Iran-Israel war: మధ్యప్రాచ్యంలో ఇరాన్–ఇజ్రాయెల్ మధ్య నెలకొన్న యుద్ధ ఉద్రిక్తతలు ప్రపంచ ఆర్థిక వ్యవస్థపై తీవ్ర ప్రభావం చూపుతున్నాయి. ఈ పరిణామాల ప్రభావం భారత్‌పైనా పడే అవకాశం ఉందని ఆర్థిక నిపుణులు హెచ్చరిస్తున్నారు. ముఖ్యంగా ముడి చమురు, బంగారం ధరలు, అంతర్జాతీయ మార్కెట్ల అస్థిరత భారత వినియోగదారులపై నేరుగా ప్రభావం చూపే అవకాశముంది.
ఇరాన్ ప్రపంచంలో కీలక చమురు ఉత్పత్తి దేశాల్లో ఒకటి కావడంతో అక్కడ యుద్ధ పరిస్థితులు నెలకొంటే గ్లోబల్ ఆయిల్ సప్లై దెబ్బతింటుంది. దీంతో అంతర్జాతీయ మార్కెట్లో క్రూడ్ ఆయిల్ ధరలు వేగంగా పెరిగే పరిస్థితి ఏర్పడుతోంది.
ముడి చమురు పెరిగితే భారత్‌పై భారమే
భారత్ తన అవసరాల్లో దాదాపు 80 శాతం ముడి చమురును విదేశాల నుంచి దిగుమతి చేసుకుంటోంది. యుద్ధం కారణంగా సరఫరా అంతరాయం ఏర్పడితే బ్రెంట్ క్రూడ్ ధర బ్యారెల్‌కు 80 డాలర్లను దాటే అవకాశముందని మార్కెట్ విశ్లేషకులు అంచనా వేస్తున్నారు.
అలా జరిగితే దేశంలో పెట్రోల్, డీజిల్ ధరలు పెరగడం దాదాపు ఖాయం. ప్రస్తుతం హైదరాబాద్‌లో పెట్రోల్ రూ.107.50, డీజిల్ రూ.95.70గా ఉండగా, చెన్నైలో పెట్రోల్ రూ.100.93, డీజిల్ రూ.92.48గా కొనసాగుతున్నాయి. చమురు ధరలు పెరిగితే రవాణా ఖర్చులు పెరిగి దినసరి అవసర వస్తువుల ధరలపై కూడా ప్రభావం పడే అవకాశం ఉంది.
బంగారం సేఫ్ ఇన్వెస్ట్‌మెంట్‌గా మారుతోంది
యుద్ధ పరిస్థితుల్లో పెట్టుబడిదారులు సాధారణంగా బంగారాన్ని సురక్షిత పెట్టుబడిగా భావిస్తారు. ఈ కారణంగా అంతర్జాతీయంగా గోల్డ్ డిమాండ్ పెరుగుతోంది. ఇప్పటికే పసిడి ధరలు రికార్డు స్థాయిల వైపు దూసుకెళ్తుండగా, యుద్ధం మరింత ముదిరితే కొత్త గరిష్ట స్థాయిలు నమోదయ్యే అవకాశముందని నిపుణులు చెబుతున్నారు.
ప్రపంచ మార్కెట్లలో అస్థిరత
యుద్ధ ప్రభావం స్టాక్ మార్కెట్లు, క్రిప్టో మార్కెట్లపై కూడా పడింది. పెట్టుబడిదారులు రిస్క్ ఆస్తుల నుంచి బయటకు రావడంతో బిట్‌కాయిన్ వంటి క్రిప్టో కరెన్సీలు పడిపోయాయి. గల్ప్ ప్రాంతంలో ఉద్రిక్తతలు పెరిగితే అంతర్జాతీయ వాణిజ్యం, విమాన రవాణా, సరుకు రవాణా వ్యవస్థలపై కూడా ప్రభావం చూపవచ్చు.
భారత్‌కు ముందున్న సవాళ్లు
ఇంధన ధరల పెరుగుదల ద్రవ్యోల్బణాన్ని పెంచే ప్రమాదం ఉంది. దీంతో కేంద్ర ప్రభుత్వం పన్నులు తగ్గించడం లేదా ధరలను నియంత్రించే చర్యలు తీసుకోవాల్సిన పరిస్థితి రావచ్చు. అదే సమయంలో రూపాయి విలువ, దిగుమతి వ్యయం కూడా ఒత్తిడిని ఎదుర్కొనే అవకాశముంది.
మొత్తంగా ఇరాన్–ఇజ్రాయెల్ యుద్ధం కేవలం ప్రాంతీయ సమస్యగా కాకుండా ప్రపంచ ఆర్థిక వ్యవస్థను ప్రభావితం చేసే అంశంగా మారింది. రాబోయే రోజుల్లో పరిస్థితులు ఎలా మారుతాయన్నదానిపై భారత్ సహా ప్రపంచ దేశాల దృష్టి నిలిచింది.
ఇవీ చదవండి: Mega Star Chiranjeevi : జీవితాంతం మిమ్మల్ని అలరిస్తా.. కష్టపడటంలోనే నిజమైన సంతోషం: ‘మన శంకరవరప్రసాద్ గారు’ సక్సెస్ మీట్‌లో చిరంజీవి
Iran Trade : ఇరాన్‌తో వాణిజ్యం చేస్తే 25% సుంకం.. మరోసారి ప్రపంచ దేశాలకు ట్రంప్ హెచ్చరిక
