Alcohol Consumption: ఈ మధ్యకాలంలో మద్యం వినియోగం ఆందోళనకర స్థాయిలో పెరుగుతోంది. ఒకప్పుడు 30–40 ఏళ్ల వయస్సు వారికే పరిమితమైన ఈ అలవాటు, ఇప్పుడు యువతనే కాదు… స్కూల్ వయస్సు పిల్లల వరకు విస్తరిస్తోంది. దీని ప్రభావంతో అనేక ఆరోగ్య సమస్యలు, కుటుంబ విభేదాలు, సామాజిక సమస్యలు పెరుగుతున్నాయి.
అయితే చాలామంది “మేం రోజూ కాదు… అప్పుడప్పుడు మాత్రమే తాగుతాం”, “తక్కువ మోతాదులో తాగితే ఎలాంటి సమస్య ఉండదు” అని భావిస్తుంటారు. కానీ తాజా శాస్త్రీయ అధ్యయనాలు ఈ ఆలోచన పూర్తిగా తప్పని తేల్చి చెబుతున్నాయి.
🍺 మద్యానికి సురక్షిత మోతాదు లేదట!
మద్యం ఒకసారి అలవాటయ్యాక మానుకోవడం చాలా కష్టమవుతుంది. ఈ ఒక్క అలవాటు వల్ల ఎన్నో జీవితాలు నాశనం అవుతున్నాయి. అయినా సరే, “లిమిట్లో తాగితే సేఫ్” అనే అపోహ చాలా మందిలో ఉంది. కానీ తాజా పరిశోధనల ప్రకారం మద్యానికి సురక్షిత మోతాదు అనే భావనే తప్పు.
బీర్, విస్కీ, వైన్, కల్లు, నాటుసారా—ఏ రూపంలో మద్యం తీసుకున్నా నోటి క్యాన్సర్ (Oral Cancer) ముప్పు పెరుగుతుందని నిపుణులు హెచ్చరిస్తున్నారు. తక్కువ మోతాదులో తీసుకున్నా కూడా అది సురక్షితం కాదని తాజా అధ్యయనాలు స్పష్టం చేస్తున్నాయి.
🔬 తాజా అధ్యయనంలో సంచలన విషయాలు
ముంబైలోని ప్రఖ్యాత Tata Memorial Centre నిర్వహించిన తాజా అధ్యయనంలో ఈ కీలక విషయాలు వెలుగులోకి వచ్చాయి. ఈ అధ్యయనం BMJ Global Health జర్నల్లో ప్రచురితమైంది.
ఈ నివేదిక ప్రకారం:
మద్యపానం నేరుగా ఓరల్ క్యాన్సర్కు దారి తీస్తుంది
మద్యం విషయంలో “సేఫ్ లిమిట్” అనేదే లేదు
రోజూ కాకుండా అప్పుడప్పుడు తాగినా ప్రమాదం తప్పదు
దీర్ఘకాలంలో ఇది నోటి క్యాన్సర్గా మారే అవకాశాలు ఎక్కువ
🚬 పొగాకు + మద్యం = అత్యంత ప్రమాదం
ఇదిలా ఉండగా, పొగాకు అలవాటు ఉన్నవారు మద్యం సేవిస్తే ప్రమాదం మరింత ఎక్కువగా ఉంటుందని అధ్యయనం హెచ్చరిస్తోంది. ఈ రెండు అలవాట్లు కలిసినప్పుడు ఓరల్ కేవిటీ క్యాన్సర్ వచ్చే ప్రమాదం సాధారణ వ్యక్తులతో పోల్చితే నాలుగు రెట్లు ఎక్కువగా ఉంటుందని నిపుణులు చెబుతున్నారు.
⚠️ దేశంలో రెండో అత్యంత ప్రమాదకర క్యాన్సర్
ఓరల్ క్యాన్సర్ మన దేశంలో అత్యంత ప్రమాదకరమైన క్యాన్సర్ల జాబితాలో రెండో స్థానంలో ఉంది. గణాంకాల ప్రకారం:
ప్రతి ఏడాది సుమారు 1,43,000 మంది ఈ వ్యాధి బారిన పడుతున్నారు
ఏటా దాదాపు 80,000 మంది ఓరల్ క్యాన్సర్ కారణంగా ప్రాణాలు కోల్పోతున్నారు
బాధితుల సంఖ్య తగ్గడం కాదు… రోజురోజుకు పెరుగుతూనే ఉంది
అయితే మద్యం నిషేధం అమలులో ఉన్న రాష్ట్రాల్లో ఈ క్యాన్సర్ ముప్పు గణనీయంగా తక్కువగా ఉందని కూడా అధ్యయనం పేర్కొంది.
“తక్కువగా తాగుతున్నాం కదా… మాకు ఏం కాదు” అనే ఆలోచన అత్యంత ప్రమాదకరం. తాజా వైద్య పరిశోధనలు స్పష్టంగా చెబుతున్న విషయం ఒక్కటే—మద్యానికి సురక్షిత పరిమాణం లేదు. ఆరోగ్యంగా జీవించాలంటే మద్యం నుంచి దూరంగా ఉండటమే ఉత్తమ మార్గం.
ఇవీ చదవండి: Andhra Pradesh: చీప్గా లిక్కర్ ఇస్తూ.. మాన్పించాలని చూస్తున్నారట!
Jaundice: పచ్చ కామెర్ల లక్షణాలు ఏంటి? మద్యం అతిగా తాగితే జాండీస్ వస్తాయా?