Driving Licence: డ్రైవింగ్ లైసెన్స్ జారీ విధానంలో రాష్ట్ర ప్రభుత్వం కీలక మార్పులు తీసుకొస్తోంది. ఇప్పటివరకు వాహనం నడపగలిగితే సరిపోతుందనే విధానానికి బదులుగా, రోడ్డు భద్రతపై పూర్తి అవగాహన ఉన్నవారికే శాశ్వత డ్రైవింగ్ లైసెన్స్ ఇవ్వాలనే లక్ష్యంతో కొత్త నిబంధనలను అమలు చేయనుంది. రోడ్డు ప్రమాదాలను తగ్గించడం, బాధ్యతాయుతమైన డ్రైవర్లను తయారు చేయడం ఈ నిర్ణయం వెనుక ప్రధాన ఉద్దేశమని అధికారులు చెబుతున్నారు.
లెర్నర్ లైసెన్స్ తర్వాత శిక్షణ తప్పనిసరి
కొత్త నిబంధనల ప్రకారం లెర్నర్ లైసెన్స్ పొందిన ప్రతి అభ్యర్థి ప్రత్యేక రోడ్డు భద్రతా శిక్షణ (Road Safety Training) పూర్తి చేయాలి. ఈ శిక్షణ పూర్తి చేసిన తర్వాత మాత్రమే పర్మినెంట్ డ్రైవింగ్ లైసెన్స్ కోసం నిర్వహించే డ్రైవింగ్ టెస్ట్‌కు స్లాట్ బుక్ చేసుకునే అవకాశం ఉంటుంది. దీంతో కేవలం డ్రైవింగ్ నేర్చుకోవడం మాత్రమే కాకుండా, ట్రాఫిక్ నిబంధనలు, రోడ్డు భద్రతపై కూడా అభ్యర్థులకు పూర్తి అవగాహన కల్పించనున్నారు.
వీడియోల రూపంలో ట్రాఫిక్ రూల్స్
ఈ శిక్షణను సులభంగా అర్థమయ్యేలా ప్రత్యేకంగా రూపొందించారు. పుస్తకాలు చదివే విధానం కాకుండా వీడియోల ద్వారా పాఠాలు బోధిస్తారు. రోడ్డుపై ఎదురయ్యే వాస్తవ పరిస్థితులు, సాధారణంగా జరిగే పొరపాట్లు, ప్రమాదాలకు దారితీసే కారణాలు, వాటిని ఎలా నివారించాలి వంటి అంశాలను ఉదాహరణలతో వివరిస్తారు.
మొత్తం 6 మాడ్యూళ్లు.. 120కిపైగా వీడియోలు
ఈ కోర్సును మొత్తం ఆరు మాడ్యూళ్లుగా రూపొందించారు.
శిక్షణలో..
- 64 రోడ్డు భద్రతా నియమాలు
- 120కు పైగా అవగాహన వీడియోలు
- ప్రతి మాడ్యూల్ తర్వాత చిన్న పరీక్ష
- చివర్లో కోర్సు పూర్తి ధృవీకరణ ఉంటాయి.
ప్రతి దశను విజయవంతంగా పూర్తి చేసిన అభ్యర్థులకు మాత్రమే తదుపరి దశకు వెళ్లే అవకాశం ఉంటుంది.
పరీక్షలో ఉత్తీర్ణులైతేనే డ్రైవింగ్ టెస్ట్
ప్రతి మాడ్యూల్ పూర్తయిన తర్వాత చిన్న ఆన్‌లైన్ పరీక్ష నిర్వహిస్తారు. అన్ని పరీక్షల్లో ఉత్తీర్ణత సాధించిన వారికి మాత్రమే డ్రైవింగ్ టెస్ట్ స్లాట్ బుక్ చేసుకునే అనుమతి ఉంటుంది. దీంతో ట్రాఫిక్ నిబంధనలపై సరైన అవగాహన ఉన్నవారే రోడ్లపైకి వస్తారని ప్రభుత్వం భావిస్తోంది.
ఇంటి నుంచే శిక్షణ పూర్తి చేసే అవకాశం
ఈ శిక్షణ కోసం ఆర్టీవో కార్యాలయానికి వెళ్లాల్సిన అవసరం లేదు. కెమెరా ఉన్న.. మొబైల్ ఫోన్, ల్యాప్‌టాప్, కంప్యూటర్ ద్వారా ఇంటి నుంచే కోర్సును పూర్తి చేయవచ్చు. ప్రారంభంలో ముఖ గుర్తింపు (Face Authentication) తప్పనిసరిగా నమోదు చేయాలి. అవసరమైతే మధ్యలో కోర్సును ఆపి, తర్వాత అదే చోట నుంచి కొనసాగించే అవకాశం కూడా ఉంటుంది.
నాలుగు భాషల్లో ఉచితంగా అందుబాటులో
అభ్యర్థుల సౌకర్యం కోసం ఈ శిక్షణను నాలుగు భాషల్లో అందుబాటులో ఉంచుతున్నారు.
- తెలుగు
- ఇంగ్లీష్
- హిందీ
- ఉర్దూ
ఎలాంటి అదనపు ఫీజు లేకుండా ఈ కోర్సును పూర్తి చేయవచ్చు.
ట్రాఫిక్ రూల్స్ మాత్రమే కాదు.. సురక్షిత డ్రైవింగ్‌పై ప్రత్యేక శిక్షణ
ఈ కోర్సులో కేవలం ట్రాఫిక్ నిబంధనలకే పరిమితం కాలేదు. రోజువారీ డ్రైవింగ్‌లో అవసరమైన అనేక భద్రతా అంశాలను కూడా చేర్చారు.
వాటిలో..
- సీట్‌బెల్ట్ వినియోగం
- వాహన అద్దాల సరైన సర్దుబాటు
- హ్యాండ్‌బ్రేక్ వినియోగం
- రాత్రివేళ హెడ్‌లైట్ల వినియోగం
- ద్విచక్ర వాహనాలపై పిల్లలను సురక్షితంగా తీసుకెళ్లే విధానం
- మహిళల భద్రతకు సంబంధించిన సూచనలు
- అత్యవసర పరిస్థితుల్లో తీసుకోవాల్సిన జాగ్రత్తలు వంటి అంశాలను వీడియోల ద్వారా వివరిస్తారు.
రోడ్డు ప్రమాదాల తగ్గింపే ప్రధాన లక్ష్యం
దేశంలో జరుగుతున్న రోడ్డు ప్రమాదాల్లో అధిక శాతం మానవ తప్పిదాల వల్లే జరుగుతున్నాయని గణాంకాలు సూచిస్తున్నాయి. ఈ నేపథ్యంలో కొత్తగా డ్రైవింగ్ నేర్చుకునే వారిలో బాధ్యతాయుతమైన డ్రైవింగ్ అలవాట్లను పెంపొందించడం ద్వారా ప్రమాదాలను తగ్గించాలని రవాణా శాఖ లక్ష్యంగా పెట్టుకుంది. రోడ్డు భద్రతపై అవగాహన పెరిగితే ప్రమాదాలు, ప్రాణనష్టాలు కూడా గణనీయంగా తగ్గే అవకాశం ఉందని అధికారులు భావిస్తున్నారు.
సుప్రీంకోర్టు కమిటీ సూచనలతో రూపకల్పన
ఈ రోడ్డు భద్రతా శిక్షణ కార్యక్రమాన్ని సుప్రీంకోర్టు రోడ్డు భద్రత కమిటీ సూచనల మేరకు రూపొందించారు. ముందుగా కూకట్‌పల్లి ఆర్టీవో పరిధిలో పైలట్ ప్రాజెక్టుగా అమలు చేయగా మంచి స్పందన లభించింది. అభ్యర్థుల నుంచి సానుకూల స్పందన రావడంతో త్వరలో రాష్ట్రవ్యాప్తంగా ఈ విధానాన్ని అమలు చేయాలని రవాణా శాఖ సన్నాహాలు చేస్తోంది.
కొత్త విధానం వల్ల కలిగే ప్రయోజనాలు
ఈ కొత్త విధానం అమలుతో కొత్త డ్రైవర్లలో ట్రాఫిక్ నిబంధనలపై అవగాహన పెరగడంతో పాటు బాధ్యతాయుతమైన డ్రైవింగ్ అలవాట్లు ఏర్పడతాయి. రోడ్డు ప్రమాదాలు తగ్గే అవకాశం ఉంటుంది. అలాగే డ్రైవింగ్ లైసెన్స్ పొందే ప్రతి వ్యక్తి సురక్షిత డ్రైవింగ్‌పై ప్రాథమిక శిక్షణతో రోడ్లపైకి రావడం వల్ల ప్రజల భద్రత కూడా మెరుగుపడుతుందని అధికారులు భావిస్తున్నారు.
Read also: Driving Licence Download: డ్రైవింగ్ లైసెన్స్ ఆన్‌లైన్‌లో ఎలా డౌన్‌లోడ్ చేసుకోవాలి? DigiLockerలో ఇలా భద్రపరుచుకోండి!
Driving Licence New Rules: ఆగస్టు 1 నుంచి డ్రైవింగ్ లైసెన్స్‌కు కొత్త రూల్స్.. ఈ సర్టిఫికెట్ లేకుంటే లైసెన్స్, కమర్షియల్ పర్మిట్ కష్టమే!
