Aadarsha Kutumbam: టాలీవుడ్లో ఒకప్పుడు ఫ్యామిలీ ఎంటర్టైనర్ సినిమాలకు ప్రత్యేకమైన క్రేజ్ ఉండేది. కుటుంబమంతా కలిసి చూసే కథలు, కామెడీ, ఎమోషన్స్తో ఎన్నో సినిమాలు ప్రేక్షకులను ఆకట్టుకున్నాయి. అయితే గత కొన్నేళ్లుగా యాక్షన్, థ్రిల్లర్, పాన్ ఇండియా కథల హవా పెరగడంతో ఫ్యామిలీ కాన్సెప్ట్ సినిమాలు తగ్గిపోయాయి. ఇలాంటి సమయంలో విక్టరీ వెంకటేశ్-త్రివిక్రమ్ కాంబినేషన్లో వస్తున్న ‘ఆదర్శ కుటుంబం’ (Aadarsha Kutumbam)పై ఆసక్తి నెలకొంది. తాజాగా వెంకటేశ్ పోషిస్తున్న ‘చిట్టిబాబు’ పాత్రను పరిచయం చేస్తూ గ్లింప్స్ విడుదల చేశారు.
భార్య చాటు భర్తగా వెంకటేశ్
‘ఆదర్శ కుటుంబం’లో వెంకటేశ్ చిట్టిబాబు అనే పాత్రలో కనిపించనున్నారు. ఇంట్లో భార్య మాటకు ఎదురు చెప్పలేని భర్తగా, కుటుంబం మధ్య నలిగిపోయే వ్యక్తిగా ఆయన పాత్రను వినోదాత్మకంగా తీర్చిదిద్దినట్లు తాజా వీడియో చూస్తే అర్థమవుతోంది. ఫ్యామిలీ కామెడీ పాత్రల్లో తనదైన టైమింగ్తో నవ్వించే వెంకటేశ్కు చిట్టిబాబు పాత్ర మరోసారి అలాంటి అవకాశాన్ని ఇచ్చినట్లు కనిపిస్తోంది. తాజాగా విడుదల చేసిన క్యారెక్టర్ గ్లింప్స్లో వెంకటేశ్ కామెడీ టైమింగ్తో పాటు బ్యాక్గ్రౌండ్ మ్యూజిక్ ఆకట్టుకుంటోంది. ముఖ్యంగా త్రివిక్రమ్ సినిమాల్లో కనిపించే కుటుంబ పరిస్థితుల నుంచి పుట్టే హాస్యం, మాటలతో నవ్వించే స్టైల్ ఈ సినిమాలోనూ ఉండబోతుందనే సంకేతాలు గ్లింప్స్ ఇచ్చింది.
త్రివిక్రమ్-వెంకటేశ్ కాంబోపై భారీ అంచనాలు
వెంకటేశ్, త్రివిక్రమ్ కలిసి సినిమా చేయాలనేది అభిమానులు చాలాకాలంగా ఎదురుచూస్తున్న కాంబినేషన్. వెంకటేశ్ కామెడీ టైమింగ్కు త్రివిక్రమ్ మాటలు తోడైతే ఫ్యామిలీ ఆడియెన్స్కు మంచి ఎంటర్టైనర్ అవుతుందనే అంచనాలు ఉన్నాయి. త్రివిక్రమ్ సినిమాల్లో కుటుంబ బంధాలు, భార్యాభర్తల మధ్య సరదా సన్నివేశాలు, ఎమోషన్స్కు ప్రత్యేక స్థానం ఉంటుంది. మరోవైపు వెంకటేశ్కు ఫ్యామిలీ ఆడియెన్స్లో ఉన్న ఆదరణ గురించి ప్రత్యేకంగా చెప్పాల్సిన అవసరం లేదు. దీంతో ‘ఆదర్శ కుటుంబం’ టైటిల్కు తగ్గట్లుగానే కుటుంబ కథను వినోదాత్మకంగా చూపించే ప్రయత్నం చేస్తున్నట్లు తెలుస్తోంది.
హీరోయిన్గా శ్రీనిధి శెట్టి
ఈ సినిమాలో వెంకటేశ్ సరసన శ్రీనిధి శెట్టి హీరోయిన్గా నటిస్తోంది. ‘KGF’ సినిమాలతో దేశవ్యాప్తంగా గుర్తింపు తెచ్చుకున్న శ్రీనిధికి ఈ సినిమా తెలుగులో కీలక ప్రాజెక్ట్గా నిలవనుంది. వెంకటేశ్-శ్రీనిధి పాత్రల మధ్య వచ్చే సన్నివేశాలు కథలో ప్రధాన ఆకర్షణగా ఉండే అవకాశముంది. మరోవైపు నారా రోహిత్ కీలక పాత్రలో నటిస్తున్నాడు. ఆయన పాత్ర కథను ఏ విధంగా మలుపు తిప్పుతుందనేది ఆసక్తికరంగా మారింది. ప్రస్తుతం వెంకటేశ్ పాత్రకు సంబంధించిన గ్లింప్స్ను విడుదల చేసిన చిత్రబృందం.. త్వరలో సినిమాలోని ఇతర ప్రధాన పాత్రలను కూడా ఒక్కొక్కటిగా పరిచయం చేయనున్నట్లు తెలుస్తోంది.
తమన్ మ్యూజిక్.. గ్లింప్స్లోనే జోష్
‘ఆదర్శ కుటుంబం’ చిత్రానికి ఎస్.ఎస్. తమన్ సంగీతం అందిస్తున్నారు. తాజాగా వచ్చిన చిట్టిబాబు క్యారెక్టర్ వీడియోలోనూ మ్యూజిక్ ప్రత్యేకంగా నిలిచింది. ఫ్యామిలీ ఎంటర్టైనర్కు సరిపోయే సరదా టోన్ను బ్యాక్గ్రౌండ్ స్కోర్తో తీసుకొచ్చే ప్రయత్నం కనిపిస్తోంది. త్రివిక్రమ్-తమన్ కాంబినేషన్లో గతంలో వచ్చిన సినిమాల పాటలు, నేపథ్య సంగీతానికి మంచి స్పందన వచ్చింది. దీంతో ‘ఆదర్శ కుటుంబం’ ఆల్బమ్పై కూడా అభిమానుల్లో అంచనాలు ఉన్నాయి.
అక్టోబర్ 2న థియేటర్లలోకి ‘ఆదర్శ కుటుంబం’
‘ఆదర్శ కుటుంబం’ సినిమాను అక్టోబర్ 2న థియేటర్లలో విడుదల చేసేందుకు మేకర్స్ సిద్ధమవుతున్నారు. దసరా హాలిడే సీజన్ను దృష్టిలో పెట్టుకుని ఫ్యామిలీ ఆడియెన్స్ను టార్గెట్ చేస్తూ ఈ రిలీజ్ డేట్ను ఎంచుకున్నట్లు కనిపిస్తోంది. వెంకటేశ్కు ఫ్యామిలీ ఎంటర్టైనర్స్ కొత్తేమీ కాదు. కామెడీతో పాటు కుటుంబ భావోద్వేగాలను పండించడంలో ఆయనకు ప్రత్యేకమైన ఇమేజ్ ఉంది. దానికి త్రివిక్రమ్ మార్క్ డైలాగ్స్, కామెడీ తోడవుతుండటంతో ‘ఆదర్శ కుటుంబం’పై ఆసక్తి పెరుగుతోంది. తాజాగా వచ్చిన చిట్టిబాబు గ్లింప్స్ ఆ అంచనాలను మరింత పెంచింది. ఇక మిగతా పాత్రల పరిచయ వీడియోలు ఎలా ఉంటాయో చూడాలి.
ఇవీ చదవండి: Venkatesh Daggubati: వెంకీమామ సింప్లిసిటీకి ఫ్యాన్స్ ఫిదా.. బెంగళూరులో సాధారణంగా టిఫిన్ చేసిన వెంకటేశ్
Prasanna Venkateswara : సెప్టెంబరులో శ్రీ ప్రసన్న వేంకటేశ్వరస్వామి ఆలయంలో విశేష ఉత్సవాలు
