Viral video : గ్వాలియర్‌లో షాకింగ్ ఘటన.. రద్దీ మార్కెట్‌లో యువతి కిడ్నాప్.. చూస్తూ ఊరుకున్న జనాలు.. స్పందించని సహచరులు

Viral video : మధ్యప్రదేశ్ రాష్ట్రం గ్వాలియర్‌లో చోటు చేసుకున్న ఓ ఘటన దేశవ్యాప్తంగా కలకలం రేపుతోంది. గురువారం ఉదయం నగరంలోని అత్యంత రద్దీగా ఉండే దాల్ బజార్ ప్రాంతంలో బహిరంగంగా యువతిని కిడ్నాప్ చేసిన దృశ్యాలు ఇప్పుడు సోషల్ మీడియాలో వైరల్‌గా మారాయి.

ప్రత్యక్ష సాక్షుల కథనం ప్రకారం.. ముసుగులు ధరించిన కొందరు వ్యక్తులు రెండు స్కూటీలపై అక్కడికి వచ్చారు. అదే సమయంలో రోడ్డుపై వెళ్తున్న ఓ కారును అకస్మాత్తుగా అడ్డగించారు. స్కూటీని కారు ముందు నిలిపి, రోడ్డుమధ్యే వాహనాన్ని ఆపేశారు.

కారులో నుంచి యువతిని లాగి బయటకు
దుండగులు కారు వెనుక డోర్ తెరవాలని డిమాండ్ చేశారు. కారులో ఉన్నవారు నిరాకరించడంతో అద్దాలు పగులగొడతామని బెదిరించారు. భయంతో వెనుక డోర్ తెరుచుకోగా.. వెంటనే యువతిని బలవంతంగా బయటకు లాగారు.

అందరి ముందే ఆమెపై విచక్షణారహితంగా దాడి చేశారు. చేతులతో కొడుతూ భయభ్రాంతులకు గురిచేశారు. అనంతరం ఆమెను బలవంతంగా స్కూటీపై కూర్చోబెట్టి ఒకరు ముందు, మరొకరు వెనుక కూర్చుని అక్కడి నుంచి వేగంగా వెళ్లిపోయారు. మిగిలిన దుండగులు మరో స్కూటీలో పరారయ్యారు.

వందల మంది ఉన్నా ఒక్కరూ స్పందించలేదు

ఈ ఘటనలో అత్యంత కలత కలిగించే విషయం ఏమిటంటే…
ఇంత జరుగుతున్నా కారులో ఉన్న వ్యక్తులు గానీ, డ్రైవర్ గానీ ఎలాంటి ప్రతిఘటన చూపకపోవడం.

అంతేకాదు.. ఘటన జరిగిన సమయంలో మార్కెట్ ప్రాంతంలో వందలాది మంది స్థానికులు ఉన్నప్పటికీ, ఒక్కరు కూడా యువతిని రక్షించేందుకు ముందుకు రాలేదు. పోలీసులకు సమాచారం ఇవ్వాలన్న ప్రయత్నం కూడా ఎవరు చేయలేదు. అందరూ కేవలం చోద్యం చూస్తూ నిలిచిపోయారు.

పోలీసులకు ఫిర్యాదు లేకపోవడంపై అనుమానం
సంఘటన స్థలానికి అతి సమీపంలోనే పోలీస్ స్టేషన్ ఉన్నప్పటికీ, అక్కడ ఎలాంటి ఫిర్యాదు నమోదు కాలేదు. అయితే పరిసర ప్రాంతాల్లోని సీసీటీవీ కెమెరాల్లో ఈ ఘటన మొత్తం రికార్డ్ కావడంతో వీడియో సోషల్ మీడియాలో వైరల్ అయ్యింది.

దీంతో పోలీసులు ఆలస్యంగా రంగంలోకి దిగారు. ముసుగులు ధరించిన కిడ్నాపర్లను గుర్తించేందుకు ప్రత్యేక బృందాలు ఏర్పాటుచేశారు. సీసీటీవీ ఫుటేజీ ఆధారంగా దర్యాప్తు కొనసాగుతోంది.

బాధిత యువతి కుటుంబ సభ్యులు ఇప్పటివరకు పోలీసులకు ఫిర్యాదు చేయకపోవడంపై కూడా అధికారులు అనుమానం వ్యక్తం చేస్తున్నారు. ఈ ఘటన వెనుక ఉన్న అసలు కారణాలు, యువతితో దుండగుల సంబంధం ఏంటన్న అంశాలపై పూర్తి వివరాలు ఇంకా తెలియాల్సి ఉంది.

ఈ సంఘటన ప్రజా భద్రతపై తీవ్ర ప్రశ్నలు లేవనెత్తుతోంది. రద్దీ ప్రాంతాల్లో కూడా నేరస్తులు ఇంత సులువుగా నేరానికి పాల్పడడం, సమాజం మౌనంగా ఉండటం పట్ల తీవ్ర ఆందోళన వ్యక్తమవుతోంది.

ఇవీ చదవండి: Viral Video: నీటిలో సేదతీరుతున్న మొసలిని రెచ్చగొట్టిన యువకులు.. చివరకు షాకింగ్ ట్విస్ట్!
Viral Video: చాలుపోరా సామీ.. టీమిండియాను ఊపేసిన విలన్‌ను సరదాగా గెంటేసిన విరాట్ కోహ్లీ