Tirumala Laddu row : కలియుగ దైవం శ్రీ వేంకటేశ్వర స్వామి వారు కొలువైన Tirumala Tirupati Devasthanams పవిత్రతను కాపాడటం ప్రభుత్వ ప్రథమ కర్తవ్యమని రాష్ట్ర ఆర్థిక శాఖ మంత్రి Payyavula Keshav స్పష్టం చేశారు. శ్రీవారి లడ్డు ప్రసాదంలో ఉపయోగించిన నెయ్యిలో జరిగిన కల్తీ ఘటనను ప్రభుత్వం అత్యంత తీవ్రమైన అంశంగా పరిగణిస్తూ, బాధ్యులపై చట్టపరమైన మరియు పరిపాలనాత్మక చర్యలు తప్పవని తెలిపారు.
నేడు జరిగిన క్యాబినెట్ సమావేశంలో, ముందుగా నిర్ణయించిన అజెండాను పక్కనపెట్టి మరీ, నెయ్యి కల్తీపై ప్రత్యేక దర్యాప్తు బృందం (SIT) సమర్పించిన నివేదికపై సుదీర్ఘంగా చర్చ జరిగినట్లు మంత్రి వెల్లడించారు. ఈ నివేదిక భారత సుప్రీం కోర్టు ఆదేశాల మేరకు సీబీఐ పర్యవేక్షణలో రూపొందించబడినదని తెలిపారు. ప్రభుత్వానికి అందిన రెండు పత్రాల్లో ఒకటి కోర్టులో దాఖలైన చార్జ్షీట్ కాగా, మరోటి 11 పేజీల గోప్య నివేదికగా పేర్కొన్నారు.
SIT నివేదిక ప్రకారం, 2019 తర్వాత టిటిడి నెయ్యి కొనుగోలు విధానంలో ఉద్దేశపూర్వక సడలింపులు చేయడం వల్ల నాణ్యత లేని సరఫరాలకు అవకాశం కల్పించబడిందని తేలింది. టెండర్ నిబంధనల్లో టర్నోవర్ అర్హతను రూ.250 కోట్ల నుంచి రూ.150 కోట్లకు తగ్గించడం, అనుభవం లేని సంస్థలకు అర్హత ఇవ్వడం వంటి చర్యలు తీవ్రమైన అవకతవకలుగా నివేదిక పేర్కొంది.
NDDB–CALF ల్యాబ్ పరీక్షల్లో నెయ్యిలో సోయాబీన్, సన్ఫ్లవర్, రేప్సీడ్ ఆయిల్తో పాటు ఫిష్ ఆయిల్, బీఫ్ టాలో, లార్డ్ వంటి అనుమానాస్పద కల్తీ పదార్థాలు ఉండే అవకాశం ఉన్నట్లు వెల్లడైంది. 2022లో CFTRI ల్యాబ్ ఇచ్చిన హెచ్చరికలను కూడా అప్పటి అధికారులు పట్టించుకోలేదని నివేదిక స్పష్టం చేసింది. సుమారు రూ.58 లక్షల లీటర్ల కల్తీ నెయ్యి సరఫరా జరిగినట్లు SIT అంచనా వేసింది.
ఈ నివేదికలో పలువురు సీనియర్ అధికారుల బాధ్యతను ప్రస్తావించినట్లు మంత్రి తెలిపారు. నాణ్యత నియంత్రణలో వైఫల్యం, టెండర్ నిబంధనల సడలింపుల విషయంలో సంబంధిత అధికారులపై చర్యలు తీసుకోవాలని క్యాబినెట్ నిర్ణయించింది. అలాగే భవిష్యత్తులో ఇలాంటి ఘటనలు పునరావృతం కాకుండా వ్యవస్థాగత సంస్కరణలు చేపట్టాలని నిర్ణయించింది.
ఈ మొత్తం వ్యవహారంపై సమగ్ర సమీక్ష కోసం ప్రభుత్వం ఒక స్వల్పకాలిక పరిపాలనా కమిటీని ఏర్పాటు చేయనుంది. కమిటీ నిర్ణీత కాలంలో విచారణ పూర్తి చేసి తుది నివేదికను ప్రభుత్వానికి సమర్పించనుంది.
క్యాబినెట్ సమావేశానికి అధ్యక్షత వహించిన గౌరవ ముఖ్యమంత్రి Nara Chandrababu Naidu, తిరుమల పవిత్రతను కాపాడటం ప్రభుత్వ ధర్మమని, శ్రీవారి సేవలో భక్తుల విశ్వాసానికి ఎలాంటి భంగం కలగకూడదని స్పష్టం చేశారు. గౌరవ ఉప ముఖ్యమంత్రి Pawan Kalyan సహా మంత్రులంతా ఈ విషయంలో రాజకీయాలకు అతీతంగా కఠిన చర్యలు తీసుకోవాలన్న అభిప్రాయానికి ఏకాభిప్రాయంగా వచ్చారని తెలిపారు.
ఇవీ చదవండి: Jagan Pressmeet : వైఎస్ జగన్ సుదీర్ఘ ప్రెస్ మీట్.. రైతులు, ఆరోగ్యశ్రీ, ఉద్యోగులు, వైజాగ్ స్టీల్ ప్లాంట్, లడ్డూ, పరకామణి, చంద్రబాబు కేసులు..
Laddu: తిరుమల లడ్డూ వివాదంపై సీబీఐ విచారణ ప్రారంభం