Horticulture Hub: రాయలసీమను ఉద్యానవన రంగంలో కీలక ప్రాంతంగా తీర్చిదిద్దే లక్ష్యంతో ఆంధ్రప్రదేశ్ ప్రభుత్వం భారీ ప్రణాళికను ముందుకు తీసుకెళ్తోంది. మదనపల్లెలో శుక్రవారం జరిగిన కార్యక్రమంలో ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కల్యాణ్, కేంద్ర ఆర్థిక మంత్రి నిర్మలా సీతారామన్ కలిసి గ్లోబల్ హార్టికల్చర్ హబ్, ఇండియన్ స్కూల్ ఆఫ్ అగ్రికల్చర్‌కు శంకుస్థాపన చేశారు. మూడు దశల్లో అమలు చేయనున్న ఈ ప్రణాళికకు ప్రభుత్వ, ప్రైవేటు పెట్టుబడులు కలిపి సుమారు రూ.లక్ష కోట్ల స్థాయిలో ఉండనున్నాయి.
10 జిల్లాల్లో హార్టికల్చర్ ప్లాన్
ఇంటిగ్రేటెడ్ హార్టికల్చర్ డెవలప్‌మెంట్ ప్లాన్‌ను 10 జిల్లాల్లోని 201 క్లస్టర్లలో అమలు చేయాలని ప్రభుత్వం లక్ష్యంగా పెట్టుకుంది. అనంతపురం, అన్నమయ్య, చిత్తూరు, కర్నూలు, నంద్యాల, శ్రీ సత్యసాయి, తిరుపతి, వైఎస్సార్ కడప, ప్రకాశం, మార్కాపురం ప్రాంతాలు ఈ ప్రణాళిక పరిధిలోకి రానున్నాయి. మొత్తం ప్రాజెక్టును మూడు దశల్లో అమలు చేయనున్నట్లు వెల్లడించారు. ఈ ప్రణాళికలో ప్రభుత్వ పెట్టుబడిగా సుమారు రూ.40 వేల కోట్లు, ప్రైవేటు రంగం నుంచి మరో రూ.60 వేల కోట్ల పెట్టుబడులను సమీకరించే లక్ష్యాన్ని ప్రభుత్వం ప్రకటించింది. ఉద్యాన సాగు విస్తరణతో పాటు సాగునీరు, గ్రామీణ రహదారులు, కోల్డ్‌చెయిన్, ప్రాసెసింగ్, మార్కెటింగ్, ఎగుమతులకు అవసరమైన మౌలిక వసతులను అభివృద్ధి చేయనున్నారు.
సాగునీటికి భారీ నిధులు
రాయలసీమలో వ్యవసాయానికి ప్రధాన సవాలుగా ఉన్న నీటి కొరతను తగ్గించేందుకు ప్రణాళికలో ప్రత్యేక దృష్టి పెట్టారు. రిజర్వాయర్లు, కాలువలు, చెరువుల అభివృద్ధితో పాటు మైక్రో ఇరిగేషన్‌ను విస్తరించేందుకు నిధులు కేటాయించనున్నారు. ప్రభుత్వం వెల్లడించిన వివరాల ప్రకారం సుమారు రూ.20,884 కోట్లను సాగునీటి మౌలిక వసతులు, మైక్రో ఇరిగేషన్ కోసం వినియోగించనున్నారు. దాదాపు 9 లక్షల ఎకరాలకు కొత్తగా సాగునీరు అందించడం, 4.3 లక్షల ఎకరాల ఆయకట్టును స్థిరీకరించడం లక్ష్యంగా పెట్టుకున్నారు. మరోవైపు 6.5 లక్షల హెక్టార్లలో మైక్రో ఇరిగేషన్‌ను విస్తరించే ప్రణాళిక ఉంది.
ఉద్యాన విస్తీర్ణం పెంపు
రాయలసీమలో ప్రస్తుతం ఉన్న ఉద్యాన పంటల విస్తీర్ణాన్ని మరింత పెంచేందుకు ప్రభుత్వం ప్రణాళిక రూపొందించింది. ప్రస్తుతం సుమారు 8.41 లక్షల హెక్టార్లుగా ఉన్న ఉద్యాన సాగు విస్తీర్ణాన్ని 14.41 లక్షల హెక్టార్లకు పెంచాలని లక్ష్యంగా పెట్టుకున్నారు. ఈ విస్తరణలో మామిడి, అరటి, టమాటా, దానిమ్మ, నిమ్మ, స్వీట్ ఆరెంజ్‌తో పాటు డ్రాగన్ ఫ్రూట్, అవకాడో, బెర్రీస్ వంటి అధిక విలువ కలిగిన పంటలకు ప్రాధాన్యం ఇవ్వనున్నారు. మదనపల్లె ప్రాంతం టమాటా సాగుకు ఇప్పటికే ప్రత్యేక గుర్తింపు పొందింది. రాయలసీమలోని వాతావరణ పరిస్థితులకు అనుగుణంగా వివిధ రకాల ఉద్యాన పంటలను సాగు చేస్తున్న రైతుల అనుభవాన్ని మరింత విస్తృతంగా ఉపయోగించుకోవాలని ప్రభుత్వం భావిస్తోంది.
రైతు నుంచి మార్కెట్ వరకు
ఉద్యాన పంటల ఉత్పత్తి పెంచడంతో పాటు రైతులకు మార్కెట్ అవకాశాలను మెరుగుపరచడంపై ప్రణాళికలో ప్రధానంగా దృష్టి పెట్టారు. పంట కోత అనంతరం నష్టాలను తగ్గించేందుకు కోల్డ్ స్టోరేజీలు, ప్యాక్‌హౌస్‌లు, ఫుడ్ ప్రాసెసింగ్ యూనిట్లు, వాల్యూ యాడిషన్ కేంద్రాలను ఏర్పాటు చేయనున్నారు. రైతు పొలం నుంచి పంటను సేకరించడం మొదలుకొని నిల్వ, ప్రాసెసింగ్, రవాణా, మార్కెటింగ్, ఎగుమతుల వరకు ఒకే సమగ్ర వ్యవస్థను అభివృద్ధి చేయాలని లక్ష్యంగా పెట్టుకున్నారు. ఈ మౌలిక వసతుల ద్వారా ఏటా 40 నుంచి 45 లక్షల మెట్రిక్ టన్నుల ఉత్పత్తిని నష్టపోకుండా నిర్వహించే సామర్థ్యం ఏర్పడుతుందని ప్రభుత్వం పేర్కొంది. మూడో సంవత్సరం నుంచి సుమారు రూ.81 వేల కోట్ల అదనపు గ్రాస్ వ్యాల్యూ యాడిషన్‌తో పాటు ప్రత్యక్ష, పరోక్షంగా దాదాపు 50 లక్షల ఉద్యోగ అవకాశాలు ఏర్పడే అవకాశం ఉందని వెల్లడించింది.
గ్రామీణ రహదారులకు ప్రాధాన్యం
పంటలను పొలాల నుంచి మార్కెట్లు, ప్రాసెసింగ్ కేంద్రాలకు వేగంగా తరలించేందుకు గ్రామీణ రహదారుల అభివృద్ధికి కూడా ప్రాధాన్యం ఇవ్వనున్నారు. సుమారు రూ.4,562 కోట్లతో 5,721 కిలోమీటర్ల గ్రామీణ రహదారులను అభివృద్ధి చేయాలని ప్రణాళికలో పేర్కొన్నారు. గత రెండేళ్లలో పల్లె పండుగ కార్యక్రమం కింద రాయలసీమలో చేపట్టిన అభివృద్ధి పనులను కూడా పవన్ కల్యాణ్ ప్రస్తావించారు. నీటి సంరక్షణ, ఫామ్ పాండ్లు, రహదారులు, ఉద్యాన పంటల విస్తరణకు సంబంధించిన పనులు చేపట్టినట్లు ఆయన తెలిపారు.
మదనపల్లెలో అగ్రికల్చర్ స్కూల్
గ్లోబల్ హార్టికల్చర్ హబ్‌లో భాగంగా మదనపల్లెలో ఇండియన్ స్కూల్ ఆఫ్ అగ్రికల్చర్‌కు కూడా శంకుస్థాపన చేశారు. ఆధునిక వ్యవసాయ సాంకేతికతను రైతులకు చేరువ చేయడంతో పాటు డిజిటల్ అగ్రికల్చర్, ప్రిసిషన్ ఫార్మింగ్, క్రాప్ మానిటరింగ్, స్మార్ట్ ఇరిగేషన్, మార్కెట్ ఇంటెలిజెన్స్ వంటి అంశాలపై దృష్టి పెట్టనున్నట్లు కార్యక్రమంలో వెల్లడించారు. ఈ కార్యక్రమంలో కేంద్ర, రాష్ట్ర ప్రభుత్వ ప్రతినిధులతో పాటు మంత్రులు, ప్రజాప్రతినిధులు, అధికారులు, వ్యవసాయ రంగానికి చెందిన ప్రతినిధులు పాల్గొన్నారు.
రాయలసీమలో ఉద్యాన సాగును విస్తరించడం, నీటి వనరులను బలోపేతం చేయడం, గ్రామీణ రహదారులను అభివృద్ధి చేయడం, పంటల ప్రాసెసింగ్ మరియు ఎగుమతులకు మౌలిక వసతులు కల్పించడం ద్వారా వ్యవసాయ ఆధారిత ఆర్థిక కార్యకలాపాలకు కొత్త అవకాశాలు ఏర్పడేలా ప్రణాళిక రూపొందించారు.
Read also: Agriculture Crisis: ఏపీలో వ్యవసాయ సంక్షోభం.. రైతులకు ప్రత్యేక కరువు ప్యాకేజీ ప్రకటించాలి: వైఎస్సార్‌సీపీ నేత నాగిరెడ్డి
Andhra Pradesh: Iran–US conflict affect of India’s Agri exports… Basmati exports at risk, farmers fear losses
