RK Roja: టాలీవుడ్లో ఒకప్పుడు స్టార్ హీరోయిన్గా తనకంటూ ప్రత్యేక గుర్తింపు తెచ్చుకున్న ఆర్కే రోజా.. ఆ తర్వాత రాజకీయాల్లోనూ తనదైన ముద్ర వేసిన సంగతి తెలిసిందే. సినీ, రాజకీయ రంగాల్లో ఎన్నో ఒడిదొడుకులను ఎదుర్కొన్న రోజా.. తన సుదీర్ఘ ప్రయాణానికి సంబంధించిన అనేక ఆసక్తికర విషయాలను తాజాగా ఓ ఇంటర్వ్యూలో పంచుకున్నారు. కెరీర్లో ఎదురైన ఫెయిల్యూర్స్, రాజకీయాల్లో తొలి ఓటమి, స్టార్ హీరోలతో కలిసి పనిచేసిన అనుభవాలు, చిరంజీవితో తన తొలి డాన్స్ షాట్, చిన్నప్పుడు రామ్ చరణ్ చేసిన అల్లరి వంటి ఎన్నో జ్ఞాపకాలను ఆమె గుర్తు చేసుకున్నారు. ముఖ్యంగా తన జీవితంలో ఎదురైన పరాజయాలను ఓటమిగా కాకుండా.. ముందుకు సాగేందుకు వచ్చిన అవకాశాలుగా భావించానని రోజా చెప్పడం ఆసక్తికరంగా మారింది.
ఫ్లాప్ సినిమా అయినా.. తొలి ఎన్నికల్లో ఓడినా వెనక్కి తగ్గలేదు
సినీ కెరీర్ ప్రారంభంలో వచ్చిన ప్రేమ తపస్సు వంటి సినిమాలు ఆశించిన ఫలితాలను ఇవ్వలేదని రోజా గుర్తు చేసుకున్నారు. అయితే సినిమా ఫ్లాప్ కావడాన్ని తన వ్యక్తిగత వైఫల్యంగా ఎప్పుడూ భావించలేదని తెలిపారు. అలాగే రాజకీయాల్లో తొలిసారి ఎమ్మెల్యేగా పోటీ చేసి ఓడిపోయిన సందర్భం కూడా తనను మరింత బలంగా మార్చిందని చెప్పారు. ఎవరో చేసిన తప్పులకు తనను బాధ్యురాలిని చేస్తే దాన్ని ఫెయిల్యూర్గా అంగీకరించనని ఆమె స్పష్టం చేశారు. కష్టపడి పనిచేసి తనను తాను నిరూపించుకున్నానని, ప్రజల నమ్మకాన్ని సంపాదించుకోవడం ద్వారానే రాజకీయంగా ముందుకు సాగానని పేర్కొన్నారు. ఓడినా, గెలిచినా రెండింటినీ సమానంగా స్వీకరించి ముందుకు వెళ్లాలనే ఆలోచన తనకు ఎప్పుడూ ఉందని రోజా తెలిపారు.
మంత్రి అయిన తర్వాత వెంకటేష్ చెప్పిన మాట
తన సినీ ప్రయాణంలో వెంకటేష్తో ఉన్న అనుబంధాన్ని కూడా రోజా గుర్తు చేసుకున్నారు. రాజకీయాల్లో ఉన్నత స్థాయికి చేరుకున్న తర్వాత వెంకటేష్ను కలిసిన సమయంలో ఆయన తనతో చెప్పిన మాటలను ఆమె ప్రత్యేకంగా ప్రస్తావించారు. రాజకీయాల్లో చాలా కష్టపడ్డావని, ఆ స్థాయికి చేరుకోవడానికి నువ్వు అర్హురాలివని వెంకటేష్ తనను అభినందించారని రోజా తెలిపారు. రామానాయుడు రాజకీయాల్లో పోటీ చేసిన సమయంలో ప్రచారానికి వెళ్లినప్పటి నుంచే వెంకటేష్తో పరిచయం ఏర్పడిందని చెప్పారు. షూటింగ్ సమయంలో వెంకటేష్ స్వభావం కొంచెం రిజర్వ్డ్గా ఉంటుందని, అందరినీ పిలిచి కబుర్లు చెప్పే వ్యక్తిత్వం ఆయనది కాదని రోజా వివరించారు.
బాలకృష్ణ సెట్స్లో మాత్రం ఫుల్ సందడే!
వెంకటేష్తో పోలిస్తే బాలకృష్ణ పూర్తిగా భిన్నమైన స్వభావం కలిగిన వ్యక్తి అని రోజా తెలిపారు. షూటింగ్ సెట్స్లో అందరినీ దగ్గరకు పిలిచి కూర్చోబెట్టడం, కబుర్లు చెప్పడం, పాటలు పాడటం, పద్యాలు చెప్పడం ఆయనకు అలవాటని గుర్తు చేసుకున్నారు. షూటింగ్ జరుగుతున్న ప్రదేశం కూడా బాలకృష్ణ ఉన్నప్పుడు మరింత సందడిగా మారుతుందని రోజా చెప్పుకొచ్చారు. ఆయనలో ఉన్న జూవియల్ నేచర్ కారణంగా యూనిట్ సభ్యులతో కూడా సులభంగా కలిసిపోతారని వివరించారు.
నాగార్జున వద్ద హీరోయిన్లకు ప్రత్యేక క్రేజ్?
నాగార్జున గురించి మాట్లాడుతూ రోజా ఆసక్తికర వ్యాఖ్యలు చేశారు. నాగార్జున అంటే హీరోయిన్లందరికీ ప్రత్యేకమైన క్రేజ్ ఉండేదని అన్నారు. ఆయన ఎక్కడ కూర్చున్నా వెతుక్కుంటూ వెళ్లి పక్కన కూర్చుని మాట్లాడాలని అనిపించేంత కూల్ వ్యక్తిత్వం ఆయనదని చెప్పారు. నాగార్జున చాలా డిగ్నిఫైడ్గా ఉంటారని, తనతో పనిచేసే వారిని ఎప్పుడూ బాధపెట్టే స్వభావం ఆయనకు లేదని తెలిపారు. ముఖ్యంగా సినిమాలో హీరోకే ఎక్కువ డైలాగులు ఉండాలి, ఎక్కువ హైలైట్ కావాలి అనే ఆలోచనతో వ్యవహరించరని రోజా పేర్కొన్నారు.
చిరంజీవితో తొలి డాన్స్ షాట్.. నేర్చుకో అమ్మా అంటూ ప్రోత్సాహం
రోజా సినీ ప్రయాణంలో చిరంజీవికి ప్రత్యేక స్థానం ఉందని ఆమె మాటల ద్వారా అర్థమవుతోంది. తన తొలి చిత్రం ముఠా మేస్త్రిలో తొలి డాన్స్ షాట్ చిరంజీవితోనే చేశానని రోజా గుర్తు చేసుకున్నారు. అప్పటికి డాన్స్పై పూర్తి స్థాయి పట్టు లేకపోవడంతో పలుమార్లు షాట్ రిపీట్ చేయాల్సి వచ్చిందని చెప్పారు. దీంతో చిరంజీవి విసుగు చెందుతారని యూనిట్ సభ్యులు తనను భయపెట్టారని అన్నారు. కానీ చిరంజీవి మాత్రం ఎంతో ఓపికగా, సహనంతో వ్యవహరించారని రోజా తెలిపారు. నేర్చుకో అమ్మా అంటూ ప్రోత్సహించారని, ఎక్కడా చిరాకు చూపించలేదని గుర్తు చేసుకున్నారు. అలాగే భైరవ ద్వీపం సినిమా సమయంలో క్వీన్ గెటప్లో తాను చాలా బాగుంటానని చిరంజీవి చెప్పినట్లు రోజా తెలిపారు. ఆ సినిమాలోని పాత్ర కోసం తనకు మాత్రమే స్క్రీన్ టెస్ట్ నిర్వహించలేదని కూడా ఆమె స్పష్టం చేశారు.
కృష్ణ డాన్స్ కాన్ఫిడెన్స్ చూసి ఆశ్చర్యపోయేదాన్ని
సూపర్ స్టార్ కృష్ణకు చిన్నప్పటి నుంచే తాను పెద్ద అభిమానినని రోజా తెలిపారు. ఆయన సినిమాలను ఫస్ట్ డే ఫస్ట్ షో చూసేందుకు ప్రయత్నించేదాన్నని గుర్తు చేసుకున్నారు. కృష్ణతో కలిసి తెలుగు వీర లేవరా సినిమాలో నటించే అవకాశం రావడం తనకు ప్రత్యేక అనుభవమని చెప్పారు. ముఖ్యంగా డాన్స్ విషయంలో కృష్ణ చూపించే కాన్ఫిడెన్స్ తనను ఎంతగానో ఆకట్టుకుందని పేర్కొన్నారు. డాన్స్ మాస్టర్ ముందుగా మూమెంట్స్ చూడాలని అడిగినా, అమ్మాయికి నేర్పించండి అంటూ కృష్ణ చెప్పేవారని రోజా గుర్తు చేసుకున్నారు. రోజా డాన్స్ స్టెప్స్ నేర్చుకున్న తర్వాత కృష్ణ వచ్చి చూసి ఒకే టేక్లో పూర్తి చేసేవారని తెలిపారు.
ప్రభుదేవాతో డాన్స్ అంటే పోటీ పడాలనిపించేది
డాన్స్ విషయానికి వస్తే ప్రభుదేవాతో కలిసి పనిచేసిన అనుభవం కూడా రోజాకు ప్రత్యేకమైనదే. ఆయనతో కలిసి డాన్స్ చేయడం తనకు చాలా ఇష్టమని చెప్పారు. ప్రభుదేవా వంటి అద్భుతమైన డ్యాన్సర్తో స్క్రీన్ షేర్ చేసుకున్నప్పుడు సహజంగానే తనను తాను మరింత మెరుగుపరుచుకోవాలనే తపన కలిగేదని రోజా తెలిపారు. ఆయనతో కలిసి డాన్స్ చేస్తున్నప్పుడు పోటీ పడి మరింత బాగా చేయాలనిపించేదని చెప్పారు.
మహేష్ బాబు చైల్డ్ ఆర్టిస్ట్గా వచ్చిన రోజులు
కృష్ణతో కలిసి పనిచేసిన రోజుల్లో మహేష్ బాబు చైల్డ్ ఆర్టిస్ట్గా సెట్స్కు వచ్చేవారని రోజా గుర్తు చేసుకున్నారు. తన మేకప్ మాన్ పట్టాభి అప్పట్లో తనతో పనిచేసేవారని, తర్వాత మహేష్ బాబు హీరోగా ఎదిగిన తర్వాత ఆయన వద్ద కూడా పనిచేయడానికి వెళ్లారని చెప్పారు. తన తరం స్టార్ హీరోలలో దాదాపు అందరితో కలిసి నటించే అవకాశం వచ్చిందని రోజా తెలిపారు. ప్రస్తుతం ఉన్న కొత్త తరం హీరోలతో నటించలేదనే బాధ తనకు లేదని స్పష్టం చేశారు. భవిష్యత్తులో తనకు ఎలాంటి పాత్రలు వస్తాయో చూడాలని ఉందంటూ రోజా నవ్వుతూ వ్యాఖ్యానించారు.
రామ్ చరణ్ చిన్నప్పటి అల్లరి.. RRR చూసి గర్వపడ్డ రోజా
రామ్ చరణ్ గురించి రోజా చెప్పిన విషయాలు ఈ ఇంటర్వ్యూలో ప్రత్యేక ఆకర్షణగా నిలిచాయి. చిన్నప్పుడు తాము చరణ్ను ఎత్తుకుని పెంచామని, ముఠా మేస్త్రి సినిమా షూటింగ్ సమయంలో ఊటీకి వచ్చినప్పుడు ఆయన ఎంతో అల్లరి చేసేవాడని గుర్తు చేసుకున్నారు. ఆ తర్వాత ఊటీ స్కూల్లో చేరిన తర్వాత రామ్ చరణ్లో మార్పు వచ్చి చాలా సైలెంట్ అయ్యాడని చెప్పారు. చిన్నప్పుడు చిరంజీవి డాన్స్ చేస్తుంటే రామ్ చరణ్ కూడా అదే పాటలకు డాన్స్ చేసేవాడని తెలిపారు.
ప్రస్తుతం రామ్ చరణ్ను ప్రపంచవ్యాప్తంగా గుర్తింపు పొందిన నటుడిగా చూస్తుంటే ఎంతో గర్వంగా అనిపిస్తుందని రోజా పేర్కొన్నారు. ముఖ్యంగా RRR సినిమా చూసినప్పుడు చరణ్పై ప్రత్యేకమైన గర్వం కలిగిందని అన్నారు. చిన్నప్పుడు తండ్రి చిరంజీవి డాన్స్ను అనుకరించిన రామ్ చరణ్లో ఇప్పుడు కూడా అదే డాన్స్ గ్రేస్ కనిపిస్తుందని ఆమె వ్యాఖ్యానించారు.
రోజా ప్రయాణం వెనుక ఉన్న పట్టుదల
హీరోయిన్గా కెరీర్ ప్రారంభించి, తెలుగు ప్రేక్షకులకు అనేక గుర్తుండిపోయే పాత్రలను అందించిన రోజా.. తర్వాత రాజకీయాల్లోకి అడుగుపెట్టి తనకంటూ ప్రత్యేకమైన ప్రస్థానాన్ని నిర్మించుకున్నారు. ఈ రెండు రంగాల్లోనూ ఎదురైన ఒడిదొడుకులు, విజయాలు, పరాజయాలు తనను మరింత బలమైన వ్యక్తిగా మార్చాయని ఆమె మాటల ద్వారా తెలుస్తోంది. సినీ ప్రపంచంలోని అగ్ర హీరోలతో కలిసి పనిచేసిన జ్ఞాపకాలు ఒకవైపు.. రాజకీయాల్లో ప్రజల నమ్మకాన్ని సంపాదించేందుకు చేసిన పోరాటం మరోవైపు.. రోజా జీవిత ప్రయాణాన్ని ప్రత్యేకంగా నిలబెట్టాయి. చిరంజీవి దగ్గర తొలి డాన్స్ షాట్ నేర్చుకున్న రోజులు నుంచి, చిన్నప్పుడు తన కళ్లముందు అల్లరి చేసిన రామ్ చరణ్ను అంతర్జాతీయ స్థాయిలో గుర్తింపు పొందిన నటుడిగా చూసే వరకు.. ఆమె ప్రయాణంలో ఎన్నో అరుదైన జ్ఞాపకాలు దాగి ఉన్నాయి.
Read also: Roja Selvamani: జీ తెలుగులో ‘ది ఫ్యామిలీ అసెంబ్లీ’.. హోస్ట్గా రోజా, సమ్మర్ ఎంటర్టైన్మెంట్కు శ్రీకారం
RK Roja: రోజా కుమార్తెకు మరో ప్రతిష్టాత్మక అవార్డు.. ఫొటోలు వైరల్
RK Roja: అత్యాచారాలు జరుగుతుంటే ప్రభుత్వం చోద్యం చూస్తోంది