New Year Liquor sales : తెలంగాణలో మద్యం విక్రయాలు మరోసారి సంచలనం సృష్టించాయి. రికార్డులు కొత్తేమీ కాకపోయినా, ఈసారి లెక్కలే మారిపోయే స్థాయిలో అమ్మకాలు నమోదయ్యాయి. న్యూ ఇయర్ వేడుకలు, వీకెండ్ హడావుడి, అలాగే కొత్త మద్యం విధానం అమల్లోకి రావడం కలిసి రాష్ట్రంలో మద్యం విక్రయాలను ఊహించని స్థాయికి తీసుకెళ్లాయి.
అబ్కారీ శాఖ గణాంకాల ప్రకారం, 2024 డిసెంబర్ చివరి మూడు రోజుల్లో రూ.736 కోట్ల విలువైన మద్యం అమ్మకాలు జరగగా, 2025 డిసెంబర్ చివరి మూడు రోజుల్లో ఈ సంఖ్య భారీగా పెరిగి రూ.980 కోట్లను దాటింది. ఒక్క ఏడాదిలోనే వందల కోట్ల రూపాయల పెరుగుదల కనిపించడం విశేషంగా మారింది.
కొత్త మద్యం విధానం అమలులోకి రావడంతో డిసెంబర్ నెల నుంచి కొత్తగా లైసెన్స్లు పొందిన వ్యాపారులు విక్రయాల్లోకి దిగారు. దీని ప్రభావం నేరుగా అమ్మకాలపై పడిందని అధికారులు చెబుతున్నారు. రాష్ట్రవ్యాప్తంగా ఉన్న 3,620 మద్యం దుకాణాలు, సుమారు 1,100 బార్లు, పబ్లు, క్లబ్లు కలిసి డిసెంబర్ నెల మొత్తం మీద డిపోల నుంచి రూ.4,920 కోట్ల విలువైన మద్యాన్ని కొనుగోలు చేసినట్లు అబ్కారీ శాఖ వెల్లడించింది.
డిసెంబర్ 25 నుంచి 31 వరకు ఒక్క వారంలోనే మద్యం విక్రయాల విలువ రూ.1,350 కోట్లను దాటడం గమనార్హం. ముఖ్యంగా చివరి మూడు రోజుల్లో అమ్మకాలు ఊపందుకున్నాయి.
డిసెంబర్ 29న రూ.280 కోట్లకు పైగా
డిసెంబర్ 30న రూ.380 కోట్లకుపైగా
డిసెంబర్ 31న రూ.315 కోట్లకు మించి
మొత్తం మూడు రోజుల్లోనే దాదాపు రూ.వెయ్యి కోట్ల విలువైన మద్యం విక్రయాలు జరగడం రాష్ట్ర చరిత్రలో అరుదైన ఘట్టమని అబ్కారీ అధికారులు అంటున్నారు.
అమ్మకాల పరంగా చూస్తే, ఈ మూడు రోజుల్లోనే 8.30 లక్షల కేసుల లిక్కర్, 7.78 లక్షల కేసుల బీరు అమ్ముడైనట్లు వెల్లడైంది. న్యూ ఇయర్ వేడుకలు, వీకెండ్ సందడి, కొత్త మద్యం పాలసీ—ఈ మూడు అంశాలు కలిసి తెలంగాణలో మద్యం మార్కెట్ను కొత్త రికార్డు స్థాయికి తీసుకెళ్లాయని అధికారుల విశ్లేషణ.
ఇవీ చదవండి: AP Liquor Case : ధనుంజయరెడ్డి, కృష్ణమోహన్ రెడ్డి, గోవిందప్పలకు బెయిల్
AP Liquor Scam : ధనుంజయరెడ్డి, కృష్ణమోహన్ రెడ్డి, గోవిందప్పకు సీఐడీ పిలుపు