Andhra Pradesh Pensions: ఆంధ్రప్రదేశ్లో కొత్త పింఛన్ల కోసం ఎదురుచూస్తున్న లక్షలాది మంది ప్రజలకు కూటమి ప్రభుత్వం శుభవార్త అందించింది. రాష్ట్రంలో కొత్త పింఛన్ల మంజూరుకు ప్రభుత్వం సిద్ధమవుతోంది. జూన్ నెల నుంచి కొత్త పింఛన్ల కోసం దరఖాస్తు చేసుకునే అవకాశాన్ని కల్పించనున్నట్లు సమాచారం. ముందుగా వితంతువులు, దివ్యాంగులకు పింఛన్లు మంజూరు చేసి, ఆ తరువాత వృద్ధాప్య పింఛన్లను పరిశీలించనున్నట్లు ప్రభుత్వ వర్గాలు వెల్లడించాయి.
జూన్ 12 నుంచి కొత్త పింఛన్ల మంజూరు
జూన్ 12వ తేదీకి కూటమి ప్రభుత్వం అధికారంలోకి వచ్చి రెండేళ్లు పూర్తవుతున్న నేపథ్యంలో ఆ రోజునుంచే కొత్త పింఛన్ల మంజూరు ప్రారంభించాలని ప్రభుత్వం భావిస్తోంది. రాష్ట్రవ్యాప్తంగా ఇప్పటివరకు 1.53 లక్షల మంది వితంతువులు పింఛన్కు అర్హత సాధించినట్లు ప్రభుత్వం గుర్తించింది. ఈ వితంతువులు చాలా కాలంగా పింఛన్ల కోసం ఎదురుచూస్తున్నారు. ఇప్పుడు ప్రభుత్వం చర్యలు ప్రారంభించడంతో త్వరలోనే వారికి పింఛన్లు అందే అవకాశం ఉంది.
నెలకు రూ.61 కోట్ల ఖర్చు
1.53 లక్షల మంది వితంతువులకు పింఛన్లు ఇవ్వాలంటే నెలకు సుమారు రూ.61 కోట్లు అవసరమవుతాయని ప్రభుత్వం అంచనా వేసింది. మొదటగా వితంతువులకు పింఛన్లు మంజూరు చేసి, ఆ తర్వాత దివ్యాంగులకు ఇవ్వాలని నిర్ణయించినట్లు తెలుస్తోంది.
దివ్యాంగుల కోటాలో లక్ష మంది దరఖాస్తులు
దివ్యాంగుల కోటాలో ఇప్పటికే లక్ష మంది పింఛన్ల కోసం దరఖాస్తు చేసుకున్నారు. రాష్ట్రంలో మొత్తం 28 కేటగిరీలలో ప్రభుత్వం పింఛన్లు అందిస్తోంది. ఈ కేటగిరీలలో దాదాపు 10 లక్షల మంది కొత్తగా దరఖాస్తు చేసే అవకాశముందని అధికారులు అంచనా వేస్తున్నారు. ఈ మొత్తం పింఛన్లను మంజూరు చేయాలంటే ప్రభుత్వం నెలకు దాదాపు రూ.400 కోట్ల వరకు ఖర్చు చేయాల్సి ఉంటుంది. అంటే సంవత్సరానికి సుమారు రూ.4,800 కోట్లు వ్యయం కావొచ్చని అంచనా వేస్తున్నారు.
అనర్హుల తొలగింపు ప్రక్రియ
రాష్ట్రంలో దివ్యాంగుల కోటాలో మొత్తం 6.50 లక్షల మంది పింఛన్ల కోసం దరఖాస్తు చేసుకున్నట్లు సమాచారం. అయితే వీరిలో సుమారు ఒక లక్ష మంది అనర్హులుగా ఉన్నట్లు ప్రభుత్వ విచారణలో తేలింది. దీంతో అర్హులైన వారికి మాత్రమే పింఛన్లు అందేలా ప్రభుత్వం చర్యలు చేపడుతోంది. అనర్హులైన వారి పేర్లను జాబితా నుంచి తొలగించే ప్రక్రియ కూడా ప్రారంభమైంది.
సదరం సర్టిఫికేట్లు పూర్తిగా ఆన్లైన్
దివ్యాంగుల పింఛన్ల ప్రక్రియను వేగవంతం చేసేందుకు ప్రభుత్వం సదరం సర్టిఫికేట్ల జారీని పూర్తిగా డిజిటల్ విధానంలోకి తీసుకొచ్చింది. ఇక నుంచి సదరం సర్టిఫికేట్ కోసం ఆన్లైన్లోనే స్లాట్ బుకింగ్ చేసుకునే అవకాశం ఉంటుంది. స్లాట్ బుక్ చేసిన తర్వాత నిర్దిష్ట సమయానికి ప్రభుత్వ ఆస్పత్రికి వెళ్లి వైద్య పరీక్షలు చేయించుకోవాలి. పరీక్షల అనంతరం సర్టిఫికేట్ను ఆన్లైన్లోనే డౌన్లోడ్ చేసుకోవచ్చు.
పాత విధానం రద్దు
గతంలో సదరం సర్టిఫికేట్ కోసం గ్రామ లేదా వార్డు సచివాలయాలకు వెళ్లి ఆఫ్లైన్లో స్లాట్ బుక్ చేసుకోవాల్సి వచ్చేది. దీంతో ప్రక్రియ ఆలస్యమవుతుండేది. ఇప్పుడు ఆన్లైన్ విధానం ద్వారా ఈ సమస్యకు పరిష్కారం లభించింది.
త్వరలో వృద్ధాప్య పింఛన్ల దరఖాస్తులు
వితంతు, దివ్యాంగుల పింఛన్ల ప్రక్రియ పూర్తయ్యాక వృద్ధాప్య పింఛన్ల కోసం కూడా ప్రభుత్వం దరఖాస్తులను స్వీకరించనుంది. దీంతో రాష్ట్రంలో వేలాది మంది కొత్తగా పింఛన్ల లబ్ధిదారులుగా మారే అవకాశం ఉంది.
ఇవీ చదవండి: Andhra Pradesh Crime: 15 తులాల బంగారం మిస్సింగ్.. ఇంట్లోకి రానివ్వని భర్త.. పసికందుతో ఇంటి ముందు మహిళ
Andhra Crime: గంజాయి స్మగ్లింగ్ లో కొత్తగా పెళ్లయిన దంపతులు.. విజయనగరంలో నలుగురు అరెస్ట్
Andhra Pradesh: సంక్షోంభంలో మొక్కజొన్న రైతులు.. డిస్ట్రెస్ సేల్తో వేల కోట్ల నష్టం జరుగుతుందని ఎంవీఎస్ నాగిరెడ్డి హెచ్చరిక