T20 World cup : ప్రస్తుతం జరుగుతున్న 2026 టీ20 ప్రపంచకప్‌లో ఒక ఆసక్తికరమైన అంశం క్రికెట్ అభిమానుల దృష్టిని ఆకర్షిస్తోంది. అగ్రరాజ్యం అమెరికా (USA) తరఫున ఆడుతున్న జట్టును చూస్తుంటే అది అమెరికా టీమా లేక ‘మినీ ఇండియా’ టీమా అనే సందేహం కలగక మానదు. ఎందుకంటే, అమెరికా ప్రకటించిన 15 మంది సభ్యుల జట్టులో ఏకంగా 9 మంది భారత సంతతి ఆటగాళ్లే ఉన్నారు.
కెప్టెన్ నుంచి బౌలర్ల దాకా మనోళ్లే!
ఈ జట్టుకు సారథ్యం వహిస్తున్న మోనాంక్ పటేల్ స్వస్థలం గుజరాత్‌లోని ఆనంద్. అతను గతంలో గుజరాత్ తరఫున అండర్-16, అండర్-19 విభాగాల్లో రాణించాడు. ఇక బౌలింగ్ విభాగంలో వెన్నెముకగా నిలిచిన సౌరభ్ నేత్రావల్కర్ ముంబైకి చెందిన మాజీ అండర్-19 ఇండియా ఆటగాడు. సాఫ్ట్‌వేర్ ఇంజనీర్‌గా ఉంటూనే అమెరికా జట్టులో కీలక బౌలర్‌గా ఎదిగాడు. వీరితో పాటు హర్మీత్ సింగ్ (ముంబై), మిలింద్ కుమార్ (ఢిల్లీ), శుభమ్ రంజనే (పూణే) వంటి వారు భారత దేశవాళీ క్రికెట్‌లో మంచి అనుభవం ఉన్నవారే.
మెరిసిన తెలుగు తేజం
ఈ జట్టులో తెలుగు రాష్ట్రాలకు చెందిన సాయి తేజ ముక్కామల్ల తన అద్భుత బ్యాటింగ్‌తో ప్రత్యేక గుర్తింపు తెచ్చుకున్నాడు. నంద్యాల జిల్లాకు చెందిన మూలాలున్న సాయి తేజ, ఈ టోర్నీలో నెదర్లాండ్స్ వంటి జట్లపై కీలక ఇన్నింగ్స్‌లు ఆడి జట్టు విజయంలో కీలక పాత్ర పోషించాడు.
జట్టులోని భారత సంతతి ఆటగాళ్లు:
1. మోనాంక్ పటేల్ (కెప్టెన్)
2. సౌరభ్ నేత్రావల్కర్
3. హర్మీత్ సింగ్
4. మిలింద్ కుమార్
5. సాయి తేజ ముక్కామల్ల
6. సంజయ్ కృష్ణమూర్తి
7. నోస్తుష్ కెంజిగే
8. జస్దీప్ సింగ్ (ప్రస్తుతం గాయంతో దూరమయ్యారు)
9. శుభమ్ రంజనే
భారత్‌లో తీవ్రమైన పోటీ కారణంగా అవకాశాలు రాని క్రికెటర్లు, అమెరికాలో స్థిరపడి ఆ దేశం తరఫున అంతర్జాతీయ వేదికలపై తమ సత్తా చాటుతున్నారు. పసికూనగా భావించిన అమెరికా జట్టు.. ఈ ‘ఇండియన్ పవర్’తో అగ్రశ్రేణి జట్లకు సైతం గట్టి పోటీ ఇస్తూ దూసుకుపోతోంది.
ఇవీ చదవండి: ICC Men’s T20 World Cup 2026 : నమీబియాతో మ్యాచ్ ముందు టీమ్ ఇండియా అనూహ్య నిర్ణయం.. ఆప్షనల్ ప్రాక్టీస్ సెషన్ రద్దు
T20 World cup : 2026 టీ20 ప్రపంచకప్‌లో భారత సంతతి క్రికెటర్ల సందడి.. వివిధ దేశాల తరపున సుమారు 40 మంది
