Japan Earthquake: జపాన్లో మరోసారి భారీ భూకంపం సంభవించి ప్రజలను భయాందోళనకు గురిచేసింది. సోమవారం ఉత్తర జపాన్ తీర ప్రాంతంలో 7.4 తీవ్రతతో భూకంపం సంభవించింది. ఈ ప్రకంపనల కారణంగా జపాన్ ప్రభుత్వం వెంటనే సునామీ అలర్ట్ జారీ చేసింది. సముద్ర తీర ప్రాంతాల్లో మూడు మీటర్ల (సుమారు 10 అడుగుల) ఎత్తు వరకు అలలు ఎగసిపడే అవకాశం ఉందని జపాన్ వాతావరణ సంస్థ హెచ్చరించింది. భూకంపం సంభవించిన వెంటనే అధికారులు అప్రమత్తమై తీరప్రాంత ప్రజలను సురక్షిత ప్రాంతాలకు తరలించాలని సూచించారు.
ఇవాటే తీరంలో భూకంపం
జపాన్ వాతావరణ సంస్థ (JMA) వెల్లడించిన వివరాల ప్రకారం, ఉత్తర ఇవాటే ప్రిఫెక్చర్ సమీపంలోని పసిఫిక్ మహాసముద్ర జలాల్లో ఈ భూకంపం సంభవించింది. సాయంత్రం 4:53 గంటలకు (0753 GMT) సంభవించిన ఈ ప్రకంపనలు తీవ్రంగా అనిపించాయి. భూకంపం ప్రభావం వందల కిలోమీటర్ల దూరంలో ఉన్న టోక్యో నగరంలో కూడా అనుభూతి అయ్యింది. కొన్ని పెద్ద భవనాలు కూడా కంపించినట్లు స్థానిక మీడియా వెల్లడించింది.
సునామీ హెచ్చరిక
భూకంపం తరువాత జపాన్ వాతావరణ సంస్థ వెంటనే సునామీ హెచ్చరిక జారీ చేసింది. తీరప్రాంతాలు, నదీ తీర ప్రాంతాల్లో నివసించే ప్రజలు వెంటనే ఎత్తైన ప్రదేశాలకు లేదా సురక్షిత ప్రాంతాలకు తరలివెళ్లాలని అధికారుల సూచించారు. అలాగే సునామీ అలలు ఒకసారి మాత్రమే కాకుండా పదేపదే తాకే అవకాశం ఉందని హెచ్చరించారు. హెచ్చరిక పూర్తిగా ఎత్తివేసే వరకు ప్రజలు సురక్షిత ప్రాంతాల నుండి బయటకు రావద్దని సూచించారు.
అత్యవసర చర్యలు ప్రారంభం
ఈ భూకంపం నేపథ్యంలో జపాన్ ప్రభుత్వం వెంటనే సంక్షోభ నిర్వహణ బృందాన్ని ఏర్పాటు చేసింది. పరిస్థితిని సమీక్షిస్తూ అవసరమైన చర్యలు తీసుకుంటున్నట్లు ప్రధానమంత్రి కార్యాలయం తెలిపింది. ప్రస్తుతం తీర ప్రాంతాల్లో రక్షణ చర్యలు కొనసాగుతున్నాయి. ఎలాంటి నష్టం జరిగిందన్న విషయంపై అధికారులు సమాచారం సేకరిస్తున్నారు.
భూకంపాలకు కేంద్రంగా జపాన్
జపాన్ ప్రపంచంలోనే అత్యధిక భూకంపాలు సంభవించే దేశాలలో ఒకటి. ఈ దేశం పసిఫిక్ ‘రింగ్ ఆఫ్ ఫైర్’ ప్రాంతంలో ఉంది.
ఇక్కడ నాలుగు ప్రధాన టెక్టోనిక్ ప్లేట్లు కలిసే ప్రాంతం కావడంతో తరచుగా భూకంపాలు సంభవిస్తుంటాయి.
సుమారు 12.5 కోట్ల జనాభా ఉన్న జపాన్లో ప్రతి సంవత్సరం దాదాపు 1,500 భూకంపాలు సంభవిస్తాయి. ప్రపంచవ్యాప్తంగా నమోదయ్యే భూకంపాలలో సుమారు 18 శాతం జపాన్లోనే సంభవిస్తాయి. అయితే వాటిలో చాలా వరకు తక్కువ తీవ్రత కలిగినవే. కానీ కొన్నిసార్లు భారీ భూకంపాలు పెద్ద ప్రమాదాలకు దారితీస్తాయి.
2011లో సంభవించిన వినాశకర భూకంపం
జపాన్ చరిత్రలో అత్యంత భయానకమైన భూకంపాలలో 2011లో సంభవించిన 9.0 తీవ్రత గల భూకంపం ఒకటి.
ఆ భూకంపం కారణంగా భారీ సునామీ ఏర్పడి తీర ప్రాంతాలను ముంచెత్తింది. ఈ ఘటనలో దాదాపు 18,500 మంది మరణించగా, అనేక మంది గల్లంతయ్యారు. అదే సమయంలో ఫుకుషిమా అణు విద్యుత్ కేంద్రంలో భారీ ప్రమాదం సంభవించి మెల్ట్డౌన్ జరిగింది. ఇది ప్రపంచాన్ని షాక్కు గురిచేసిన ఘటనగా నిలిచింది.
ప్రస్తుతం పరిస్థితి
తాజాగా సంభవించిన భూకంపం తరువాత అధికారులు పరిస్థితిని పర్యవేక్షిస్తున్నారు. సునామీ అలలు తీరాన్ని తాకే అవకాశాలపై నిరంతరం గమనిస్తున్నారు. ప్రజలు అప్రమత్తంగా ఉండాలని, అధికారుల సూచనలు తప్పనిసరిగా పాటించాలని జపాన్ ప్రభుత్వం విజ్ఞప్తి చేసింది.
ఇవీ చదవండి: Russia Earthquake : రష్యాలో భారీ భూకంపం – 7.8 తీవ్రతతో భూమి కంపనం, సునామీ హెచ్చరిక
Water and Milk : నీరు లేదా పాలు? మన బాడీని హైడ్రేట్ చేయడానికి ఏది బెటర్?
Water TDS : తాగునీటి TDS ఎంత ఉండాలి? ఏ నీరు తాగడానికి మంచిది?