JNVST 2027: ప్రతిష్ఠాత్మక జవహర్ నవోదయ విద్యాలయాల్లో (JNVs) 2027-28 విద్యా సంవత్సరానికి 6వ తరగతి ప్రవేశాల కోసం నిర్వహించే జవహర్ నవోదయ విద్యాలయ సెలక్షన్ టెస్ట్ (JNVST 2027) ఆన్లైన్ దరఖాస్తుల గడువు మరికొన్ని గంటల్లో ముగియనుంది. ఇప్పటి వరకు దరఖాస్తు చేసుకోని అర్హులైన విద్యార్థులు జులై 31, 2026 రాత్రి 11:59 గంటలలోపు తప్పనిసరిగా దరఖాస్తు పూర్తి చేయాలి. జవహర్ నవోదయ విద్యాలయ సమితి (NVS) ఇప్పటికే గడువు పొడిగించే అవకాశం లేదని స్పష్టం చేసింది. అందువల్ల చివరి నిమిషం వరకు వేచి ఉండకుండా వెంటనే దరఖాస్తు చేసుకోవడం ఉత్తమం.
నవోదయ విద్యాలయాల్లో ఎందుకు చేరాలి?
జవహర్ నవోదయ విద్యాలయాలు గ్రామీణ ప్రాంతాల్లోని ప్రతిభావంతులైన విద్యార్థులకు నాణ్యమైన విద్యను అందించేందుకు కేంద్ర ప్రభుత్వం ఏర్పాటు చేసిన రెసిడెన్షియల్ పాఠశాలలు. ఇక్కడ ఎంపికైన విద్యార్థులకు 6వ తరగతి నుంచి 12వ తరగతి వరకు పూర్తిగా ఉచిత విద్య అందిస్తారు.
అంతేకాకుండా..
- ఉచిత హాస్టల్ సౌకర్యం
- పోషకాహారం
- పాఠ్యపుస్తకాలు
- యూనిఫార్మ్
- క్రీడలు, కంప్యూటర్ విద్య
- సైన్స్ ల్యాబ్లు, లైబ్రరీ వంటి ఆధునిక సౌకర్యాలు కల్పిస్తారు.
ఎన్ని పాఠశాలల్లో ప్రవేశాలు?
ప్రవేశ పరీక్షలో సాధించిన మెరిట్ ఆధారంగా దేశవ్యాప్తంగా ఉన్న 665 జవహర్ నవోదయ విద్యాలయాల్లో 6వ తరగతి ప్రవేశాలు కల్పిస్తారు. ఆంధ్రప్రదేశ్లో 15, తెలంగాణలో 15 నవోదయ విద్యాలయాలు అందుబాటులో ఉన్నాయి.
JNVST 2027 పరీక్ష ఎలా ఉంటుంది?
జవహర్ నవోదయ విద్యాలయ ప్రవేశ పరీక్ష విద్యార్థుల మానసిక సామర్థ్యం, గణిత నైపుణ్యం, భాషా అవగాహనను పరీక్షించే విధంగా రూపొందించబడింది.
- మొత్తం ప్రశ్నలు – 80
- మొత్తం మార్కులు – 100
- పరీక్ష వ్యవధి – 2 గంటలు
- ఒక్కో ప్రశ్నకు – 1.25 మార్కులు
- నెగెటివ్ మార్కింగ్ లేదు
- సమాధానాలను OMR షీట్లో గుర్తించాలి.
- బ్లాక్ లేదా బ్లూ బాల్ పాయింట్ పెన్ మాత్రమే ఉపయోగించాలి.
మూడు విభాగాల్లో ప్రశ్నలు
ఈ పరీక్షలో మూడు సెక్షన్లు ఉంటాయి.
సెక్షన్-1: మెంటల్ ఎబిలిటీ & ఎన్విరాన్మెంటల్ స్టడీస్
ఈ సెక్షన్లో మొత్తం 40 ప్రశ్నలు ఉంటాయి. వీటికి 50 మార్కులు కేటాయిస్తారు. విద్యార్థుల ఆలోచనా శక్తి, పరిశీలనా సామర్థ్యం, సాధారణ పరిజ్ఞానాన్ని పరీక్షించే ప్రశ్నలు అడుగుతారు.
సెక్షన్-2: అర్థమెటిక్
ఈ విభాగంలో 20 ప్రశ్నలు ఉంటాయి. మొత్తం 25 మార్కులు కేటాయిస్తారు. ప్రాథమిక గణిత అంశాలపై ప్రశ్నలు అడుగుతారు.
సెక్షన్-3: లాంగ్వేజ్ టెస్ట్
ఈ విభాగంలో 20 ప్రశ్నలు ఉంటాయి. మొత్తం 25 మార్కులు ఉంటాయి. విద్యార్థుల పఠన నైపుణ్యం, భాషా అవగాహనను పరీక్షించే విధంగా ప్రశ్నలు రూపొందిస్తారు.
కనీస అర్హత మార్కులు తప్పనిసరి
కేవలం మొత్తం మార్కులు ఎక్కువగా రావడం సరిపోదు. ప్రతి సెక్షన్లో కనీస అర్హత మార్కులు సాధించాలి.
- సెక్షన్-1 : 14 మార్కులు
- సెక్షన్-2 : 7 మార్కులు
- సెక్షన్-3 : 7 మార్కులు
అన్ని సెక్షన్లలో అర్హత సాధించిన విద్యార్థులను మెరిట్ ఆధారంగా ఎంపిక చేస్తారు.
ఏ భాషల్లో పరీక్ష రాయొచ్చు?
ఈ పరీక్షను విద్యార్థులు తమకు అనుకూలమైన భాషలో రాసే అవకాశం ఉంది. తెలుగు, ఇంగ్లీష్, హిందీ, మరాఠీ, ఉర్దూ, ఒడియా, కన్నడతో పాటు ఇతర ప్రాంతీయ భాషల్లో కూడా ప్రశ్నపత్రాలు అందుబాటులో ఉంటాయి.
మెంటల్ ఎబిలిటీ సిలబస్
మెంటల్ ఎబిలిటీ విభాగంలో విద్యార్థుల తార్కిక ఆలోచన, పరిశీలనా నైపుణ్యాన్ని పరీక్షిస్తారు.
ఈ సెక్షన్లో..
- భిన్నమైన బొమ్మను గుర్తించడం
- అసంపూర్ణ చిత్రాన్ని పూర్తి చేయడం
- చిత్రాల క్రమాన్ని గుర్తించడం
- ఆకారాలు, నమూనాలను విశ్లేషించడం
- దృశ్య తార్కికతకు సంబంధించిన ప్రశ్నలు ఉంటాయి.
ఎన్విరాన్మెంటల్ స్టడీస్ (EVS)లో వచ్చే అంశాలు
ఈ విభాగంలో దైనందిన జీవితానికి సంబంధించిన అనేక అంశాలపై ప్రశ్నలు వస్తాయి.
ప్రధానంగా..
- ప్రకృతి
- మానవ శరీరం
- పరిశుభ్రత
- ఆరోగ్యం
- రవాణా వ్యవస్థ
- నదులు
- పర్వతాలు
- వృక్షాలు
- జంతువులు
- ప్రకృతి విపత్తులు
- ఆహారం, పోషకాలు
- కాలుష్యం
- భారత రాష్ట్రాలు, రాజధానులు
- జాతీయ చిహ్నాలు
- పండుగలు
- పంటలు
- అడవులు
వంటి అంశాల నుంచి ప్రశ్నలు అడుగుతారు. ఒక పాసేజ్ ఇచ్చి దాని ఆధారంగా కూడా ప్రశ్నలు ఉంటాయి.
అర్థమెటిక్లో ఏం చదవాలి?
గణితంలో ప్రాథమిక అంశాలపై మంచి పట్టు అవసరం.
ఈ విభాగంలో..
- సంఖ్యలు
- కూడిక
- తీసివేత
- గుణకారం
- భాగహారం
- భిన్నాలు
- గరిష్ట సామాన్య హారకం (GCD)
- కనిష్ట సామాన్య గుణకం (LCM)
- లాభనష్టాలు
- సాధారణ వడ్డీ
- దత్తాంశాలు
వంటి అంశాలపై ప్రశ్నలు వస్తాయి.
లాంగ్వేజ్ టెస్ట్ ఎలా ఉంటుంది?
ఈ విభాగంలో నాలుగు పాసేజ్లు ఇస్తారు. ప్రతి పాసేజ్ కింద ఐదేసి ప్రశ్నలు ఉంటాయి. పాసేజ్ను పూర్తిగా చదివి దాని భావాన్ని అర్థం చేసుకుని సరైన సమాధానం గుర్తించాలి. ఈ సెక్షన్ ద్వారా విద్యార్థుల చదివిన విషయాన్ని గ్రహించే సామర్థ్యాన్ని పరీక్షిస్తారు.
పరీక్షలో విజయం సాధించాలంటే…
నవోదయ ప్రవేశ పరీక్షలో మంచి ర్యాంకు సాధించాలంటే ముందస్తు ప్రణాళిక చాలా ముఖ్యం. ప్రతి రోజు కొంత సమయం కేటాయించి అన్ని విభాగాలను చదవాలి. గత సంవత్సరాల ప్రశ్నపత్రాలను ప్రాక్టీస్ చేయాలి. మాక్ టెస్టులు రాయడం ద్వారా సమయ నిర్వహణపై పట్టు సాధించవచ్చు. OMR షీట్లో సమాధానాలు గుర్తించే విధానాన్ని కూడా ముందుగానే సాధన చేయడం ఉపయోగపడుతుంది.
ఫలితాలు ఎప్పుడు విడుదలవుతాయి?
JNVST 2027 ప్రవేశ పరీక్ష ఫలితాలను 2027 మార్చి చివరి వారంలో ప్రకటించే అవకాశం ఉంది. పరీక్షలో సాధించిన మెరిట్, రిజర్వేషన్ నిబంధనల ఆధారంగా విద్యార్థులకు సీట్లు కేటాయిస్తారు. ఎంపికైన అభ్యర్థులు సంబంధిత నవోదయ విద్యాలయంలో ధ్రువపత్రాల పరిశీలన అనంతరం ప్రవేశం పొందుతారు.
Read also: JNVST 2027 Notification: జవహర్ నవోదయలో ఉచిత విద్యకు భారీ అవకాశం.. 6వ తరగతి ప్రవేశాలకు దరఖాస్తులు ప్రారంభం
NEET UG 2026 Results: నీట్లో మార్పులు చూశారా? ఎంత మంది క్వాలిఫై అయ్యారో తెలుసా?