ICC Under 19 World Cup 2026 : ఫైనల్లో భారత అండర్-19 జట్టు మరోసారి తన ఆధిపత్యాన్ని చాటుకుంది. హరారే స్పోర్ట్స్ క్లబ్‌లో జరిగిన తుదిపోరులో ఇంగ్లాండ్ అండర్-19 జట్టును 100 పరుగుల తేడాతో ఓడించి భారత్ ఆరోసారి అండర్-19 ప్రపంచకప్‌ను తన ఖాతాలో వేసుకుంది.
టాస్ గెలిచిన భారత్ బ్యాటింగ్ ఎంచుకొని 50 ఓవర్లలో 9 వికెట్ల నష్టానికి 411 పరుగుల భారీ స్కోర్ నమోదు చేసింది. ఈ ఇన్నింగ్స్‌కు ప్రధాన ఆకర్షణగా నిలిచిన ఓపెనర్ వైభవ్ సూర్యవంశీ విధ్వంసకర బ్యాటింగ్‌తో ఇంగ్లాండ్ బౌలర్లపై విరుచుకుపడ్డాడు. కేవలం 80 బంతుల్లోనే 15 ఫోర్లు, 15 సిక్సర్లతో 175 పరుగులు చేసి ఫైనల్‌ను ఏకపక్షంగా మార్చేశాడు. కెప్టెన్ ఆయుష్ మాత్రే అర్థశతకంతో జట్టుకు స్థిరత్వం అందించాడు.
ఇంగ్లాండ్ తరఫున సెబాస్టియన్ మోర్గాన్, అలెక్స్ గ్రీన్ తలా రెండు వికెట్లు తీసినా, భారత బ్యాట్స్‌మెన్ దూకుడును ఆపలేకపోయారు.
412 పరుగుల భారీ లక్ష్యంతో బరిలోకి దిగిన ఇంగ్లాండ్ 40.2 ఓవర్లలో 311 పరుగులకు ఆలౌట్ అయింది. కాలేబ్ ఫాల్క్‌నర్ 115 పరుగులతో ఒంటరి పోరాటం చేసినా, మరో ఎండ్‌లో వరుసగా వికెట్లు పడటంతో ఇంగ్లాండ్ ఆశలు నశించాయి. భారత బౌలర్లలో ఆర్.ఎస్. అంబ్రిస్ మూడు వికెట్లు తీసి కీలక పాత్ర పోషించాడు.
ఈ విజయంతో భారత్ యువక్రికెట్‌లో తన అగ్రస్థానాన్ని మరింత బలపరుచుకుంది. గతంలోనూ పలు సార్లు ప్రపంచకప్‌లు గెలిచిన భారత్, ఈసారి కూడా తన ప్రతిభా నిలయాన్ని ప్రపంచానికి మరోసారి చాటి చెప్పింది. యువ ఆటగాళ్ల ప్రదర్శన భవిష్యత్తులో భారత సీనియర్ జట్టుకు బలమైన పునాది అవుతుందనే ఆశలను అభిమానుల్లో నింపింది.
ఇవీ చదవండి: Under-19 World Cup 2026: అండర్-19 వరల్డ్‌కప్‌లో ఇంగ్లాండ్ యువ సంచలనం బెన్ మేయస్ సరికొత్త చరిత్ర
IND vs PAK Final: అండర్-19 ఆసియా కప్ 2025 ఫైనల్: పాకిస్తాన్ ఘన విజయం, భారత్ భారీ పరాజయం
