Viral Video: అమెరికాలో పోలీసుల నుంచి తప్పించుకునేందుకు ఓ వ్యక్తి చేసిన ప్రయత్నం ఘోర రోడ్డు ప్రమాదానికి దారితీసింది. వేగంగా దూసుకెళ్లిన ఎస్‌యూవీ వాహనం రోడ్డు కూడలిలో భారీ ఫెడెక్స్ ట్రక్కును ఢీకొట్టింది. ఈ ప్రమాదానికి సంబంధించిన దృశ్యాలు ట్రాఫిక్ కెమెరాలో రికార్డయ్యాయి. పోలీసు వాహనాలు వెంబడిస్తుండగా జరిగిన ఈ ప్రమాదం వీడియో సోషల్ మీడియాలో వైరల్ అవుతోంది. అక్టోబర్ 28న అమెరికాలోని అయోవా రాష్ట్రం కౌన్సిల్ బ్లఫ్స్ నగరంలో ఈ ఘటన చోటుచేసుకుంది.
పోలీసులను చూసి వేగంగా దూసుకెళ్లిన డ్రైవర్!
కౌన్సిల్ బ్లఫ్స్ పోలీసుల వివరాల ప్రకారం, లింకన్ ప్రాంతంలో చోరీకి గురైన నంబర్ ప్లేట్లతో ప్రయాణిస్తున్న చెవ్రొలెట్ సబర్బన్ ఎస్‌యూవీని అధికారులు గుర్తించారు. వాహనాన్ని నిలిపివేసేందుకు ప్రయత్నించగా డ్రైవర్ ఆగకుండా వేగంగా వెళ్లిపోయాడు. దీంతో పోలీసు వాహనాలు అతడిని వెంబడించాయి. అక్టోబర్ 28న అర్ధరాత్రి దాటిన తర్వాత సుమారు 12.40 గంటలకు 24వ స్ట్రీట్, వెటరన్స్ మెమోరియల్ హైవే కూడలి వద్దకు చేరుకున్న ఎస్‌యూవీ భారీ ఫెడెక్స్ ట్రక్కును ఢీకొట్టింది.
ట్రాఫిక్ కెమెరాలో భయానక దృశ్యాలు!
ఈ ప్రమాదాన్ని అయోవా రవాణా శాఖకు చెందిన ట్రాఫిక్ కెమెరా రికార్డు చేసింది. వీడియోలో భారీ ట్రక్కు రోడ్డు కూడలి మీదుగా వెళ్తుండగా ఎస్‌యూవీ వేగంగా వచ్చి దాని ముందు భాగాన్ని ఢీకొట్టడం కనిపిస్తోంది. వెనుక పోలీసు వాహనాలు ఎమర్జెన్సీ లైట్లు వెలిగిస్తూ వస్తున్న దృశ్యాలు కూడా నమోదయ్యాయి. ఢీకొన్న ధాటికి రెండు వాహనాలు దెబ్బతిన్నాయి. ప్రముఖ అమెరికన్ మీడియా సంస్థ ఫాక్స్ న్యూస్ ఈ వీడియోను ఎక్స్‌లో షేర్ చేయడంతో ఘటన మరింత చర్చనీయాంశమైంది.
ఆసుపత్రిలో ఎస్‌యూవీ డ్రైవర్!
ప్రమాదం జరిగిన వెంటనే అత్యవసర సహాయక సిబ్బంది ఘటనాస్థలానికి చేరుకున్నారు. ఎస్‌యూవీ డ్రైవర్‌కు గాయాలు కావడంతో చికిత్స కోసం సమీపంలోని ఒమాహా నగరంలోని ఆసుపత్రికి తరలించారు. అయితే అతడికి ప్రాణాపాయం కలిగించే స్థాయిలో గాయాలు కాలేదని పోలీసులు తెలిపారు. ఫెడెక్స్ ట్రక్కు డ్రైవర్ వైద్య చికిత్స అవసరం లేదని చెప్పినట్లు వెల్లడించారు. భారీ ప్రమాదం జరిగినప్పటికీ ప్రాణనష్టం నమోదు కాకపోవడం ఊరటనిచ్చింది.
డ్రైవర్‌పై కేసులకు పోలీసుల చర్యలు!
ఈ ఘటనపై కౌన్సిల్ బ్లఫ్స్ పోలీసులు దర్యాప్తు చేపట్టారు. పోలీసుల ఆదేశాలను పట్టించుకోకుండా తప్పించుకునేందుకు ప్రయత్నించడం, నిర్లక్ష్యంగా వాహనం నడపడం వంటి అభియోగాలపై ఎస్‌యూవీ డ్రైవర్‌కు సంబంధించి అరెస్ట్ వారెంట్ల కోసం దరఖాస్తు చేసినట్లు అధికారులు వెల్లడించారు. వాహనానికి అమర్చిన చోరీ నంబర్ ప్లేట్ల వ్యవహారంపైనా దర్యాప్తు కొనసాగుతోంది. పోలీసుల నుంచి తప్పించుకునే ప్రయత్నంలో అతివేగంగా వాహనం నడపడం ఎంతటి ప్రమాదానికి దారితీస్తుందో ఈ ఘటన మరోసారి స్పష్టం చేసింది.
వైరల్ వీడియో: ఫాక్స్ న్యూస్ ఎక్స్ వీడియో చూడండి
China Viral Video: 12వ అంతస్తు కిటికీ నుంచి వేలాడిన మూడేళ్ల చిన్నారి.. ప్రాణాలు కాపాడి..
Viral Divorce Case: భార్య ‘అతి శుభ్రత’తో విసిగిపోయిన భర్త.. విడాకులతో పాటు రూ.2 కోట్ల పరిహారం కోరుతూ కోర్టుకు!
