Ananya Nagalla : టాలీవుడ్‌లో ఒక సినిమా హిట్ అయితే అవకాశాలు వరుసగా వస్తాయని చాలామంది భావిస్తారు. కానీ వాస్తవం మాత్రం ఎప్పుడూ అలా ఉండదని తాజాగా ఓ తెలుగు హీరోయిన్ చేసిన వ్యాఖ్యలు మరోసారి స్పష్టం చేస్తున్నాయి. తొలి చిత్రంతోనే నటిగా మంచి గుర్తింపు తెచ్చుకున్నప్పటికీ, ఆ తర్వాత ఆశించిన స్థాయిలో అవకాశాలు రాకపోవడంతో కొంతకాలం నిరాశను ఎదుర్కొన్నానని ఆమె వెల్లడించింది. ఖమ్మం జిల్లా నుంచి సినీ రంగంలోకి అడుగుపెట్టి తనకంటూ ప్రత్యేకమైన గుర్తింపును సంపాదించుకున్న నటి అనన్య నాగళ్ల తాజాగా ఇచ్చిన ఇంటర్వ్యూలో తన కెరీర్ ప్రయాణాన్ని ఓపెన్‌గా పంచుకున్నారు.
“నా మాటల్లో తెలంగాణ యాస ఎక్కువగా ఉండదు”
తనది ఖమ్మం జిల్లా అయినప్పటికీ, విజయవాడకు సమీపంలోని సత్తుపల్లి ప్రాంతంలో పెరిగిన కారణంగా తన మాటల్లో తెలంగాణ స్లాంగ్ ఎక్కువగా ఉండదని అనన్య తెలిపారు. అందుకే భాష పరంగా తనకు ఎలాంటి అడ్డంకులు ఎదురుకాలేదని చెప్పారు. టాలీవుడ్‌లో ముంబై నుంచి వచ్చే హీరోయిన్లకే ఎక్కువ అవకాశాలు ఉంటాయన్న అభిప్రాయంపై స్పందిస్తూ, అది తాత్కాలికమైన క్రేజ్ మాత్రమేనని అనన్య అభిప్రాయపడ్డారు. “బయట నుంచి వచ్చిన నటీమణులకు మొదట్లో అవకాశాలు ఎక్కువగా కనిపించవచ్చు. కానీ దీర్ఘకాలంగా ఇండస్ట్రీలో నిలబడేది మాత్రం తెలుగు అమ్మాయిలే” అని ఆమె ధీమాగా చెప్పారు.
పెరుగుతున్న ఆత్మవిశ్వాసం
గత ఐదు నుంచి ఆరు సంవత్సరాలుగా తెలుగు నటీమణులు పరిశ్రమలో తమ స్థానాన్ని బలంగా నిర్మించుకుంటున్నారని అనన్య పేర్కొన్నారు. “ఇప్పుడు మేమంతా ఇండస్ట్రీలో నిలదొక్కుకుంటున్నాం. రాబోయే ఐదేళ్ల తర్వాత కూడా తెలుగు అమ్మాయిలు ఇక్కడే ఉంటారు” అని ఆమె విశ్వాసం వ్యక్తం చేశారు. కేవలం గ్లామర్ పాత్రలకే కాకుండా, పాత్రకు ప్రాధాన్యత ఉన్న అర్థవంతమైన రోల్స్ ఎక్కువగా తెలుగమ్మాయిలకే దక్కుతున్నాయని ఆమె అభిప్రాయపడింది. నటనకు ఆస్కారం ఉన్న పాత్రల్లో తమ సామర్థ్యాన్ని చూపించుకునే అవకాశం ఎక్కువగా ఉంటుందని చెప్పింది.
నిరాశ
పవర్ స్టార్ పవన్ కళ్యాణ్‌తో కలిసి ‘వకీల్ సాబ్’ సినిమాలో నటించడం తన కెరీర్‌లో ఒక మరిచిపోలేని మైలురాయిగా అనన్య అభివర్ణించింది. అయితే అంతటి స్టార్ హీరో పక్కన నటించిన తర్వాత మరిన్ని పెద్ద అవకాశాలు వస్తాయని తాను ఊహించానని చెప్పింది. “ఆ సినిమా తర్వాత స్టార్ హీరోల సినిమాలు వరుసగా వస్తాయని అనుకున్నాను. కానీ అలా జరగకపోవడంతో మొదట్లో కొంచెం నిరాశకు గురయ్యాను” అని ఆమె నిజాయితీగా వెల్లడించింది. అయితే ఆ నిరాశ ఎక్కువ కాలం కొనసాగలేదని కూడా తెలిపింది. తరువాత వచ్చిన పాత్రలు తనలో కొత్త ఆత్మవిశ్వాసాన్ని నింపాయని, ముఖ్యంగా ‘తంత్ర’ లాంటి విభిన్న కాన్సెప్ట్ సినిమాల్లో నటించడం నటిగా తనను మరింత సంతృప్తిపరిచిందని చెప్పింది.
ఆ పాత్రలకే పరిమితం చేశారు
‘మల్లేశం’, ‘ప్లేబ్యాక్’, ‘వకీల్ సాబ్’ వంటి సినిమాల్లో ఎక్కువగా పద్ధతిగా ఉండే పాత్రలు రావడంతో తనపై ఒక ప్రత్యేకమైన ఇమేజ్ ఏర్పడిందని అనన్య పేర్కొన్నారు. చాలామంది తనను సాంప్రదాయ పాత్రలకే సరిపోతుందని భావించారని తెలిపారు. ఆ ముద్రను చెరిపేయాలనే ఉద్దేశంతోనే ‘శాకుంతలం’ సినిమా సమయంలో గ్లామరస్ ఫోటోషూట్స్ చేయడం ప్రారంభించానని చెప్పారు.
పాత్ర ముఖ్యం
నటిగా తన లక్ష్యం కేవలం గ్లామర్ పాత్రలే కాదు, క్యారెక్టర్ ఓరియెంటెడ్ మరియు పెర్ఫార్మెన్స్ ఆధారిత రోల్స్ చేయడమేనని అనన్య స్పష్టం చేశారు. అవసరమైతే తనలోని గ్లామర్ కోణాన్ని కూడా ప్రేక్షకులకు చూపించేందుకు సిద్ధమేనని వెల్లడించారు. తెలుగమ్మాయిగా పరిశ్రమలో ఎదురయ్యే సవాళ్లను ధైర్యంగా ఎదుర్కొంటూ, వైవిధ్యమైన కథలను ఎంచుకుంటూ ముందుకు సాగుతున్న అనన్య నాగళ్ల… తన ప్రతిభపైనే నమ్మకంతో టాలీవుడ్‌లో తనకంటూ ప్రత్యేక స్థానం నిర్మించుకుంటోంది.
ఇవీ చదవండి: Ananya Nagalla : అప్సరసా.. ఏమి ఈ అందం.. అనన్య నాగళ్ల పిక్స్ వైరల్!
Ananya Nagalla: కమిట్మెంట్‌పై అనన్య నాగళ్ల కామెంట్స్ వైరల్
