Sankranti : సంక్రాంతి పండుగ వచ్చిందంటే గల్లీ గల్లీకి పతంగుల సందడి తప్పనిసరి. చిన్నపిల్లలతో పాటు పెద్దలు కూడా గాలిపటాలు ఎగురవేస్తూ పండుగ ఆనందాన్ని ఆస్వాదిస్తుంటారు. అయితే, ఈ ఉత్సాహమే కొన్ని సందర్భాల్లో ప్రాణాపాయంగా మారుతుందనే విషయాన్ని గుర్తుంచుకోవాలని రైల్వేశాఖ హెచ్చరిస్తోంది.
పతంగుల దారాలు కరెంట్ వైర్లకు చిక్కుకోవడం, రోడ్డుపై వెళ్లే వాహనదారులకు తగలడం, ముఖ్యంగా రైల్వే విద్యుత్ లైన్లను తాకడం వల్ల తీవ్ర ప్రమాదాలు జరిగే అవకాశముందని తెలిపింది. ఈ నేపథ్యంలో ప్రయాణికుల భద్రత దృష్ట్యా రైల్వే అధికారులు కీలక సూచనలతో కూడిన ప్రకటన విడుదల చేశారు.
రైల్వేశాఖ నుంచి స్పష్టమైన అలర్ట్
South Central Railway అధికారులు ప్రజలకు స్పష్టమైన హెచ్చరిక జారీ చేశారు. రైల్వే ప్రాంగణాలు, స్టేషన్ల పరిసరాలు, యార్డులు, ట్రాక్లకు సమీప ప్రాంతాల్లో గాలిపటాలు ఎగురవేయవద్దని సూచించారు. ముఖ్యంగా ఓవర్హెడ్ ట్రాక్షన్ లైన్ల దగ్గర పతంగులు ఎగరేయడం అత్యంత ప్రమాదకరమని పేర్కొన్నారు.
ఈ ట్రాక్షన్ లైన్లు అధిక వోల్టేజ్ విద్యుత్తో ఛార్జ్ అయి ఉంటాయని, వాటిని తాకితే క్షణాల్లో ప్రాణాలు పోయే ప్రమాదం ఉందని హెచ్చరించారు. అలాగే విద్యుత్ తీగలకు వేలాడుతున్న పతంగు దారాలను తాకడం కూడా ప్రాణాంతకమేనని స్పష్టం చేశారు.
చైనా మాంజా మరింత ప్రమాదకరం
రైల్వే అధికారులు మరో కీలక అంశాన్ని గుర్తుచేశారు. చైనా నుంచి దిగుమతి చేసే గాలిపటాల దారాలు (చైనా మాంజా) విద్యుత్ వాహక లక్షణాలు కలిగి ఉండటంతో, అవి మనుషులకే కాదు రైల్వే విద్యుత్ వ్యవస్థకు కూడా తీవ్రమైన ముప్పుగా మారుతున్నాయని తెలిపారు.
ఇలాంటి దారాల వల్ల రైల్వే సేవలకు అంతరాయం కలిగి, రైళ్ల రాకపోకలు నిలిచిపోయే పరిస్థితులు కూడా తలెత్తుతాయని చెప్పారు.
గతంలో జరిగిన ప్రమాదాలు
ఈ ఏడాది సంక్రాంతి సీజన్లోనే దేశవ్యాప్తంగా Indian Railways పరిధిలోని పలు జోన్లలో పతంగుల కారణంగా ప్రమాదాలు చోటుచేసుకున్నాయని అధికారులు వెల్లడించారు. 25 కిలోవోల్ట్ ట్రాక్షన్ ఓవర్హెడ్ కండక్టర్లకు పతంగుల దారాలు చిక్కుకోవడంతో విద్యుత్ షాక్ తగిలి కొందరు ప్రాణాలు కోల్పోయిన ఘటనలు నమోదయ్యాయి. మరికొందరు తీవ్రంగా గాయపడ్డారని తెలిపారు. ఈ ఘటనల నేపథ్యంలో ముందస్తు జాగ్రత్తగా ప్రజలకు హెచ్చరికలు జారీ చేసినట్లు తెలిపారు.
నిబంధనలు ఉల్లంఘిస్తే కఠిన చర్యలు
ప్రజలు పండుగలను బాధ్యతాయుతంగా జరుపుకోవాలని, రైల్వే కార్యకలాపాలకు విఘాతం కలిగించవద్దని రైల్వేశాఖ కోరింది.
రైల్వే ప్రాంతాల్లో పతంగులు ఎగురవేస్తూ నిబంధనలు ఉల్లంఘిస్తే కేసులు నమోదు చేయడమే కాకుండా, అవసరమైతే కఠిన చట్టపరమైన చర్యలు కూడా తీసుకుంటామని స్పష్టంగా హెచ్చరించింది.
పండుగ ఆనందం ప్రాణాలకు ముప్పుగా మారకుండా, ప్రతి ఒక్కరూ జాగ్రత్తలు పాటించాలని రైల్వేశాఖ విజ్ఞప్తి చేసింది.
ఇవీ చదవండి: Vande Bharat Sleeper: వేగంలో సరికొత్త రికార్డ్.. 180 కిలోమీటర్ల స్పీడ్లోనూ కుదుపుల్లేని ప్రయాణం.. రైల్వే చరిత్రలో అరుదైన ఘట్టం
Indian Railway: సంక్రాంతికి ఇంటికెళ్లే వారికి గుడ్న్యూస్.. ప్రత్యేక రైళ్ల షెడ్యూల్ ప్రకటించిన రైల్వేశాఖ