Tirumala : తిరుమలలో జనవరి 25న జరగనున్న రథసప్తమి ఉత్సవ ఏర్పాట్లపై Tirumala Tirupati Devasthanams (టీటీడీ) అధికారులు సమీక్ష నిర్వహించారు. వైకుంఠ ద్వార దర్శనాలను సమన్వయంతో విజయవంతం చేసినట్లే, రథసప్తమిని కూడా అదే స్ఫూర్తితో నిర్వహించాలని అధికారులను అదనపు ఈవో సూచించారు.
భక్తుల రద్దీ, భద్రతపై ప్రత్యేక దృష్టి
రథసప్తమి రోజున భారీగా భక్తులు తరలివచ్చే అవకాశం ఉన్నందున ముందస్తు అంచనాలతో ఏర్పాట్లు చేయాలని, విజిలెన్స్, పోలీసు విభాగాలతో సమన్వయం పెంచాలని ఆదేశించారు. ట్రాఫిక్ నియంత్రణ, పార్కింగ్ నిర్వహణ, అత్యవసర వైద్య బృందాల సిద్ధతపై ప్రత్యేక దృష్టి పెట్టాలని పేర్కొన్నారు. ఘాట్ రోడ్లపై వాహనాల కదలికను నిరంతరం పర్యవేక్షిస్తూ, అత్యవసర పరిస్థితుల్లో వాహనాల తరలింపుకు స్పష్టమైన కార్యాచరణ ఉండాలన్నారు.
అన్ని విభాగాల సమన్వయంతో ఏర్పాట్లు
ఇంజినీరింగ్, అన్నప్రసాదం, పారిశుద్ధ్యం, శ్రీవారి సేవకులు, వైద్య సేవలు, ఎల్‌ఈడీ స్క్రీన్లు, పుష్పాలంకరణ, సాంస్కృతిక కళా బృందాలు, ఎస్వీబీసీ ప్రసారం, సోషల్ మీడియా ప్రచారం తదితర అంశాలపై సమగ్రంగా సమీక్షించారు. సమాచారం వేగంగా చేరేలా అంతర్విభాగ సమన్వయం తప్పనిసరి అని సూచించారు.
రథసప్తమి వాహన సేవల షెడ్యూల్ (జనవరి 25)
ఉ. 5.30 – 8.00 : సూర్యప్రభ వాహనం (సూర్యోదయం 6.45)
ఉ. 9.00 – 10.00 : చిన్నశేష వాహనం
ఉ. 11.00 – మ. 12.00 : గరుడ వాహనం
మ. 1.00 – 2.00 : హనుమంత వాహనం
మ. 2.00 – 3.00 : చక్రస్నానం
సా. 4.00 – 5.00 : కల్పవృక్ష వాహనం
సా. 6.00 – 7.00 : సర్వభూపాల వాహనం
రా. 8.00 – 9.00 : చంద్రప్రభ వాహనం
ఆర్జిత సేవలు, దర్శనాలపై ఆంక్షలు
రథసప్తమి సందర్భంగా కింది సేవలు, దర్శనాలు రద్దు చేయనున్నట్లు టీటీడీ ప్రకటించింది:
కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్ర దీపాలంకార సేవలు రద్దు
ఎన్‌ఆర్‌ఐలు, చంటి బిడ్డల తల్లిదండ్రులు, సీనియర్ సిటిజన్లు, వికలాంగుల ప్రివిలేజ్ దర్శనాలు రద్దు
తిరుపతిలో జనవరి 24 నుంచి 26 వరకు స్లాటెడ్ సర్వదర్శనం (SSD) టోకెన్ల జారీ రద్దు
ప్రోటోకాల్ ప్రముఖులకు మినహా వీఐపీ బ్రేక్ దర్శనాలు రద్దు; బ్రేక్ దర్శనాలకు సంబంధించి జనవరి 24న ఎలాంటి సిఫార్సు లేఖలు స్వీకరించబడవు
భక్తుల భద్రత, సౌకర్యాలే ప్రధాన లక్ష్యంగా రథసప్తమిని ఘనంగా నిర్వహించేందుకు టీటీడీ అన్ని ఏర్పాట్లు చేస్తోందని అధికారులు తెలిపారు.
ఇవీ చదవండి: Tirumala : తిరుమల వెంకన్న భక్తులకు భారీ శుభవార్త.. మళ్లీ అందుబాటులోకి వచ్చిన సర్వీస్.. ఇక పండగే!
Tirumala : తిరుమలలో శ్రీవారికి ముందు వరాహ స్వామి దర్శనం ఎందుకు తప్పనిసరి? అసలు ఆధ్యాత్మిక రహస్యం!
