ODI Cricket: వన్డే క్రికెట్ భవిష్యత్తుపై భారత క్రికెట్ అభిమానుల్లో చర్చ మొదలైంది. 2027 ప్రపంచకప్ అనంతరం వన్డే అంతర్జాతీయ (ODI) ఫార్మాట్ నెమ్మదిగా అంతరించిపోయే ప్రమాదం ఉందని భారత మాజీ స్పిన్నర్ రవిచంద్రన్ అశ్విన్ సంచలన వ్యాఖ్యలు చేశారు. టీ20 క్రికెట్ వేగంగా విస్తరిస్తుండటం, అంతర్జాతీయ షెడ్యూలింగ్ ఒత్తిళ్లు, స్టార్ ఆటగాళ్లపై ఆధారపడే పరిస్థితి వన్డేలకు పెద్ద సవాల్గా మారిందని ఆయన అభిప్రాయపడ్డారు.
తన యూట్యూబ్ ఛానెల్ Ash Ki Baatలో మాట్లాడిన అశ్విన్, “2027 ప్రపంచకప్ తర్వాత వన్డే క్రికెట్ భవిష్యత్తు ఎలా ఉంటుందో నాకు స్పష్టత లేదు. నిజంగా చెప్పాలంటే ఈ ఫార్మాట్ గురించి నేను ఆందోళన చెందుతున్నాను” అని చెప్పారు. టెస్ట్ క్రికెట్కు ఎప్పటికీ ఒక ప్రత్యేక స్థానం ఉంటుందని, కానీ వన్డేలు మాత్రం ఆ స్థాయిలో నిలబడతాయా అనే సందేహం ఉందని వ్యాఖ్యానించారు.
టీ20 లీగ్లు ప్రపంచవ్యాప్తంగా విస్తరిస్తుండటంతో, ప్రేక్షకుల దృష్టి చిన్న ఫార్మాట్ వైపే ఎక్కువగా మళ్లుతోందని అశ్విన్ పేర్కొన్నారు. అదే సమయంలో టెస్ట్ క్రికెట్కు సంప్రదాయం, గౌరవం కారణంగా అభిమానులు ఇప్పటికీ ఉన్నారని, కానీ వన్డేలు ఈ రెండు ఫార్మాట్ల మధ్య ఇరుక్కుపోయాయని విశ్లేషించారు.
డొమెస్టిక్ వన్డే క్రికెట్కు స్టార్ ఆటగాళ్లే ప్రాణమని అశ్విన్ స్పష్టం చేశారు. విరాట్ కోహ్లీ, రోహిత్ శర్మ వంటి ఆటగాళ్లు విజయ్ హజారే ట్రోఫీ వంటి టోర్నమెంట్లలో పాల్గొన్నప్పుడు మాత్రమే ప్రజల్లో ఆసక్తి పెరుగుతుందని చెప్పారు. “వారు ఆడటం మానేసిన తర్వాత ఆ టోర్నీలను ఎవరు చూస్తారు?” అంటూ అశ్విన్ ప్రశ్నించారు.
వన్డే క్రికెట్ స్వభావం కూడా మారిపోయిందని ఆయన అభిప్రాయపడ్డారు. రెండు కొత్త బంతులు, ఇన్నింగ్స్ ప్రారంభంలోనే పరిమిత ఫీల్డర్లు సర్కిల్లో ఉండటం వంటి నిబంధనల వల్ల వన్డేల్లో వ్యూహాత్మక పోరాటం తగ్గిపోయిందన్నారు. ఒకప్పుడు ఎంఎస్ ధోనీ వంటి గొప్ప ఆటగాళ్లను తయారు చేసిన వన్డే ఫార్మాట్, ఇప్పుడు తన అసలైన గుర్తింపును కోల్పోయిందని వ్యాఖ్యానించారు.
అంతర్జాతీయ షెడ్యూల్పై కూడా అశ్విన్ తీవ్ర వ్యాఖ్యలు చేశారు. ఆదాయం పెంచాలనే ఉద్దేశంతో ICC తరచూ టోర్నమెంట్లు నిర్వహిస్తుండటంతో ప్రపంచకప్ విలువ తగ్గుతోందని చెప్పారు. FIFA మాదిరిగా నాలుగేళ్లకు ఒకసారి మాత్రమే ప్రపంచకప్ నిర్వహించి, మధ్యలో లీగ్లకు ప్రాధాన్యత ఇవ్వాలని సూచించారు.
“వరుసగా ద్వైపాక్షిక సిరీస్లు, ఎక్కువ ఫార్మాట్లు, తరచూ జరిగే ప్రపంచకప్లు ఈ క్రీడను అతిగా మారుస్తున్నాయి. ఈ పరిస్థితుల్లో వన్డే క్రికెట్ నెమ్మదిగా కనుమరుగయ్యే దిశగా వెళ్తోందని నేను భావిస్తున్నాను” అంటూ అశ్విన్ తన వ్యాఖ్యలను ముగించారు.
ఇవీ చదవండి: Team India : టీమిండియాకు బిగ్ షాక్: దక్షిణాఫ్రికా వన్డే సిరీస్ నుంచి స్టార్ ప్లేయర్ ఔట్! కారణం?
IND vs AUS: అభిమానులకు నిరాశ – వన్డే సిరీస్కు దూరమైన కోహ్లీ, రోహిత్
