Koppula Eshwar: తెలంగాణలో పార్లమెంటు ఎన్నికలపై ప్రధాన పార్టీలు ఫోకస్ పెట్టాయి. ఇందులో భాగంగా ఎంపీ కేండేట్ల ఎంపికలో కసరత్తులు మొదలు పెట్టాయి. ఈసారి ఎంపీ ఎన్నికల్లో కాంగ్రెస్ను మట్టికరిపించాలని బీఆర్ఎస్ అధినేత కేసీఆర్ ప్లాన్ చేస్తున్నారు. ఇటీవలే కోలుకుంటున్న ఆయన.. పార్టీ శ్రేణులతో సమావేశాలు నిర్వహిస్తున్నారు. అసెంబ్లీలో అనుసరించాల్సిన వ్యూహాలు, పార్లమెంటు ఎన్నికల సందర్బంగా కాంగ్రెస్ వైఫల్యాలను ఎండగట్టడానికి ప్రణాళికలు రచిస్తున్నారు. Koppula Eshwar
పెద్దపల్లి పార్లమెంట్ స్థానానికి బీఆర్ఎస్ నుంచి మాజీ మంత్రి కొప్పుల ఈశ్వర్ పోటీ చేయనున్నారని తెలుస్తోంది. గత కొన్ని రోజులుగా పార్లమెంటు బరిలో కారు పార్టీ నుంచి మాజీ మంత్రి కొప్పుల ఈశ్వర్, మాజీ ప్రభుత్వ విప్ బాల్క సుమన్ లలో ఎవరో ఒకరు పోటీ చేస్తారని విస్తృతంగా ప్రచారం జరుగుతోంది. ఈ నేపథ్యంలో ఈ అంశంపై ఇప్పుడు జోరుగా చర్చ సాగుతోంది.
ప్రస్తుత ఎంపీ బోర్లకుంట వెంకటేష్ నేత కాంగ్రెస్ పార్టీలో చేరిన సంగతి తెలిసిందే. దీంతో బీఆర్ఎస్ అధినేత కేసీఆర్ మాజీ మంత్రి కొప్పుల ఈశ్వర్ ను బరిలో దించాలని నిర్ణయించినట్లు సమాచారం. పెద్దపల్లి ఎంపీ స్థానానికి పోటీ చేసేందుకు సిద్ధంగా ఉండాలని అధినేత కేసీఆర్ కొప్పుల ఈశ్వర్ కు సమాచారం అందించారని తెలుస్తోంది. సీపీఐ ఎంఎల్ నుంచి టీడీపీలో చేరిన అనంతరం కొప్పుల ఈశ్వర్ మొదటి సారిగా 1994లో మేడారం అసెంబ్లీ స్థానానికి పోటీ చేసి స్వల్ప తేడాతో ఓటమి చెందారు.
2001లో కేసీఆర్ తెలంగాణ రాష్ట్ర సాధన కోసం ప్రారంభించిన ఉద్యమంలో క్రియాశీలక పాత్ర పోషించిన కొప్పుల ఈశ్వర్ 2004లో మేడారం అసెంబ్లీ స్థానం నుండి మొదటిసారి ఎమ్మెల్యేగా గెలుపొందారు. 2008 మేడారం, 2009, 2010లో ధర్మపురి నుండి వరుసగా విజయం సాధించారు. ప్రత్యేక రాష్ట్ర సాధన అనంతరం 2014లో విజయం సాధించి ప్రభుత్వ చీఫ్ విప్ గా చేశారు.
2018లో ఆరోసారి ఎమ్మెల్యేగా గెలుపొందిన అనంతరం కేసీఆర్ మంత్రివర్గంలో ఎస్సీ సంక్షేమ శాఖ మంత్రిగా పనిచేశారు. విశేష రాజకీయ అనుభవంతో పాటు సింగరేణి కార్మికుల్లో మంచిపట్టున్న కొప్పుల ఈశ్వర్ ను బరిలోకి దించితే పెద్దపల్లి పార్లమెంట్ లో గులాబీ జెండా ఎగరవే యవచ్చని అధినేత కేసీఆర్ భావిస్తున్నారు.
ఈ నేపథ్యంలో ఈశ్వర్ అభ్యర్థిత్వానికి లైన్ క్లియర్ చేసినట్లు తెలిసింది. అధినేత నుంచి గ్రీన్ సిగ్నల్ రావడంతో కొప్పుల ఈశ్వర్ నూతన ఉత్సాహంతో ప్రజల్లోకి వెళ్లేందుకు సన్నద్ధమవుతున్నారు. పార్టీ కేడర్కు ఈ మేరకు సంకేతాలు పంపి.. విస్తృతంగా ప్రచార కార్యక్రమాలు నిర్వహించేలా ప్లాన్ చేస్తున్నారు.
ఇదీ చదవండి: Amit Shah at Adilabad: బీజేపీని గెలిపించి కేసీఆర్ను గద్దె దించండి : ఆదిలాబాద్ సభలో అమిత్ షా