Domestic LPG Cylinder: దేశంలోని మధ్యతరగతి, సామాన్య ప్రజలపై మరోసారి ధరల భారం పడింది. నిత్యావసరాల ధరలతో ఇప్పటికే సతమతమవుతున్న సామాన్యుడికి గ్యాస్ కంపెనీలు గట్టి షాక్ ఇచ్చాయి. దేశవ్యాప్తంగా గృహ వినియోగ గ్యాస్ సిలిండర్ (Domestic LPG Cylinder) ధరను పెంచుతూ నిర్ణయం తీసుకున్నారు. ఈ సారి సిలిండర్పై రూ.29 మేర భారం పడింది. మూడు నెలల స్వల్ప వ్యవధిలోనే డొమెస్టిక్ సిలిండర్ ధర పెరగడం ఇది రెండోసారి కావడంతో వినియోగదారులు ఆందోళన వ్యక్తం చేస్తున్నారు.
పెంచిన ఈ సవరించిన ధరలు నేటి నుంచే అమల్లోకి రానున్నాయి. ఈ పెంపుతో దేశ రాజధాని ఢిల్లీలో 14.2 కిలోల ఎల్పీజీ సిలిండర్ ధర రూ.913 నుంచి రూ.942కు చేరుకుంది.
మూడు నెలల్లో రెండోసారి బాదుడు.. కారణం ఇదే!
పశ్చిమాసియాలో నెలకొన్న యుద్ధ వాతావరణం, ఉద్రిక్తతల కారణంగా అంతర్జాతీయంగా ఇంధన మార్కెట్లో తీవ్ర మార్పులు చోటుచేసుకుంటున్నాయి. ఈ క్రమంలోనే గత మార్చి 7న గృహ వినియోగ LPG సిలిండర్ ధరను ఏకంగా రూ.60 పెంచారు. ఆ తర్వాత అంతర్జాతీయంగా ముడిచమురు, గ్యాస్ ధరల్లో హెచ్చుతగ్గులు ఉన్నప్పటికీ కొంతకాలం ధరలను స్థిరంగా ఉంచారు. కానీ, ప్రస్తుత పరిస్థితుల నేపథ్యంలో మళ్లీ ఇప్పుడు రూ.29 పెంచక తప్పలేదు.
వాణిజ్య సిలిండర్ల ధరలు కూడా భారీగానే..
గత కొన్ని నెలలుగా ఇరాన్-ఇజ్రాయెల్-అమెరికా మధ్య నడుస్తున్న యుద్ధ సంక్షోభం కారణంగా అంతర్జాతీయంగా సరఫరా సమస్యలు తలెత్తాయి. అయినప్పటికీ, ప్రభుత్వం గృహ వినియోగ సిలిండర్ల జోలికి వెళ్లకుండా మే 1న వాణిజ్య (Commercial LPG) ఎల్పీజీ సిలిండర్ల ధరలను భారీగా పెంచింది. మే 1న వాణిజ్య సిలిండర్ ధరను రూ.993, అలాగే చిన్న వ్యాపారులకు ఉపయోగపడే 5 కేజీల సిలిండర్ ధరను రూ.261 పెంచారు. ఆ తర్వాత జూన్ 1న కూడా వాణిజ్య సిలిండర్ ధరపై మరో రూ.42 అదనంగా పెరిగింది. వాణిజ్య సిలిండర్ల భారం పూర్తయిన తర్వాత, ఇప్పుడు గృహ వినియోగదారుల వంతు వచ్చింది.
గ్యాస్ కొరత ఉందా? కేంద్ర ప్రభుత్వం ఏమంది?
ధరల పెరుగుదల, పశ్చిమాసియా యుద్ధం నేపథ్యంలో దేశంలో గ్యాస్ సిలిండర్ల కొరత ఏర్పడుతుందా? అనే అనుమానాలు ప్రజల్లో మొదలయ్యాయి. అయితే ఈ ఊహాగానాలపై కేంద్ర పెట్రోలియం, సహజ వాయువుల మంత్రిత్వ శాఖ అధికారిక ప్రకటనతో స్పష్టతనిచ్చింది.
మంత్రిత్వ శాఖ స్పష్టీకరణ:
“దేశంలో ఎల్పీజీ గ్యాస్ సిలిండర్ల సరఫరాకు సంబంధించి ఎలాంటి అంతరాయం లేదు. సరఫరా పూర్తిగా సాధారణంగా, సాఫీగా సాగుతోంది. అంతర్జాతీయంగా సంక్షోభం ఉన్నప్పటికీ, దేశంలోని ఏ రిటైల్ గ్యాస్ ఏజెన్సీ కూడా గ్యాస్ కొరత ఉన్నట్లు నివేదించలేదు. వినియోగదారులు ఆందోళన చెందాల్సిన అవసరం లేదు” అని మంత్రిత్వ శాఖ తెలిపింది. అంతేకాకుండా, ధరల పెరుగుదల నేపథ్యంలో ఎల్పీజీ గ్యాస్ సిలిండర్ల అక్రమ నిల్వలు (Hoarding), బ్లాక్ మార్కెటింగ్కు పాల్పడే వారిపై దేశవ్యాప్తంగా కఠిన నిఘా ఉంచామని, నిరంతర తనిఖీలు, చర్యలు కొనసాగుతున్నాయని ప్రభుత్వం స్పష్టం చేసింది.
ఇప్పటికే పెట్రోల్, డీజిల్ ధరల పెరుగుదలపై సర్వత్రా చర్చ నడుస్తుండగా, ఇప్పుడు వంటింటి గ్యాస్ ధర కూడా పెరగడం సామాన్యుడి బడ్జెట్ను తలకిందులు చేసే విషయమే. రానున్న రోజుల్లో అంతర్జాతీయ మార్కెట్లో చమురు ధరలు అదుపులోకి వస్తేనే గ్యాస్ ధరలు తగ్గే అవకాశం ఉందని నిపుణులు అంచనా వేస్తున్నారు.
ఇవీ చదవండి: LPG Gas Price Hike: కమర్షియల్ గ్యాస్ సిలిండర్ ధరల పెంపు.. హోటళ్లలో ఆహార ధరలు పెరగనున్నాయా?
India Gas Shortage: LPG కొరతతో పెరిగిన డిమాండ్.. 5 కేజీ సిలిండర్ కోసం క్యూ కడుతున్న ప్రజలు
LPG Crisis: ఇరాన్–ఇజ్రాయెల్ ఉద్రిక్తతల తర్వాత భారత్కు ఊరట.. గ్యాస్ సరఫరాపై కేంద్రం కీలక ప్రకటన
LPG News: గ్యాస్ కొరత ప్రభావం.. త్వరలో 10 కేజీల ఎల్పీజీ సిలిండర్? కేంద్రం కొత్త ప్లాన్