Bangladesh : బంగ్లాదేశ్లో మైనారిటీ హిందువులపై హింస ఆగడం లేదు. వరుస దాడులు, హత్యలతో అక్కడి హిందూ సమాజం భయాందోళనలో ఉంది. ఇటీవల జరిగిన దిపు చంద్ర దాస్, అమృత్ మండల్ హత్యల ఘటనలు మరువకముందే, ఇప్పుడు మైమెన్సింగ్లో మరో దారుణం చోటుచేసుకుంది.
మైమెన్సింగ్ లోని ఓ వస్త్ర కర్మాగారంలో పనిచేస్తున్న 42 ఏళ్ల బజేంద్ర బిశ్వాస్ను వందలాది మంది చూస్తుండగానే కాల్చి చంపిన ఘటన తీవ్ర కలకలం రేపింది. ఈ ఘటనలో నిందితుడిగా గుర్తించిన 22 ఏళ్ల నోమన్ మియాన్ను పోలీసులు వెంటనే అదుపులోకి తీసుకున్నారు.
ఫ్యాక్టరీలోనే ఘాతుకం
సమాచారం ప్రకారం, బజేంద్ర బిశ్వాస్ మరియు నోమన్ మియాన్ ఇద్దరూ అదే వస్త్ర కర్మాగారంలో సెక్యూరిటీ గార్డులుగా పనిచేస్తున్నారు. ముందస్తు ప్రణాళికతోనే నోమన్ తన వద్ద ఉన్న తుపాకీని తీసి బజేంద్రపై గురిపెట్టాడని ప్రత్యక్ష సాక్షులు చెబుతున్నారు. అకస్మాత్తుగా జరిగిన కాల్పుల్లో బజేంద్ర అక్కడికక్కడే ప్రాణాలు కోల్పోయారు.
గ్రామ రక్షణలో క్రియాశీల పాత్ర
బజేంద్ర బిశ్వాస్ కేవలం ఫ్యాక్టరీ ఉద్యోగి మాత్రమే కాకుండా, తన గ్రామ భద్రత కోసం ఏర్పాటైన ఓ పారామిలిటరీ తరహా రక్షణ బృందంలో క్రియాశీల సభ్యుడిగా పనిచేసినట్టు సమాచారం. ఇటీవల హిందూ గ్రామాలపై దాడులు పెరుగుతున్న నేపథ్యంలో, వాటిని అడ్డుకోవడంలో ఆయన ముందుండేవారని స్థానికులు చెబుతున్నారు. ఇదే కారణంగా ఆయన లక్ష్యంగా మారి ఉండవచ్చన్న అనుమానాలు వ్యక్తమవుతున్నాయి.
మైమెన్సింగ్లోనే గతంలోనూ దారుణాలు
ఇదే ప్రాంతంలో గతంలో దిపు చంద్ర దాస్ హత్య దేశవ్యాప్తంగా తీవ్ర ఆగ్రహానికి కారణమైంది. ఫ్యాక్టరీ నుంచి బలవంతంగా ఈడ్చుకెళ్లి, వీధుల్లో కొట్టి చంపిన తర్వాత అతడి మృతదేహాన్ని చెట్టుకు కట్టి నిప్పంటించిన ఘటన అప్పట్లో సంచలనంగా మారింది. ఈ తరహా ఘటనలు బంగ్లాదేశ్లో మైనారిటీల భద్రతపై తీవ్ర సందేహాలు రేకెత్తిస్తున్నాయి.
తాత్కాలిక ప్రభుత్వంపై విమర్శలు
శాంతిభద్రతలు పరిరక్షిస్తామని ప్రకటించిన మహమ్మద్ యూనుస్ నేతృత్వంలోని తాత్కాలిక ప్రభుత్వం, మైనారిటీల ప్రాణాలను కాపాడటంలో విఫలమవుతోందన్న విమర్శలు వెల్లువెత్తుతున్నాయి. కేవలం ఈ ఏడాది డిసెంబర్ నెలలోనే ఎనిమిది మందికి పైగా హిందువులు హింసాత్మక ఘటనల్లో ప్రాణాలు కోల్పోయినట్టు నివేదికలు చెబుతున్నాయి.
భారత్తో పాటు అంతర్జాతీయ ఆందోళన
బంగ్లాదేశ్లో హిందువులపై జరుగుతున్న వరుస హత్యలపై భారత్ సహా పలు దేశాలు ఇప్పటికే ఆందోళన వ్యక్తం చేశాయి. ఫ్యాక్టరీలు, వీధుల్లో బహిరంగంగా జరుగుతున్న ఈ దాడులు అక్కడి హిందూ సమాజంలో తీవ్ర భయాన్ని నింపుతున్నాయి. ఈ పరిస్థితులు బంగ్లాదేశ్ను మరింత అస్థిరత వైపు నెడుతున్నాయని రాజకీయ విశ్లేషకులు హెచ్చరిస్తున్నారు.
ఇవీ చదవండి: Abul Kalam Azad: మైనార్టీలకు వైయస్సార్ రిజర్వేషన్లు ఇస్తే, నేను మంత్రివర్గంలో సముచిత స్థానం కల్పించా: సీఎం జగన్
Sheikh Hasina : బంగ్లాదేశ్ మాజీ ప్రధాని షేక్ హసీనాకు ఉరిశిక్ష.. విదేశంలో ఉన్నప్పటికీ చరిత్రలో ముద్ర వేసిన తీర్పు