Immunity Food: ఆహారమే ఆరోగ్యాన్ని నిర్ణయిస్తుంది. అన్ని రకాల పోషకాలు కలిగిన ఆహారం తీసుకుంటే ఆరోగ్యంగా ఉండవచ్చు. రోగనిరోధక శక్తిని పెంచే సమతుల ఆహారం వివిధ వ్యాధుల నుంచి రక్షిస్తుంది. ఒకవేళ ఏదైనా అనారోగ్యం కలిగినా త్వరగా కోలుకునే అవకాశం ఉంటుంది. ఏయే ఆహారాలు తీసుకుంటే రోగ నిరోధక శక్తి పెరుగుతుందో తెలుసుకోవాలి. (Immunity Food)
ఏదైనా అనారోగ్యం సంభవించినప్పుడు శరీరం తట్టుకొని నిలబడాలి. ఇందుకు రోగ నిరోధక శక్తి కీలకం. మరి రోగ నిరోధక శక్తి పెరగాలంటే ఏం చేయాలి అనేది చాలామందికి తెలియదు. కానీ సరైన ఆహారం తీసుకుంటే రోగ నిరోధక శక్తిని పెంచుకోవచ్చు.వర్షాకాలం వచ్చిందంటే చాలామంది తరచుగా జలుబు, జ్వరంతో బాధపడుతుంటారు. ఇలాంటి వ్యాధులు రాకుండా, ఒకవేళ వచ్చినా త్వరగా కోలుకోవాలంటే రోగ నిరోధక శక్తి ఎక్కువగా ఉండాలి. ఇందుకోసం సమతుల ఆహారం తీసుకోవాలి.
మన శరీరం సి విటమిన్ ను సొంతంగా తయారు చేసుకోలేదు. అలాగే శరీరంలో నిల్వ కూడా చేసుకోలేదు. కాబట్టి రోజూ తీసుకునే ఆహారంలో సి విటమి ఉండేలా జాగ్రత్త పడాలి. ఉదయం వేడినీళ్లు, లెమన్ వాటర్, లెమన్ వాటర్ లో తేనె, పెప్పర్ కలుపుకుని తాగితే కూడా సత్ఫలితాలు ఉంటాయి. వెల్లుల్లిలోనూ ఇన్ఫెక్షన్ లపై పోరాడే గుణం ఉంటుంది. రక్తనాళాలు గట్టి పడకుండా, మృదువుగా ఉంచుతుంది. శరీరంలో వాపు, మంట వంటి లక్షణాలపై పోరాడే గుణం అల్లంలో ఉంటుంది. గొంతు నొప్పి రాకుండా కూడా చూస్తుంది. పాలకూర, గ్రీన్ టీ, బొప్పాయి రోగనిరోధక శక్తిని పెంచుతాయి.
విటమిన్లు, ఖనిజాలు లభించే ఆహారం తీసుకోవడం ద్వారా రోగ నిరోధక శక్తిని పెంచుకోవచ్చు. చాలామంది జలుబు చేసినప్పుడు సి విటమిన్ టాబ్లెట్ లు వేసుకుంటారు. ఇందుకు కారణం సి విటమిన్ అనేది రోగనిరోధక శక్తిని పెంచుతుంది. అదే సహజసిద్ధమైన పద్ధతుల్లో సి విటమిన్ ను ఆహారం ద్వారా తీసుకోవచ్చు. నిమ్మ, ద్రాక్ష, నారింజ, ఎరుపు రంగు క్యాప్సికంలో సి విటమిన్ పుష్కలంగా ఉంటుంది.
ఎరుపు రంగు క్యాప్సికంలో బీటా కెరోటిన్ అనే పోషకం కూడా ఉంటుంది. దీనిని మన శరీరం ఏ విటమిన్ గా మార్చుకుంటుంది. బ్రోకలీలో కూడా ఏ, సి, ఇ విటమిన్లు లభిస్తాయి. ఇందులోని పీచు పదార్థం, యాంటీ ఆక్సిడెంట్లు శరీరానికి మేలు చేస్తాయి. పసుపులోని కర్క్యుమిన్ కు రోగనిరోధక శక్తిని పెంచే లక్షణం ఉంటుంది. రోగకారక సూక్ష్మజీవులను చంపే మైక్రోబియల్ లక్షణం వల్ల వివిధ వ్యాధుల నుంచి రక్షణ కల్పిస్తుంది.
మాంసాహారులైతే వారానికోసారి చేప, చికెన్ తీసుకోవచ్చు. పెరుగులోనూ రోగనిరోధక శక్తిని పెంచే లక్షణం ఉంటుంది. పెరుగులో పండ్లు, తేనె కలుపుకొని తింటే మరింత రుచికరంగా ఉంటుంది. పెరుగులో డి విటమిన్ కూడా పుష్కలంగా లభిస్తుంది. బాదం పప్పులో ఇన్ఫెక్షన్లపై పోరాడే గుణం ఉంటుంది. అవకాడో, ముదురు ఆకుపచ్చని ఆకుకూరలు, కివీ పండ్లు, చికెన్, పీతలు ఆహారంగా తీసుకుంటే రోగ నిరోధక శక్తిని పెంచుకోవచ్చు. అలాగే ఆహారం కూడా వేడివేడిగా తీసుకోవాలి.
ఇదీ చదవండి: ECG changes: ఈసీజీలో మార్పులు గుండె జబ్బులకు సంకేతమా? ఎలాంటి జగ్రత్తలు తీసుకోవాలి?
