అక్టోబర్ 2న ఓటీటీలోకి
#Love అక్టోబర్ 2 నుంచి నెట్ఫ్లిక్స్లో స్ట్రీమింగ్ కానుంది. ముఖ్యంగా ఈ సిరీస్ తమిళంతో పాటు తెలుగు, హిందీ, కన్నడ, మలయాళం భాషల్లోనూ అందుబాటులోకి రానుంది. నెట్ఫ్లిక్స్ ఇండియా ఇప్పటికే ఈ విషయాన్ని అధికారికంగా ప్రకటించింది. ఈ సిరీస్కు ప్రముఖ దర్శకుడు బాలాజీ మోహన్ దర్శకత్వం వహించారు. ‘కాదల్లో సొదప్పువదు ఎప్పడి’, ‘మారి’ వంటి సినిమాలతో గుర్తింపు తెచ్చుకున్న ఆయన.. ఈసారి డేటింగ్ యాప్స్, ఆధునిక ప్రేమ, సంబంధాల చుట్టూ కథను రూపొందించారు. సిరీస్కు నిర్మాణ సంస్థ May6 Entertainment Factory.
డేటింగ్ యాప్ చుట్టూ కథ
ట్రైలర్ ప్రకారం ఐశ్వర్య లక్ష్మి తారా అనే డేటింగ్ యాప్ కంపెనీ ఫౌండర్గా కనిపించనున్నారు. ఆమె నిర్వహించే FOUND యాప్లో ప్రేమను కనుగొనడంలో ‘కాంపాటిబిలిటీ’కి ప్రాధాన్యం ఉంటుంది. మరోవైపు అర్జున్ దాస్ మాథ్యూ పాత్రలో కనిపిస్తారు. అతను Find My Bae అనే మరో డేటింగ్ ప్లాట్ఫామ్ను నిర్వహిస్తుంటాడు. మాథ్యూ మాత్రం ప్రేమలో ‘కెమిస్ట్రీ’ ముఖ్యమని నమ్ముతాడు. ఇలా ప్రేమ విషయంలో ఇద్దరికీ భిన్నమైన సిద్ధాంతాలు ఉంటాయి.
60 రోజుల ఛాలెంజ్
తారా, మాథ్యూ ఇద్దరూ ఇతరులకు ప్రేమను వెతికి పెట్టే డేటింగ్ యాప్ కంపెనీలను నడుపుతుంటారు. కానీ వారి వ్యక్తిగత జీవితాల్లో మాత్రం ప్రేమ విషయంలో స్పష్టత ఉండదు. ఈ పరిస్థితుల్లో ఇద్దరి మధ్య జరిగే ఓ ఛాలెంజ్ కథకు కీలకంగా మారుతుంది. తనకు సరైన భాగస్వామిని కనుగొనగలరా అనే సవాల్తో మొదలైన ఈ ప్రయాణం చివరకు తారా, మాథ్యూనే ఒకరినొకరు అర్థం చేసుకునే పరిస్థితికి తీసుకెళ్తుంది. కెమిస్ట్రీ ముఖ్యమా? కాంపాటిబిలిటీ ముఖ్యమా? అనే ప్రశ్న చుట్టూ కథ సాగుతుంది.
ప్రేమకు యాప్ పరిష్కారమా?
ప్రస్తుత కాలంలో డేటింగ్ యాప్స్ ద్వారా పరిచయాలు, సంబంధాలు ఏర్పడుతున్న నేపథ్యంలో #Love సిరీస్ అదే అంశాన్ని వినోదాత్మకంగా చూపించనుంది. ఒక వ్యక్తికి సరైన భాగస్వామిని ఆల్గారిథమ్ నిర్ణయించగలదా? లేక ఇద్దరి మధ్య సహజంగా ఏర్పడే అనుబంధమే ప్రేమకు అసలు ఆధారమా? అనే అంశాలు కథలో ఆసక్తికరంగా మారనున్నాయి. అయితే ఇది కేవలం ఇద్దరు వ్యక్తుల ప్రేమకథ మాత్రమే కాదని దర్శకుడు బాలాజీ మోహన్ తెలిపారు. స్నేహం, కుటుంబం, కెరీర్, వ్యక్తిగత లక్ష్యాలు, తనను తాను అర్థం చేసుకునే ప్రయాణం కూడా కథలో భాగమని ఆయన వెల్లడించారు.
కొత్త జంటగా అర్జున్, ఐశ్వర్య
అర్జున్ దాస్, ఐశ్వర్య లక్ష్మి తొలిసారి ఈ తరహా రొమాంటిక్ వెబ్ సిరీస్లో జంటగా కనిపిస్తున్నారు. ట్రైలర్లో వీరిద్దరి మధ్య జరిగే సంభాషణలు, వాదనలు, సరదా సన్నివేశాలు కథకు ప్రధాన ఆకర్షణగా కనిపిస్తున్నాయి. తారా పాత్రలో ఐశ్వర్య లక్ష్మి లక్ష్యసాధనపై దృష్టి పెట్టే, భావోద్వేగాలతో కూడిన యువ పారిశ్రామికవేత్తగా కనిపించనుండగా.. మాథ్యూ పాత్రలో అర్జున్ దాస్ ప్రేమపై తనదైన సిద్ధాంతంతో ఉండే వ్యక్తిగా కనిపించనున్నారు.
సౌందర్య రజనీకాంత్ కీలక పాత్ర
రజనీకాంత్ కుమార్తె సౌందర్య రజనీకాంత్ ఈ ప్రాజెక్ట్కు షోరన్నర్గా వ్యవహరించడంతో పాటు నిర్మాతగా కూడా ఉన్నారు. ఆధునిక సంబంధాలను కొత్త కోణంలో చూపించాలనే ఆలోచనతో ఈ సిరీస్ను రూపొందించినట్లు ఆమె పేర్కొన్నారు. సిరీస్కు నిర్మల్ విలియమ్స్ రచన అందించగా, శారదా సుబ్రమణియన్, శ్వేతా చక్రవర్తి సహ రచయితలుగా ఉన్నారు. ట్రైలర్తో ఇప్పటికే కథపై ఆసక్తి పెరగడంతో.. తారా, మాథ్యూ మధ్య మొదలైన 60 రోజుల ఛాలెంజ్ చివరకు ఎలాంటి మలుపులు తీసుకుంటుందనేది తెలుసుకోవాలంటే అక్టోబర్ 2 వరకు వేచి చూడాల్సిందే.
Read also: Bigg Boss Telugu 10: పొలం పనులు చేస్తూ పాటలు.. ఇప్పుడు బిగ్బాస్ హౌస్లోకి ఎంట్రీ! ఎవరీ జానపద గాయని ఝాన్సీ?
Aishwarya Lekshmi: ‘పెళ్లిపై నమ్మకం లేదు.. కానీ అమ్మ కావాలనుంది’.. ఐశ్వర్య లక్ష్మి షాకింగ్ కామెంట్స్ వైరల్!
