Iran–Israel War Effect: ఇరాన్–ఇజ్రాయెల్ మధ్య కొనసాగుతున్న యుద్ధం ప్రపంచ ఆర్థిక వ్యవస్థపై ప్రభావం చూపుతోంది. ముఖ్యంగా పశ్చిమాసియా ప్రాంతం నుంచి వచ్చే ముడి చమురు మరియు గ్యాస్ సరఫరాపై తీవ్ర ప్రభావం పడుతోంది. అంతర్జాతీయ మార్కెట్‌లో ముడి చమురు ధరలు పెరగడంతో పాటు గ్యాస్ సరఫరాలో అంతరాయం ఏర్పడింది. భారత్ కూడా పెద్ద మొత్తంలో ఇంధనాన్ని దిగుమతి చేసుకునే దేశం కావడంతో ఈ ప్రభావం నేరుగా దేశీయ మార్కెట్‌పై పడుతోంది. గ్యాస్ దిగుమతులు తగ్గడం వల్ల దేశంలో ఎల్పీజీ కొరత ఏర్పడే పరిస్థితులు కనిపిస్తున్నాయి.
గ్యాస్ బుకింగ్‌పై కొత్త నిబంధనలు
గ్యాస్ కొరతను ఎదుర్కొనేందుకు కేంద్ర ప్రభుత్వం కీలక నిర్ణయం తీసుకుంది. గృహ వినియోగదారులు గ్యాస్ సిలిండర్ బుక్ చేసుకునే మధ్య వ్యవధిని పెంచింది. ఇప్పటి వరకు 21 రోజులుగా ఉన్న వెయిటింగ్ పీరియడ్‌ను 25 రోజులకు పెంచుతున్నట్లు ప్రకటించింది. దీని ప్రకారం ఒకసారి సిలిండర్ బుక్ చేసిన తర్వాత మరోసారి బుక్ చేసుకోవడానికి కనీసం 25 రోజులు వేచి ఉండాల్సి ఉంటుంది. ఈ నిర్ణయం గ్యాస్ సరఫరాను సమతుల్యం చేయడానికే తీసుకున్నట్లు ప్రభుత్వం తెలిపింది.
ఎల్పీజీ ఉత్పత్తి పెంపు
పశ్చిమాసియా సంక్షోభాన్ని దృష్టిలో ఉంచుకుని ప్రభుత్వరంగ ఆయిల్ మార్కెటింగ్ కంపెనీలు కూడా చర్యలు చేపట్టాయి.
ఎల్పీజీ ఉత్పత్తిని పెంచాలని నిర్ణయించినట్లు ఆయిల్ కంపెనీలు ప్రకటించాయి. దేశంలో గ్యాస్ సరఫరా అంతరాయం లేకుండా ఉండేందుకు ఉత్పత్తి పెంచడం, నిల్వలను పెంచడం వంటి చర్యలు చేపడుతున్నట్లు తెలిపాయి.
కీలక రంగాలకు ప్రాధాన్యం
గ్యాస్ కొరత పరిస్థితుల్లో కొన్ని రంగాలకు ప్రాధాన్యం ఇవ్వాలని నిర్ణయించారు. ముఖ్యంగా గృహ వినియోగదారులు, ఆసుపత్రులు, విద్యా సంస్థలు.. ఈ రంగాలకు గ్యాస్ సరఫరా ముందుగా అందేలా చర్యలు తీసుకుంటామని ఆయిల్ కంపెనీలు తెలిపాయి. ఇతర గృహేతర రంగాల అభ్యర్థనలను ఆయిల్ మార్కెటింగ్ కంపెనీల ఎగ్జిక్యూటివ్ డైరెక్టర్ల కమిటీ పరిశీలించి నిర్ణయం తీసుకుంటుంది.
ప్రధాన నగరాల్లో హోటళ్లు బంద్
గ్యాస్ కొరత ప్రభావం ఇప్పటికే కొన్ని నగరాల్లో కనిపిస్తోంది. హైదరాబాద్, బెంగళూరు వంటి ప్రధాన నగరాల్లో గ్యాస్ సరఫరా తగ్గడంతో కొంతమంది హోటల్ యజమానులు తాత్కాలికంగా హోటళ్లను మూసివేయాల్సి వచ్చింది. దీంతో వ్యాపారులు భారీ నష్టాలను ఎదుర్కొంటున్నారు. యుద్ధ పరిస్థితులు ఇంకా కొనసాగితే గ్యాస్ సంక్షోభం మరింత తీవ్రం అయ్యే అవకాశం ఉందని నిపుణులు హెచ్చరిస్తున్నారు.
ముందున్న పరిస్థితి ఎలా?
ఇరాన్–ఇజ్రాయెల్ యుద్ధం ఇంకా కొనసాగుతున్న నేపథ్యంలో అంతర్జాతీయ మార్కెట్‌లో చమురు, గ్యాస్ ధరలు మరింత పెరిగే అవకాశం ఉంది. దీంతో భారత ప్రభుత్వం మరియు ఆయిల్ కంపెనీలు సరఫరా అంతరాయం లేకుండా ఉండేందుకు చర్యలను వేగవంతం చేస్తున్నాయి. అయితే పరిస్థితి పూర్తిగా స్థిరపడాలంటే పశ్చిమాసియా ప్రాంతంలో ఉద్రిక్తతలు తగ్గాల్సిన అవసరం ఉందని విశ్లేషకులు చెబుతున్నారు.
ఇవీ చదవండి: Iran news: విదేశాల్లో ఉన్న పౌరులకు ఇరాన్ హెచ్చరిక.. శత్రుదేశాలకు సహకరిస్తే ఆస్తుల జప్తు
Andhra Pradesh: Iran–US conflict affect of India’s Agri exports… Basmati exports at risk, farmers fear losses
Iran War: మధ్యప్రాచ్య ఉద్రిక్తతలు.. భారత్‌లో పెట్రోల్-డీజిల్ ధరలు పెరుగుతాయా? కేంద్రం స్పష్టత
Chiranjeevi: మళ్లీ వస్తున్నాయా 50 రోజుల సంబరాలు? టాలీవుడ్‌లో లాంగ్ రన్ కల్చర్‌కు ‘శంకరవరప్రసాద్ గారు’ కొత్త ఆశ!
