Tirumala News: తిరుమల శ్రీవారి దర్శనం కోసం నిత్యం వేలాది మంది భక్తులు కొండపైకి చేరుకుంటారు. భక్తులకు అవసరమైన ఆహారాన్ని అందించేందుకు టీటీడీ ఆధ్వర్యంలోనే కాకుండా ప్రైవేట్ హోటళ్లు, ఫాస్ట్ఫుడ్ సెంటర్లు కూడా పెద్ద సంఖ్యలో ఉన్నాయి. అయితే భక్తుల ఆరోగ్య భద్రత విషయంలో తిరుమల తిరుపతి దేవస్థానం (టీటీడీ) తాజాగా కీలక నిర్ణయం తీసుకున్నట్లు తెలుస్తోంది. క్యాలీఫ్లవర్లో పురుగులు కనిపిస్తున్నాయంటూ తరచూ ఫిర్యాదులు రావడంతో.. దానితో తయారు చేసే పలు వంటకాలపై ఆంక్షలు విధించే దిశగా ఆరోగ్య విభాగం చర్యలు చేపట్టినట్లు సమాచారం.
తిరుమలలో గోబీ వంటకాలకు బ్రేక్?
తిరుమల కొండపై ఉన్న హోటళ్లు, ఫాస్ట్ఫుడ్ సెంటర్లలో క్యాలీఫ్లవర్తో తయారయ్యే గోబీ రైస్, గోబీ 65, గోబీ మంచూరియా వంటి వంటకాలకు మంచి డిమాండ్ ఉంటుంది. ముఖ్యంగా చైనీస్ ఫుడ్, ఫాస్ట్ఫుడ్ విక్రయించే కేంద్రాల్లో వీటిని ఎక్కువగా విక్రయిస్తుంటారు. అయితే క్యాలీఫ్లవర్లో పురుగులు ఉండే అవకాశం ఎక్కువగా ఉందని గుర్తించిన టీటీడీ ఆరోగ్య విభాగం.. అలాంటి కూరగాయలను సరిగా శుభ్రం చేయకుండా వంటల్లో ఉపయోగిస్తే భక్తుల ఆరోగ్యానికి ఇబ్బందులు తలెత్తే అవకాశం ఉందని భావిస్తోంది.
ఈ నేపథ్యంలో క్యాలీఫ్లవర్తో తయారయ్యే వంటకాలను తిరుమలలోని హోటళ్లు, ఫాస్ట్ఫుడ్ సెంటర్లలో నిలిపివేయాలని ఆరోగ్య విభాగం సూచించినట్లు సమాచారం. ఈ సూచనలు ఆగస్టు 25, 2026 నుంచి అమల్లోకి రానున్నట్లు తెలుస్తోంది.
162 హోటళ్లు, ఫాస్ట్ఫుడ్ సెంటర్లపై ప్రభావం
తిరుమలలో ప్రస్తుతం సుమారు 162 ఫాస్ట్ఫుడ్ సెంటర్లు, హోటళ్లు ఉన్నాయి. వీటితో పాటు 7 జనతా కాంటీన్లు, 5 పెద్ద కాంటీన్లు కూడా భక్తులకు ఆహారాన్ని అందిస్తున్నాయి. ఇంత పెద్ద సంఖ్యలో ఆహార కేంద్రాలు ఉండటంతో.. కూరగాయల నాణ్యత, ఆహార పరిశుభ్రతపై టీటీడీ ఆరోగ్య విభాగం ప్రత్యేకంగా దృష్టి పెడుతోంది.
ఇటీవల ఫుడ్ సేఫ్టీ అధికారులు నిర్వహించిన తనిఖీల్లో కొన్ని హోటళ్లలో క్యాలీఫ్లవర్లో పురుగులు ఉన్నట్లు గుర్తించినట్లు సమాచారం. దీంతో అధికారులు అప్రమత్తమయ్యారు. భక్తుల నుంచి కూడా క్యాలీఫ్లవర్ వంటకాలకు సంబంధించి ఫిర్యాదులు వస్తున్న నేపథ్యంలో దీనిపై మరింత జాగ్రత్త అవసరమని టీటీడీ భావిస్తున్నట్లు తెలుస్తోంది.
హోటల్ నిర్వాహకులతో టీటీడీ సమావేశం
సుమారు వారం రోజుల క్రితం తిరుమలలోని హోటల్ నిర్వాహకులతో టీటీడీ హెల్త్ విభాగం సమావేశం నిర్వహించినట్లు సమాచారం. టీటీడీ హెల్త్ డిప్యూటీ ఈవో సోమనారాయణ ఈ సమావేశంలో క్యాలీఫ్లవర్ వినియోగంపై చర్చించినట్లు తెలుస్తోంది.
ప్రస్తుత సీజన్లో క్యాలీఫ్లవర్లో పురుగులు ఉండే అవకాశం ఎక్కువగా ఉంటుందని, వంటకు ముందు సరైన విధానంలో శుభ్రం చేయకపోతే వాటి అవశేషాలు ఆహారంలోకి వెళ్లే ప్రమాదం ఉంటుందని నిర్వాహకులకు వివరించినట్లు సమాచారం. ముఖ్యంగా భక్తులకు విక్రయించే ఆహారంలో ఇలాంటి సమస్యలు తలెత్తకుండా ముందస్తు జాగ్రత్తలు తీసుకోవాలని సూచించినట్లు తెలుస్తోంది.
గోబీ 65 నుంచి గోబీ మంచూరియా వరకు..
క్యాలీఫ్లవర్ వినియోగాన్ని నిలిపివేయాలన్న సూచన అమల్లోకి వస్తే తిరుమలలో భక్తులకు అందుబాటులో ఉండే కొన్ని ఫాస్ట్ఫుడ్ ఐటమ్స్ కనిపించకుండా పోయే అవకాశం ఉంది. ముఖ్యంగా గోబీ 65, గోబీ మంచూరియా, గోబీ రైస్ వంటి వంటకాలపై ప్రభావం పడనుంది.
ఇవి హోటళ్లలో సాధారణంగా ఎక్కువగా ఆర్డర్ చేసే ఫాస్ట్ఫుడ్ ఐటమ్స్ కావడంతో.. వ్యాపారులపైనా కొంత ప్రభావం పడే అవకాశం ఉంది. అయినప్పటికీ భక్తుల ఆరోగ్యాన్ని దృష్టిలో పెట్టుకుని టీటీడీ ఆరోగ్య విభాగం సూచనలను పాటించేందుకు హోటల్ నిర్వాహకులు సిద్ధంగా ఉన్నట్లు సమాచారం.
తిరుపతి నుంచి క్యాలీఫ్లవర్ సరఫరాపైనా నిఘా?
కేవలం వంటకాలను నిలిపివేయడంతో పాటు తిరుపతి నుంచి తిరుమలకు సరఫరా అయ్యే కూరగాయల్లో క్యాలీఫ్లవర్ చేరకుండా చూసే అంశం కూడా చర్చకు వస్తోంది. ఒకవేళ టీటీడీ పూర్తిస్థాయి నిషేధాన్ని అమలు చేస్తే.. సరఫరా వ్యవస్థలోనే క్యాలీఫ్లవర్ను నియంత్రించాల్సి ఉంటుంది.
అలాంటి పరిస్థితుల్లో తిరుమలకు వచ్చే కూరగాయలపై టీటీడీ విజిలెన్స్ విభాగం మరింత నిఘా పెట్టే అవకాశం ఉందని తెలుస్తోంది. అయితే దీనిపై టీటీడీ నుంచి పూర్తి స్థాయి అధికారిక ఉత్తర్వులు వెలువడాల్సి ఉంది.
అన్నదాన కేంద్రంలోనూ క్యాలీఫ్లవర్పై సందిగ్ధత
తిరుమలలోని తరిగొండ వెంగమాంబ నిత్య అన్నదాన కేంద్రంలో క్యాలీఫ్లవర్ వినియోగంపై మాత్రం ప్రస్తుతం స్పష్టత లేదని సమాచారం. నిత్యం భారీ సంఖ్యలో భక్తులు అన్నప్రసాదాన్ని స్వీకరిస్తుండగా, పెద్ద మొత్తంలో కూరగాయలు టీటీడీకి దాతల నుంచి ఉచితంగా అందుతుంటాయి.
రోజుకు దాదాపు 20 టన్నుల కూరగాయలు టీటీడీకి అందుతున్నట్లు సమాచారం. దాతలు అందించే కూరగాయల్లో అప్పుడప్పుడు క్యాలీఫ్లవర్ కూడా ఉంటుంది. ఈ నేపథ్యంలో హోటళ్లకు ఇచ్చిన ఆరోగ్య విభాగం సూచనలను అన్నదానం విభాగం కూడా అమలు చేయాలా? అనే అంశంపై ప్రస్తుతం చర్చ జరుగుతున్నట్లు తెలుస్తోంది.
అన్నదానంలో గోబీ కూర కూడా నిలిచిపోతుందా?
టీటీడీ అధికారికంగా క్యాలీఫ్లవర్పై పూర్తిస్థాయి నిషేధం విధిస్తే.. అన్నదాన కేంద్రంలోనూ దాని వినియోగాన్ని నిలిపివేసే అవకాశం ఉంది. అంతేకాదు, దాతలు క్యాలీఫ్లవర్ను విరాళంగా తీసుకొచ్చినా స్వీకరించకుండా ఉండే అవకాశం ఉందని తెలుస్తోంది.
ప్రస్తుతం అప్పుడప్పుడు అన్నదానంలో క్యాలీఫ్లవర్తో కూర తయారు చేస్తున్న నేపథ్యంలో.. టీటీడీ తుది నిర్ణయం ఎలా ఉండబోతుందనే దానిపై ఆసక్తి నెలకొంది.
భక్తుల ఆరోగ్యమే ప్రధాన ప్రాధాన్యం
తిరుమలకు వచ్చే భక్తులకు పరిశుభ్రమైన, నాణ్యమైన ఆహారాన్ని అందించడమే లక్ష్యంగా టీటీడీ ఆరోగ్య విభాగం ఈ చర్యలు చేపడుతున్నట్లు తెలుస్తోంది. క్యాలీఫ్లవర్లో పురుగులు ఉండే అవకాశం ఉన్న సమయంలో దాన్ని శుభ్రపరిచే విషయంలో నిర్లక్ష్యం జరిగితే ఆహార భద్రత సమస్యలు తలెత్తవచ్చన్న ఆందోళనతోనే ఈ సూచనలు చేసినట్లు సమాచారం.
అయితే ఇది ప్రస్తుతం ప్రధానంగా హోటళ్లు, ఫాస్ట్ఫుడ్ సెంటర్లకు సంబంధించిన ఆరోగ్య విభాగం సూచనగా కనిపిస్తోంది. తిరుమలలోని అన్నదానం, ఇతర టీటీడీ ఆధ్వర్యంలోని ఆహార కేంద్రాలకు కూడా ఇదే నిబంధన వర్తిస్తుందా? క్యాలీఫ్లవర్ను పూర్తిగా తిరుమలలోకి రాకుండా నిషేధిస్తారా? అనే విషయాలపై అధికారికంగా స్పష్టత రావాల్సి ఉంది.
ఒకవేళ టీటీడీ పూర్తిస్థాయి నిషేధాన్ని అమలు చేస్తే.. తిరుమల కొండపై గోబీ రైస్, గోబీ 65, గోబీ మంచూరియా వంటి వంటకాలు కనిపించకపోవడమే కాకుండా క్యాలీఫ్లవర్ సరఫరాపైనా నియంత్రణలు వచ్చే అవకాశం ఉంది. దీనిపై టీటీడీ తీసుకోబోయే తుది నిర్ణయం కోసం భక్తులు, హోటల్ నిర్వాహకులు ఆసక్తిగా ఎదురుచూస్తున్నారు.