Rythu Bharosa: తెలంగాణలో యాసంగి సీజన్ ప్రారంభమవడంతో రైతులు పెట్టుబడి సాయంపై ఆశగా ఎదురుచూస్తున్నారు. ముఖ్యంగా రైతు భరోసా నిధులు ఎప్పుడు జమ అవుతాయనే అంశంపై స్పష్టత లేకపోవడంతో రైతుల్లో ఆందోళన నెలకొంది. సంక్రాంతి నాటికి డబ్బులు వస్తాయన్న అంచనాలు ఉన్నప్పటికీ, కొన్ని కారణాల వల్ల నిధుల విడుదలకు కాస్త ఆలస్యం అవుతోంది.
శాటిలైట్ సర్వే కారణంగా జాప్యం
రైతు భరోసా పథకాన్ని కేవలం పంట సాగు చేస్తున్న భూములకు మాత్రమే వర్తింపజేయాలని ప్రభుత్వం నిర్ణయించింది. ఈ మేరకు శాటిలైట్ సర్వే ఆధారంగా సాగులో ఉన్న భూములను గుర్తించే ప్రక్రియ కొనసాగుతోంది. అయితే, ఈ సర్వేకు సంబంధించిన పూర్తి నివేదిక ఇంకా అందలేదు. దీంతో రైతు భరోసా నిధుల విడుదల ప్రక్రియలో జాప్యం జరిగినట్లు అధికార వర్గాలు చెబుతున్నాయి.
ఈ నెలాఖరులోగా నిధులు
రైతు భరోసా నిధుల విడుదలపై ముదిరెడ్డి కోదండరెడ్డి కీలక ప్రకటన చేశారు. జనవరి నెలాఖరులోగా రైతుల ఖాతాల్లో రైతు భరోసా డబ్బులు జమ చేస్తామని ఆయన స్పష్టం చేశారు. యాచారం మండల కేంద్రంలో నిర్వహించిన రైతు వేదిక కార్యక్రమంలో పాల్గొన్న ఆయన, రైతులకు త్వరలో సబ్సిడీపై వ్యవసాయ పనిముట్లు పంపిణీ చేస్తామని తెలిపారు.
అలాగే, నీటి వినియోగం తక్కువగా ఉండే పంటల సాగుపై రైతులు దృష్టి పెట్టాలని సూచించారు. ప్రయోగాత్మకంగా మూడు గ్రామాల్లో చేపట్టిన కూరగాయల సాగు మంచి ఫలితాలు ఇచ్చిందని, ఈ విధానాన్ని ఇతర రైతులు కూడా అనుసరించాలని పేర్కొన్నారు.
ఈ రైతులకు రైతు భరోసా ఉండదు?
ప్రభుత్వ తాజా నిర్ణయం ప్రకారం, వ్యవసాయానికి అనుకూలంగా లేని భూములకు రైతు భరోసా అందించబోమని స్పష్టం చేసింది. గతంలో అన్ని రకాల భూములకు పెట్టుబడి సాయం ఇచ్చినప్పటికీ, ఇకపై నిజంగా సాగు చేస్తున్న రైతులకు మాత్రమే ప్రయోజనం చేకూరేలా చర్యలు తీసుకుంటున్నట్లు ప్రభుత్వం చెబుతోంది.
ఈ ప్రక్రియలో భాగంగా వ్యవసాయ యూనివర్సిటీ సహకారంతో శాటిలైట్ సర్వే నిర్వహించి, సాగులో ఉన్న భూములను గుర్తించి, అర్హులైన రైతులకే రైతు భరోసా నిధులు జమ చేయనున్నారు.
ఇవీ చదవండి: Rythu Bharosa: తెలంగాణలో అన్నదాతలకు శుభవార్త.. సంక్రాంతికి ముందే రైతు భరోసా నిధుల జమకు ప్రభుత్వం గ్రీన్ సిగ్నల్
YSR Raithu Bharosa PM Kisan: బాబు మేనిఫెస్టో కర్ణాటకలో పుట్టింది.. రైతు భరోసా నిధుల విడుదలలో జగన్