Heatwave: దేశవ్యాప్తంగా ఎండల తీవ్రత రోజురోజుకీ పెరుగుతోంది. ఉత్తర భారతదేశం నుంచి దక్షిణాది రాష్ట్రాల వరకు వడగాలులు ప్రజలను ఉక్కిరిబిక్కిరి చేస్తున్నాయి. భారత వాతావరణ శాఖ (IMD) తాజా అంచనాల ప్రకారం రాబోయే ఆరు రోజుల పాటు పలు రాష్ట్రాల్లో తీవ్రమైన హీట్వేవ్ పరిస్థితులు కొనసాగనున్నాయి. ముఖ్యంగా ఆంధ్రప్రదేశ్, తెలంగాణ, ఢిల్లీ, రాజస్థాన్, ఉత్తరప్రదేశ్, మధ్యప్రదేశ్, పంజాబ్ వంటి రాష్ట్రాలకు హెచ్చరికలు జారీ అయ్యాయి.
బలూచిస్తాన్, రాజస్థాన్లోని థార్ ఎడారి ప్రాంతాల నుంచి వీస్తున్న వేడి గాలుల ప్రభావంతో దేశవ్యాప్తంగా ఉష్ణోగ్రతలు సాధారణం కంటే 3 నుంచి 6 డిగ్రీల వరకు అధికంగా నమోదవుతున్నాయి. ఉదయం నుంచే మండే ఎండలు, మధ్యాహ్నం వేడి గాలులతో ప్రజలు తీవ్ర ఇబ్బందులు పడుతున్నారు. అవసరం ఉంటే తప్ప బయటకు వెళ్లేందుకు కూడా ప్రజలు భయపడే పరిస్థితి నెలకొంది.
తెలంగాణలో హీట్వేవ్ తీవ్రత
తెలంగాణలో పరిస్థితి మరింత ఆందోళనకరంగా మారింది. ఆదిలాబాద్, జగిత్యాల, కామారెడ్డి, కరీంనగర్, కొమరం భీమ్, మంచిర్యాల, నల్గొండ, నిర్మల్, నిజామాబాద్, పెద్దపల్లి, రాజన్న సిరిసిల్ల, సూర్యాపేట జిల్లాల్లో మరో మూడు రోజుల పాటు రెడ్ అలర్ట్ కొనసాగుతోంది. వాతావరణ శాఖ ప్రకారం ఉత్తర, తూర్పు తెలంగాణ జిల్లాల్లో 45 డిగ్రీల సెల్సియస్కు పైగా ఉష్ణోగ్రతలు నమోదయ్యే అవకాశం ఉంది. ఖమ్మం, వరంగల్, హనుమకొండ, నల్గొండ, సూర్యాపేట జిల్లాల్లో ఉష్ణోగ్రతలు 45 డిగ్రీలు దాటవచ్చని అంచనా వేస్తున్నారు.
రామగుండంలో 44.6°C, నిజామాబాద్లో 44.4°C, ఆదిలాబాద్లో 44.3°C వరకు ఉష్ణోగ్రతలు నమోదయ్యే అవకాశం ఉందని అధికారులు తెలిపారు. హైదరాబాద్లో ఉష్ణోగ్రత 39.5°C వద్ద ఉన్నప్పటికీ ఉక్కపోత తీవ్రంగా ఉంది. మరో రెండు రోజుల పాటు ఉష్ణోగ్రతలు 1-2 డిగ్రీలు పెరిగే అవకాశం ఉందని IMD హెచ్చరించింది.
ఇక దక్షిణ తెలంగాణ జిల్లాల్లో ఉరుములు, మెరుపులు, గంటకు 40-50 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది. మే 24 వరకు రాష్ట్రవ్యాప్తంగా మిశ్రమ వాతావరణ పరిస్థితులు కొనసాగనున్నాయి.
ఏపీలో 47 డిగ్రీల వరకు ఉష్ణోగ్రతలు
ఆంధ్రప్రదేశ్లో కూడా ఎండల ప్రభావం తీవ్రంగా కనిపిస్తోంది. రానున్న నాలుగు రోజుల పాటు ఉష్ణోగ్రతలు మరింత పెరిగే అవకాశం ఉందని వాతావరణ శాఖ వెల్లడించింది. పలు జిల్లాలకు రెడ్ అలర్ట్, ఎల్లో అలర్ట్లు జారీ అయ్యాయి. పార్వతీపురం మన్యం, అల్లూరి సీతారామరాజు, పోలవరం, అనకాపల్లి, కాకినాడ, కోనసీమ, తూర్పుగోదావరి, పశ్చిమగోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, ప్రకాశం జిల్లాల్లో కొన్ని ప్రాంతాల్లో 45 నుంచి 47 డిగ్రీల వరకు ఉష్ణోగ్రతలు నమోదయ్యే అవకాశం ఉంది.
విజయనగరం, మార్కాపురం ప్రాంతాల్లో 44-45 డిగ్రీలు నమోదవుతాయని అంచనా. ఇక శ్రీకాకుళం, విశాఖపట్నం, నెల్లూరు, కర్నూలు, నంద్యాల, అనంతపురం, శ్రీసత్యసాయి, వైఎస్సార్ కడప, అన్నమయ్య, చిత్తూరు, తిరుపతి జిల్లాల్లో 40 నుంచి 43 డిగ్రీల వరకు ఉష్ణోగ్రతలు నమోదయ్యే అవకాశం ఉందని అధికారులు తెలిపారు.
ఢిల్లీలో ఆరెంజ్ అలర్ట్
దేశ రాజధాని ఢిల్లీలో కూడా హీట్వేవ్ తీవ్రత పెరిగింది. మే 26 వరకు ఆరెంజ్ అలర్ట్ జారీ చేసిన IMD, గరిష్ట ఉష్ణోగ్రతలు 45 నుంచి 47 డిగ్రీల మధ్య నమోదవుతాయని అంచనా వేసింది. కనిష్ట ఉష్ణోగ్రతలు కూడా 27 నుంచి 29 డిగ్రీల మధ్య ఉండనున్నాయి. నిన్న ఢిల్లీలోని ముంగేష్పూర్ ప్రాంతంలో 46.3°C గరిష్ట ఉష్ణోగ్రత నమోదైంది. 2024లో ఇదే ప్రాంతంలో 50 డిగ్రీలకు పైగా ఉష్ణోగ్రత నమోదైన విషయం గుర్తుచేస్తోంది. రాత్రి వేళల్లో కూడా వేడి తగ్గకపోవడంతో ప్రజలు తీవ్ర అసౌకర్యానికి గురవుతున్నారు.
దేశంలో నమోదైన అత్యధిక ఉష్ణోగ్రతలు
బుధవారం దేశవ్యాప్తంగా నమోదైన గరిష్ట ఉష్ణోగ్రతలు ఇలా ఉన్నాయి:
బండా (తూర్పు ఉత్తరప్రదేశ్) – 48.0°C
ఖజురహో (తూర్పు మధ్యప్రదేశ్) – 47.4°C
వార్ధా (విదర్భ) – 47.1°C
రోహ్తక్ (హర్యానా) – 46.9°C
నాగపూర్ – 46.6°C
శ్రీగంగానగర్ – 46.5°C
చంద్రపూర్ – 46.2°C
ఝార్సుగూడ – 46.0°C
ఝాన్సీ – 45.9°C
ప్రజలకు వైద్యులు, వాతావరణ శాఖ సూచనలు
వడగాలుల తీవ్రత పెరుగుతున్న నేపథ్యంలో ప్రజలు అత్యంత అప్రమత్తంగా ఉండాలని అధికారులు సూచిస్తున్నారు. ముఖ్యంగా మధ్యాహ్నం 12 గంటల నుంచి సాయంత్రం 4 గంటల వరకు ఎండలో బయటకు వెళ్లకుండా ఉండాలని హెచ్చరిస్తున్నారు. పిల్లలు, వృద్ధులు, గర్భిణీలు, దీర్ఘకాలిక ఆరోగ్య సమస్యలు ఉన్నవారు, బయట పనులు చేసే కార్మికులు ప్రత్యేక జాగ్రత్తలు తీసుకోవాలని సూచిస్తున్నారు.
తీసుకోవాల్సిన జాగ్రత్తలు:
తరచుగా మంచినీరు తాగాలి
మజ్జిగ, కొబ్బరినీరు, ORS, ఎలక్ట్రాల్, బార్లీ వాటర్ తీసుకోవాలి
లైట్ కలర్, కాటన్ దుస్తులు ధరించాలి
ఎండలో బయటకు వెళ్లేటప్పుడు టోపీ, గాగుల్స్ ఉపయోగించాలి
పిల్లలను వాహనాల్లో ఒంటరిగా వదిలిపెట్టకూడదు
హీట్ స్ట్రోక్ లక్షణాలు కనిపిస్తే వెంటనే వైద్యులను సంప్రదించాలి
ప్రస్తుతం దేశవ్యాప్తంగా వాతావరణ పరిస్థితులు ఆందోళనకరంగా మారుతున్న నేపథ్యంలో ప్రజలు అప్రమత్తంగా ఉండటం అత్యంత అవసరమని అధికారులు సూచిస్తున్నారు.
ఇవీ చదవండి: Heatwave AP: ఏపీలో ఎండ తీవ్రత పెరుగుతోంది.. 227 మండలాల్లో హీట్ అలర్ట్, కొన్ని జిల్లాల్లో పిడుగులతో వర్ష సూచన
Heatwave: మండుతున్న ఎండలు.. మధ్యాహ్నం బయటకు రావొద్దని హెచ్చరికలు