NCC Special Entry 2027: భారత సైన్యంలో ఆఫీసర్గా సేవలందించాలని కలలు కనే మహిళా అభ్యర్థులకు ఇండియన్ ఆర్మీ శుభవార్త చెప్పింది. NCC Special Entry Scheme 125th Course (April 2027) కింద అవివాహిత మహిళా గ్రాడ్యుయేట్ల నుంచి దరఖాస్తులు ఆహ్వానిస్తోంది. షార్ట్ సర్వీస్ కమిషన్ (SSC-Non Technical) కింద లెఫ్టినెంట్ హోదాలో నియామకాలు చేపట్టనుండగా, ఎలాంటి రాత పరీక్ష లేకుండానే ఎంపిక ప్రక్రియ నిర్వహించడం ఈ నోటిఫికేషన్ ప్రత్యేకతగా నిలిచింది. అర్హులైన అభ్యర్థులు ఆన్లైన్లో దరఖాస్తు చేసుకునే అవకాశం కల్పించారు.
ఎన్ని ఖాళీలు.. ఎవరు దరఖాస్తు చేసుకోవచ్చు?
ఈ నోటిఫికేషన్ ద్వారా మొత్తం 6 పోస్టులను భర్తీ చేయనున్నారు. వీటిలో 5 పోస్టులు NCC మహిళా అభ్యర్థులకు, 1 పోస్టు Army Personnel Battle Casualties Ward అభ్యర్థులకు కేటాయించారు. NCC అభ్యర్థులు గుర్తింపు పొందిన యూనివర్సిటీ నుంచి బ్యాచిలర్ డిగ్రీ పూర్తి చేసి ఉండాలి. అలాగే NCC సీనియర్ డివిజన్/వింగ్లో నిర్దేశిత సేవ పూర్తి చేసి, NCC ‘C’ Certificateలో కనీసం ‘B’ Grade సాధించి ఉండాలి. డిగ్రీ చివరి సంవత్సరం చదువుతున్న విద్యార్థినులు కూడా దరఖాస్తు చేసుకోవచ్చు. అయితే Battle Casualties Ward అభ్యర్థులకు NCC ‘C’ సర్టిఫికెట్ తప్పనిసరి కాదు.
వయోపరిమితి, దరఖాస్తు గడువు వివరాలు
అభ్యర్థుల వయస్సు 2027 జనవరి 1 నాటికి 19 నుంచి 25 సంవత్సరాల మధ్య ఉండాలి. అంటే 2002 జనవరి 2 నుంచి 2008 జనవరి 1 మధ్య జన్మించిన వారు అర్హులు. ఆన్లైన్ దరఖాస్తు ప్రక్రియ 2026 జులై 21 నుంచి ప్రారంభమై, ఆగస్టు 21, 2026 వరకు కొనసాగుతుంది. అభ్యర్థులు అవసరమైన విద్యార్హతలు, ధ్రువపత్రాలు సిద్ధంగా ఉంచుకుని అధికారిక వెబ్సైట్ ద్వారా దరఖాస్తు చేసుకోవాలి.
రాత పరీక్ష లేదు.. ఎంపిక ఎలా ఉంటుంది?
ఈ నియామకాల్లో ఎలాంటి రాత పరీక్ష నిర్వహించరు. ముందుగా దరఖాస్తులను పరిశీలించి అభ్యర్థులను షార్ట్లిస్ట్ చేస్తారు. అనంతరం SSB Interview, మెడికల్ పరీక్ష, డాక్యుమెంట్ వెరిఫికేషన్ ఆధారంగా తుది ఎంపిక ఉంటుంది. అన్ని దశల్లో అర్హత సాధించిన వారికి మాత్రమే నియామకాలు కల్పిస్తారు. దీంతో NCCలో మెరుగైన ప్రదర్శన కనబరిచిన అభ్యర్థులకు ఇది గొప్ప అవకాశంగా మారింది.
శిక్షణ, స్టైపెండ్, ఉద్యోగ హోదా
తుది ఎంపికైన అభ్యర్థులకు చెన్నైలోని Officers Training Academy (OTA)లో 49 వారాలపాటు శిక్షణ అందిస్తారు. శిక్షణ కాలంలో నెలకు రూ.56,100 స్టైపెండ్ చెల్లిస్తారు. కోర్సు విజయవంతంగా పూర్తి చేసిన వారికి మద్రాస్ యూనివర్సిటీ నుంచి Post Diploma in Defence Management and Strategic Studies అందజేస్తారు. అనంతరం భారత సైన్యంలో లెఫ్టినెంట్ హోదాలో నియమిస్తారు. దేశ సేవతో పాటు గౌరవప్రదమైన కెరీర్ను కోరుకునే మహిళా గ్రాడ్యుయేట్లకు ఈ నోటిఫికేషన్ అరుదైన అవకాశంగా చెప్పవచ్చు.
NCC సర్టిఫికెట్ ఉన్నవారికి ఎందుకు ఇది మంచి అవకాశం?
NCCలో శిక్షణ పొందిన విద్యార్థులకు నాయకత్వ లక్షణాలు, క్రమశిక్షణ, ఫిట్నెస్ వంటి అంశాల్లో ఇప్పటికే అనుభవం ఉండటంతో ఇండియన్ ఆర్మీ ప్రత్యేక ఎంట్రీ ద్వారా వారికి ప్రాధాన్యం ఇస్తోంది. రాత పరీక్ష లేకుండా నేరుగా SSB ఇంటర్వ్యూకు వెళ్లే అవకాశం ఉండటం వల్ల పోటీ పరీక్షల ఒత్తిడి తగ్గుతుంది. దేశ సేవ చేయాలనే లక్ష్యంతో ఉన్న మహిళలకు ఈ నోటిఫికేషన్ కెరీర్ పరంగా కీలక మలుపు కావచ్చు.
ఇవీ చదవండి: Anganwadi Helper Jobs 2026: 230 అంగన్వాడీ హెల్పర్ పోస్టులు.. 10వ తరగతి అర్హతతో ఉద్యోగ అవకాశం
Gulf Jobs Crisis: గల్ఫ్లో ఉద్యోగాల సంక్షోభం.. భారతీయులకు గడ్డు పరిస్థితులు..