YS Jagan: జాతీయ చేనేత దినోత్సవం సందర్భంగా రాష్ట్రంలోని నేతన్నలు, చేనేత కళాకారులు, వారి కుటుంబ సభ్యులకు వైయస్సార్‌సీపీ అధ్యక్షుడు, మాజీ ముఖ్యమంత్రి వైఎస్ జగన్‌మోహన్‌రెడ్డి శుభాకాంక్షలు తెలిపారు. చేనేత కేవలం ఒక వృత్తి కాదని.. తెలుగు సంస్కృతి, సంప్రదాయం, కళా నైపుణ్యానికి నిలువెత్తు ప్రతీక అని పేర్కొన్నారు.
వైయస్సార్‌సీపీ ప్రభుత్వ హయాంలో నేతన్నల కుటుంబాలకు ఆర్థిక భరోసా కల్పించేందుకు అనేక కార్యక్రమాలు అమలు చేశామని గుర్తుచేశారు. చంద్రబాబు ప్రభుత్వం అధికారంలోకి వచ్చిన తర్వాత నేతన్న నేస్తం పథకాన్ని రెండేళ్లపాటు నిలిపివేసిందని విమర్శించారు. ఎన్నికల సమయంలో ఇచ్చిన హామీలను కూడా పూర్తిస్థాయిలో అమలు చేయడం లేదని ఆరోపించారు. ఈ మేరకు సామాజిక మాధ్యమం ‘ఎక్స్‌’లో వైఎస్ జగన్ పోస్టు చేశారు.
ఐదేళ్లలో ఒక్కో కుటుంబానికి రూ.1.20 లక్షలు
2019–24 మధ్య తమ ప్రభుత్వం నేతన్నల జీవితాల్లో వెలుగులు నింపాలనే లక్ష్యంతో ప్రతి అడుగులోనూ వారికి అండగా నిలిచిందని జగన్ తెలిపారు. ‘వైయస్‌ఆర్‌ నేతన్న నేస్తం’ పథకం ద్వారా అర్హత కలిగిన ప్రతి చేనేత కుటుంబానికి ఏటా రూ.24 వేల చొప్పున ఐదేళ్లలో రూ.1.20 లక్షలను నేరుగా బ్యాంకు ఖాతాల్లో జమ చేశామని వెల్లడించారు.
ఈ ఒక్క పథకం ద్వారానే నేతన్న కుటుంబాలకు రూ.969.77 కోట్లు అందించినట్లు తెలిపారు. నేతన్నల పింఛన్ల కోసం రూ.1,396.45 కోట్లు, ఆప్కో పాత బకాయిల చెల్లింపునకు రూ.468.84 కోట్లు ఖర్చు చేశామని పేర్కొన్నారు. వివిధ సంక్షేమ పథకాల ద్వారా మొత్తంగా రూ.3,706.16 కోట్ల సాయం అందించి నేతన్నలకు ఆర్థికంగా, సామాజికంగా అండగా నిలిచామని వివరించారు.
ఉచిత విద్యుత్.. ఆన్‌లైన్‌ మార్కెటింగ్‌
తమ ప్రభుత్వ హయాంలో చేనేత మగ్గాలకు ఉచిత విద్యుత్, పవర్‌లూమ్స్‌కు రాయితీ విద్యుత్ అందించామని జగన్ గుర్తుచేశారు. నేతన్నలు తయారుచేసిన వస్త్రాలకు దేశ, విదేశాల్లో మార్కెట్‌ కల్పించేందుకు ప్రముఖ ఈ–కామర్స్‌ సంస్థలతో ఒప్పందాలు చేసుకున్నామని తెలిపారు. చేనేత ఉత్పత్తులకు విస్తృత ప్రచారం కల్పించడంతోపాటు అంతర్జాతీయ గుర్తింపు తీసుకురావడానికి తమ ప్రభుత్వం కృషి చేసిందని పేర్కొన్నారు. నేతన్నలకు కేవలం ఆర్థిక సాయం అందించడమే కాకుండా, వారు తయారుచేసిన ఉత్పత్తులకు మార్కెటింగ్‌ అవకాశాలను విస్తరించామని వివరించారు.
రూ.25 వేల హామీ ఏమైంది?
చంద్రబాబు ప్రభుత్వం అధికారంలోకి వచ్చిన తర్వాత రెండేళ్లపాటు నేతన్న నేస్తం పథకాన్ని నిలిపివేసిందని జగన్ విమర్శించారు. అర్హత కలిగిన ప్రతి నేతన్న కుటుంబానికి ఏడాదికి రూ.25 వేల చొప్పున ఆర్థిక సాయం అందిస్తామని ఎన్నికల సమయంలో ఇచ్చిన హామీని గాలికొదిలేశారని మండిపడ్డారు. హ్యాండ్లూమ్స్‌కు నెలకు 200 యూనిట్లు, పవర్‌లూమ్స్‌కు 500 యూనిట్ల ఉచిత విద్యుత్ అందిస్తామన్న హామీలను కూడా అమలు చేయలేదని ఆరోపించారు. చేనేత రంగాన్ని ఆదుకుంటామని ఎన్నికల ముందు చెప్పి, అధికారంలోకి వచ్చిన తర్వాత నేతన్నలను నిర్లక్ష్యం చేస్తున్నారని విమర్శించారు.
లబ్ధిదారుల సంఖ్యలో కోత
చేనేత పథకాన్ని 1,03,534 కుటుంబాలకు వర్తింపజేస్తామని కూటమి ప్రభుత్వం తొలుత ప్రకటించిందని జగన్ పేర్కొన్నారు. ఇప్పుడు కేవలం 71,536 కుటుంబాలకు సాయం అందిస్తున్నట్లు ప్రకటనలు చేస్తోందని తెలిపారు. ప్రకటించిన వారిలో చివరకు ఎంతమందికి ఆర్థిక సాయం అందుతుందో చూడాల్సి ఉందన్నారు. నేతన్నలకు ఇచ్చిన జీఎస్టీ రీయింబర్స్‌మెంట్‌ హామీని కూడా చంద్రబాబు ప్రభుత్వం అమలు చేయడం లేదని ఆరోపించారు. పథకం పరిధిని విస్తరించాల్సిన ప్రభుత్వం లబ్ధిదారుల సంఖ్యను తగ్గించి నేతన్న కుటుంబాలకు అన్యాయం చేస్తోందని మండిపడ్డారు.
నేతన్నలకు వైయస్సార్‌సీపీ అండ
నేతన్నల హక్కులు, సంక్షేమం, చేనేత రంగ పరిరక్షణ కోసం వైయస్సార్‌ కాంగ్రెస్‌ పార్టీ నిరంతరం పోరాడుతుందని జగన్ హామీ ఇచ్చారు. చేనేత రంగం ఎదుర్కొంటున్న సమస్యలను ప్రభుత్వం దృష్టికి తీసుకెళ్లడంతోపాటు నేతన్నలకు న్యాయం జరిగే వరకు అండగా ఉంటామని భరోసా ఇచ్చారు. జాతీయ చేనేత దినోత్సవం సందర్భంగా రాష్ట్రంలోని నేతన్నలు, చేనేత కళాకారులు, వారి కుటుంబ సభ్యులకు మరోసారి హృదయపూర్వక శుభాకాంక్షలు తెలిపారు.
Read also: YS Jagan: మీ కుమారుడిని కాపాడేందుకు ఇంకా ఎంత దిగజారుతారు? : జగన్ ట్వీట్
YS Jagan in Devarapalli: చంద్రబాబు పాలనలో ఒక్క గంజాయి పంట‌కే ధర.. దాన్ని సాగు చేస్తోంది వెన్నుపోటు పార్టీ వారే: వైఎస్ జగన్
