఎన్నికల నిర్వహణ కోసం 2.18 లక్షల పోలింగ్ కేంద్రాలను ఏర్పాటు చేసినట్లు ఎన్నికల సంఘం వెల్లడించింది.
పోలింగ్ కేంద్రాలపై ప్రత్యేక ఏర్పాట్లు
ఎన్నికల సమయంలో ఓటర్లకు ఎలాంటి ఇబ్బందులు లేకుండా ఉండేలా ప్రతి పోలింగ్ బూత్‌లో గరిష్టంగా 1200 మందికి మించకుండా ఓటర్లను పరిమితం చేసే చర్యలు తీసుకున్నట్లు ఎన్నికల సంఘం తెలిపింది. అలాగే ఓటర్లకు సౌకర్యంగా ఉండేందుకు అవసరమైన మౌలిక సదుపాయాలు కల్పించామని పేర్కొన్నారు.
అదేవిధంగా BLOలు (Booth Level Officers) సమర్థంగా పని చేసేలా అవసరమైన వసతులు కల్పించామని, ఓటర్ అవగాహన కార్యక్రమాలను కూడా విస్తృతంగా నిర్వహిస్తున్నామని సీఈసీ తెలిపారు. ముఖ్యంగా యువ ఓటర్లతో సమావేశాలు నిర్వహించి ఎన్నికల ప్రాముఖ్యతను వివరించినట్లు చెప్పారు.
అసోం ఎన్నికల షెడ్యూల్
ఐదు రాష్ట్రాల్లో ఎన్నికలు జరుగుతున్నప్పటికీ అసోం రాష్ట్రానికి సంబంధించిన పూర్తి షెడ్యూల్‌ను ఎన్నికల సంఘం వెల్లడించింది.
అసోంలో ఎన్నికల నోటిఫికేషన్ – రేపు విడుదల
నామినేషన్ల స్వీకరణ – ఈ నెల 23 నుంచి
పోలింగ్ తేదీ – ఏప్రిల్ 9
ఫలితాల వెల్లడ – మే 4
పోలింగ్, కౌంటింగ్ తేదీలు ఇవీ..
– అస్సాంలో ఏప్రిల్ 9న పోలింగ్ , మే 4న కౌంటింగ్
– పుదుచ్చేరిలో ఏప్రిల్ 9న పోలింగ్ , మే 4న కౌంటింగ్
– తమిళనాడులో ఏప్రిల్ 23నపోలింగ్ , మే 4న కౌంటింగ్
– బెంగాల్ లో ఏప్రిల్ 23 , 29 తేదీల్లో పోలింగ్ .మే 4న కౌంటింగ్
– కేరళలో ఏప్రిల్ 9న పోలింగ్ , మే 4న కౌంటింగ్
– 6 రాష్ట్రాల్లో 8 అసెంబ్లీ నియోజకవర్గాలకు ఉపఎన్నికలు
పారదర్శక ఎన్నికలకే ప్రాధాన్యం
ఈ ఎన్నికలను పూర్తిగా పారదర్శకంగా, నిష్పాక్షికంగా నిర్వహించేందుకు అన్ని చర్యలు తీసుకున్నామని ఎన్నికల సంఘం స్పష్టం చేసింది. ఎన్నికల ప్రక్రియలో ఎలాంటి అక్రమాలు చోటుచేసుకోకుండా ప్రత్యేక పర్యవేక్షణ కూడా ఉంటుందని తెలిపింది.
మొత్తం మీద దేశ రాజకీయాల్లో కీలకంగా మారనున్న ఈ ఐదు ప్రాంతాల ఎన్నికలు రాబోయే రోజుల్లో రాజకీయ పార్టీల మధ్య తీవ్రమైన పోటీకి వేదిక కానున్నాయి. రాజకీయ పార్టీల ప్రచారాలు, అభ్యర్థుల ఎంపికతో ఎన్నికల వేడి మరింత పెరగనుంది.
ఇవీ చదవండి: Network Selection: జ‌ర్నీలో ఉన్న‌ప్పుడు నెట్‌వ‌ర్క్ స‌మ‌స్యా? ఇలా చేస్తే మీ ప్రాబ్లంకు సొల్యూష‌న్ గ్యారెంటీ..
Bihar Election Result : బిహార్‌లో సుపరిపాలనకు పట్టం: ఎన్డీయే ఘన విజయం
Jubilee Hills by-election : బీజేపీ-బీఆర్ఎస్ ర‌హ‌స్య పొత్తు బ‌హిర్గతం
