Delhi High Court: పరస్పర అంగీకారంతో విడాకులు కోరే భార్యాభర్తలకు ఊరట కలిగించే కీలక తీర్పును ఢిల్లీ హైకోర్టు వెలువరించింది. పరస్పర అంగీకార విడాకుల కోసం కోర్టును ఆశ్రయించే ముందు తప్పనిసరిగా ఒక సంవత్సరం పాటు విడివిడిగా జీవించాల్సిన అవసరం లేదని హైకోర్టు స్పష్టం చేసింది.
అసాధారణ పరిస్థితులు, తీవ్రమైన మానసిక కష్టం లేదా దుర్వ్యవహారం (Exceptional Hardship లేదా Depravity) ఉన్న సందర్భాల్లో ఈ షరతును కుటుంబ కోర్టు లేదా హైకోర్టు మినహాయించవచ్చని పేర్కొంది. హిందూ వివాహ చట్టం, 1955లోని సెక్షన్ 13B(1) కింద పేర్కొన్న ఒక సంవత్సరం విడివిడిగా జీవించాలనే నిబంధన డైరెక్టరీ మాత్రమే, తప్పనిసరి కాదు అని పూర్తి ధర్మాసనం తీర్పునిచ్చింది.
న్యాయమూర్తులు నవీన్ చావ్లా, అనుప్ జైరామ్ భంభానీ, రేణు భట్నాగర్లతో కూడిన ధర్మాసనం, సెక్షన్ 13B(1)ను “ఈ చట్టంలోని నిబంధనలకు లోబడి” అనే పదబంధంతో ప్రారంభమయ్యే విధంగా HMAలోని సెక్షన్ 14(1)తో సమన్వయంగా చదవాలని అభిప్రాయపడింది.
భార్యాభర్తల మధ్య తీవ్ర విభేదాలు ఉండి, ఇద్దరూ విడాకులు కోరుతున్న పరిస్థితుల్లో వారిని బలవంతంగా వివాహ బంధంలో కొనసాగించడం కోర్టు ధర్మం కాదని ధర్మాసనం స్పష్టం చేసింది. విడిపోవాలని నిర్ణయించుకున్న వారిని ఏడాది పాటు కలిసి ఉండాలని ఆదేశించడం వారి ఆత్మగౌరవం, వ్యక్తిగత స్వేచ్ఛకు విరుద్ధమవుతుందని పేర్కొంది.
ఇదే కాకుండా, హిందూ వివాహ చట్టంలోని సెక్షన్ 13B(2) ప్రకారం రెండో మోషన్ దాఖలు చేసే ముందు ఉండే ఆరు నెలల ‘కూలింగ్-ఆఫ్ పీరియడ్’ను కూడా కోర్టు మాఫీ చేయవచ్చని హైకోర్టు తెలిపింది. అయితే ఇందుకు బలమైన కారణాలు ఉండాలని స్పష్టం చేసింది.
పిటిషనర్కు తన భాగస్వామి కారణంగా అసాధారణమైన మానసిక కష్టం, హింస లేదా దుర్వ్యవహారం ఎదురైతే మాత్రమే కోర్టు ఇలాంటి మినహాయింపులను పరిగణలోకి తీసుకుంటుందని తీర్పులో పేర్కొంది.
ఈ తీర్పుతో పరస్పర అంగీకార విడాకుల విషయంలో కోర్టులకు మరింత స్వేచ్ఛ లభించనుండగా, వివాహ బంధంలో అనవసరంగా బాధపడుతున్న వారికి న్యాయసహాయం మరింత సులభం కానుంది.
ఇవీ చదవండి: YS Jagan Defamation: జగన్ పరువు నష్టం దావా కేసులో కీలక పరిణామం
Telangana Crime : అక్క వరుసయ్యే మహిళతో వివాహేతర బంధం.. చివరకు భర్త చేతిలో ఏమైందంటే..