Highways : జాతీయ రహదారుల నిర్మాణంలో భారత్ ప్రపంచస్థాయిలో రికార్డులు సృష్టించడం గర్వకారణమని ముఖ్యమంత్రి చంద్రబాబు నాయుడు అన్నారు. బెంగుళూరు–విజయవాడ ఎకనామిక్ కారిడార్‌లో నాలుగు గిన్నీస్ వరల్డ్ రికార్డులు సాధించిన సందర్భంగా సత్యసాయి జిల్లాలో నిర్వహించిన కార్యక్రమంలో సీఎం చంద్రబాబు, కేంద్రమంత్రి నితిన్ గడ్కరీ వర్చువల్‌గా పాల్గొన్నారు.
బీకేవీకి ‘అమరావతి–బెంగుళూరు కారిడార్’ పేరు పెట్టాలని విజ్ఞప్తి
ఈ సందర్భంగా సీఎం చంద్రబాబు మాట్లాడుతూ, కేంద్ర మంత్రి నితిన్ గడ్కరీ పనితీరు, వేగం దేశవ్యాప్తంగా ప్రశంసనీయమని పేర్కొన్నారు. అత్యంత పొడవైన బిటుమిన్ కాంక్రీట్‌తో కూడిన 6 లేన్ల జాతీయ రహదారిని వేగంగా నిర్మించి గిన్నీస్ రికార్డు సాధించడం అభినందనీయమన్నారు. నిరంతరాయంగా 10,655 మెట్రిక్ టన్నుల బిటుమిన్ కాంక్రీట్ వేయడం ద్వారా మరో ప్రపంచ రికార్డు నెలకొల్పినట్లు తెలిపారు.
జనవరి 6 నుంచి 11 వరకు 52 కిలోమీటర్ల మేర 6 లేన్ రహదారి, అలాగే 84.4 కిలోమీటర్ల నాలుగు లేన్ల రహదారి నిర్మాణంలోనూ రికార్డులు తిరగరాశారని చెప్పారు. గ్రీన్‌ఫీల్డ్ ఎక్స్‌ప్రెస్‌వేలను వేగంగా చేపడుతూ 10 వేల కిలోమీటర్ల లక్ష్యంతో ముందుకెళ్తున్నామని పేర్కొన్నారు. అమరావతి నుంచి బెంగుళూరు వరకు నేరుగా రహదారి నిర్మాణ నిర్ణయాన్ని గుర్తు చేస్తూ, కొత్తగా నిర్మిస్తున్న కారిడార్‌కు ‘అమరావతి–బెంగుళూరు రోడ్ (బీకేవీ)’ అనే పేరు పెట్టాలని కేంద్రానికి విజ్ఞప్తి చేశారు. ఈ విజయానికి తోడ్పడిన అధికార బృందాలు, సంస్థలకు సీఎం అభినందనలు తెలిపారు.
నాణ్యతతో రాజీ లేకుండా వేగవంతమైన నిర్మాణం: గడ్కరీ
కేంద్రమంత్రి నితిన్ గడ్కరీ మాట్లాడుతూ, భగవాన్ సత్యసాయి ఆశీర్వాదంతో బెంగుళూరు–విజయవాడ కారిడార్‌లో నాలుగు గిన్నీస్ వరల్డ్ రికార్డులు సాధించడం సాధ్యమైందన్నారు. ఎక్కడా నాణ్యతకు రాజీ పడకుండా, ఆవిష్కరణలు, సాంకేతికతతో జాతీయ రహదారుల నిర్మాణం కొనసాగుతోందని చెప్పారు. వరిగడ్డి ద్వారా బిటుమిన్ తయారీ వంటి కొత్త ఆవిష్కరణలను ఏపీ కూడా వినియోగించుకోవాలని సూచించారు.
పర్యావరణ పరిరక్షణతో పాటు కాలుష్యరహిత విధానాలు అవలంబించాల్సిన అవసరం ఉందన్నారు. నైపుణ్యం, ఆవిష్కరణలు వ్యయాన్ని తగ్గించి నాణ్యతను పెంచుతాయని స్పష్టం చేశారు.
చంద్రబాబు విజన్‌తో వేగంగా అభివృద్ధి
ఏపీలో సీఎం చంద్రబాబు నాయకత్వంలో జాతీయ రహదారుల ప్రాజెక్టులకు పూర్తి సహకారం లభిస్తున్నదని గడ్కరీ పేర్కొన్నారు. భారత్ అత్యంత వేగంగా ఎదుగుతున్న ఆర్థిక వ్యవస్థగా మారుతున్న తరుణంలో రవాణా, లాజిస్టిక్స్ వ్యయాన్ని తగ్గించాల్సిన అవసరం ఉందన్నారు. బెంగుళూరు–విజయవాడ మార్గంలో ప్రయాణ సమయం గణనీయంగా తగ్గి ఆర్థిక కార్యకలాపాలు పెరుగుతాయని తెలిపారు. సీఎం చంద్రబాబు ప్రతిపాదనలకు కేంద్రం ఎప్పుడూ సానుకూలంగానే ఉంటుందని, ఆయన జీవితాన్ని ప్రజా శ్రేయస్సు, రాష్ట్ర అభివృద్ధికే అంకితం చేశారని ప్రశంసించారు.
ఇవీ చదవండి: 256 KM Straight Road: సౌదీలో అద్భుతమైన రహదారి.. ఒక్క మలుపూ లేకుండా 256 కి.మీ. హైవే
Pawan Kalyan : తీర ప్రాంత అడవుల రక్షణకు యుద్ధప్రాతిపదికన చర్యలు.. గ్రేట్ గ్రీన్ వాల్, 50% గ్రీన్ కవర్ లక్ష్యాలపై ఉప ముఖ్యమంత్రి పవన్ కళ్యాణ్ ఆదేశాలు
