Andhra Pradesh : ప్రజల ప్రతినిధులు తమ బాధ్యతలను విస్మరిస్తే ప్రజాస్వామ్యంపై నమ్మకం దెబ్బతింటుందని ఆంధ్రప్రదేశ్ శాసనసభ స్పీకర్ చింతకాయల అయ్యన్నపాత్రుడు స్పష్టం చేశారు. చట్టసభలకు హాజరుకాని ప్రజాప్రతినిధులకు “నో వర్క్ – నో పే” నిబంధనను తప్పనిసరిగా అమలు చేయాలని ఆయన సంచలన ప్రతిపాదన చేశారు. అవసరమైతే ప్రజలే తమ ప్రతినిధులను వెనక్కి పిలిపించుకునేలా “రైట్ టు రీకాల్” హక్కును కల్పించాలని సూచించారు.
ఉత్తరప్రదేశ్లో నిర్వహించిన 86వ అఖిల భారత చట్టసభల సభాపతుల మహాసభలో బుధవారం ఆయన పాల్గొన్నారు. ఈ సందర్భంగా “ప్రజల పట్ల శాసనవ్యవస్థ జవాబుదారీతనం” అనే అంశంపై మాట్లాడారు.
అసెంబ్లీకి రాని సభ్యులపై ఆవేదన
ఆంధ్రప్రదేశ్ శాసనసభలో నెలకొన్న పరిస్థితులపై స్పీకర్ తీవ్ర ఆవేదన వ్యక్తం చేశారు. 2024 జూన్లో ఎన్నికైన తర్వాత నుంచి కొంతమంది ఎమ్మెల్యేలు ఇప్పటివరకు ఒక్కరోజు కూడా సభకు హాజరు కాలేదని ఆయన తెలిపారు. సభలో చర్చల్లో పాల్గొనకపోయినా, వేతనాలు, భత్యాలు మాత్రం క్రమం తప్పకుండా తీసుకుంటున్నారని పేర్కొన్నారు. ఇలాంటి ప్రవర్తన ప్రజాస్వామ్య వ్యవస్థకు ప్రమాదకరమని, దీని వల్ల ప్రజల్లో చట్టసభలపై విశ్వాసం తగ్గిపోతుందని అయ్యన్నపాత్రుడు గారు హెచ్చరించారు.
స్పష్టమైన నిబంధనలు లేవని వ్యాఖ్య
సభకు హాజరుకాని సభ్యులపై చర్యలు తీసుకునేందుకు ప్రస్తుతం చట్టసభల్లో స్పష్టమైన నిబంధనలు లేవని ఆయన తెలిపారు. ఈ అంశంపై లోక్సభ స్పీకర్ ఓం బిర్లా మార్గదర్శకత్వం వహించాలని కోరారు.
ఈ సందర్భంగా ఆయన రెండు ప్రధాన ప్రతిపాదనలు చేశారు —
నో వర్క్ – నో పే:
ఉద్యోగులు విధులకు రాకపోతే జీతం కోత విధించినట్లే, చట్టసభలకు రాని ప్రజాప్రతినిధులకు కూడా జీతాలు, భత్యాలు నిలిపివేయాలని సూచించారు.
రైట్ టు రీకాల్:
ప్రజాప్రతినిధులు తమ బాధ్యతను నిర్వర్తించకపోతే, రాజ్యాంగం లేదా ప్రజాప్రాతినిధ్య చట్టాన్ని సవరించి అయినా సరే, ఓటర్లకు వారిని వెనక్కి పిలిపించే హక్కు కల్పించాలని అభిప్రాయపడ్డారు.
తగ్గిపోతున్న చట్టసభల పనిదినాలు
ఇటీవలి కాలంలో చట్టసభల పనిదినాలు ఏటికాయేడు తగ్గిపోతుండటం వ్యవస్థ అనారోగ్యానికి నిదర్శనమని స్పీకర్ ఆందోళన వ్యక్తం చేశారు. ప్రతి ఏడాది కనీసం 60 రోజులైనా శాసనసభలు పనిచేయాలని, అప్పుడే ప్రశ్నోత్తరాలు, చర్చల ద్వారా ప్రభుత్వాన్ని నిలదీసే అవకాశం ఉంటుందని తెలిపారు. అప్పుడు మాత్రమే ప్రజల పట్ల నిజమైన జవాబుదారీతనం సాధ్యమవుతుందని స్పష్టం చేశారు.
ప్రజల నమ్మకం తిరిగి పొందాల్సిన అవసరం
ప్రజాప్రతినిధుల పట్ల ప్రజల్లో నమ్మకం క్రమంగా సన్నగిల్లుతోందని అయ్యన్నపాత్రుడు గారు అన్నారు. సభ్యులంతా ఆత్మవిమర్శ చేసుకుని ప్రజల ఆకాంక్షలకు అనుగుణంగా పనిచేయాలని హితవు పలికారు. ఈ సమావేశంలో ఆంధ్రప్రదేశ్ డిప్యూటీ స్పీకర్ రఘురామకృష్ణం రాజు, అసెంబ్లీ సెక్రటరీ జనరల్ ప్రసన్న కుమార్ తదితరులు పాల్గొన్నారు.
ఇవీ చదవండి: AP Assembly: అసెంబ్లీ అధికారులపై స్పీకర్ అయ్యన్నపాత్రుడు ఆగ్రహం
Jagan Pressmeet : వైఎస్ జగన్ సుదీర్ఘ ప్రెస్ మీట్.. రైతులు, ఆరోగ్యశ్రీ, ఉద్యోగులు, వైజాగ్ స్టీల్ ప్లాంట్, లడ్డూ, పరకామణి, చంద్రబాబు కేసులు..