Andhra Pradesh Population: ఆంధ్రప్రదేశ్‌లో జనాభా తగ్గుదలపై ఆందోళన వ్యక్తం చేస్తూ ముఖ్యమంత్రి చంద్రబాబు నాయుడు అసెంబ్లీలో కీలక ప్రకటన చేశారు. ఇప్పటివరకు అమల్లో ఉన్న కుటుంబ నియంత్రణ విధానానికి బదులుగా ‘పాపులేషన్ మేనేజ్‌మెంట్’ విధానాన్ని అమలు చేయాల్సిన అవసరం ఉందని ఆయన తెలిపారు.
రాష్ట్రంలో ప్రస్తుతం సంతానోత్పత్తి రేటు (TFR) 1.5 మాత్రమే ఉందని, ఇది 2.1 వరకు ఉంటేనే సమాజంలో సమతుల్య అభివృద్ధి సాధ్యమవుతుందని చంద్రబాబు చెప్పారు. జనాభా తగ్గుదల వల్ల భవిష్యత్తులో పని చేసే వయస్సు ఉన్న వారి సంఖ్య తగ్గిపోతుందని ఆయన హెచ్చరించారు.
రాష్ట్రంలో జనాభా పరిస్థితి
చంద్రబాబు వివరాల ప్రకారం, 2023 లెక్కల ప్రకారం ఆంధ్రప్రదేశ్‌లో ప్రతి ఏడాది సుమారు 6.70 లక్షల మంది పిల్లలు జన్మిస్తున్నారు. ప్రస్తుతం రాష్ట్రంలో 60 ఏళ్లు దాటిన వృద్ధులు సుమారు 10 శాతం ఉన్నారని, 2047 నాటికి ఇది 23 శాతానికి చేరే అవకాశం ఉందని తెలిపారు.
అంటే భవిష్యత్తులో యువత కంటే వృద్ధుల సంఖ్య ఎక్కువగా ఉండే పరిస్థితి ఏర్పడవచ్చని ప్రభుత్వం అంచనా వేస్తోంది.
సంతానోత్పత్తి తగ్గుతున్న కారణాలు
రాష్ట్రంలో సంతానోత్పత్తి తగ్గడానికి ముఖ్య కారణాలు కూడా చంద్రబాబు ప్రస్తావించారు.
57% కుటుంబాలు ఒక బిడ్డతోనే ఆగిపోతున్నాయి
32% కుటుంబాలు ఇద్దరు పిల్లలను కనుతున్నాయి
కేవలం 9% మాత్రమే ఇద్దరికి మించిన పిల్లలను కనుతున్నారు
ముఖ్యంగా పట్టణాల్లో ఉద్యోగాలు, ఆర్థిక భారం, జీవనశైలి మార్పులు కారణంగా కుటుంబాలు చిన్నవిగా మారుతున్నాయని ఆయన అన్నారు.
కొత్త జనాభా పాలసీ
ఈ పరిస్థితులను దృష్టిలో పెట్టుకుని రాష్ట్ర ప్రభుత్వం పాపులేషన్ మేనేజ్‌మెంట్‌కు ప్రత్యేక పాలసీ తీసుకురానుందని చంద్రబాబు తెలిపారు. ప్రస్తుతం డ్రాఫ్ట్ పాలసీ తయారు చేస్తున్నామని, దీనిపై నెలరోజుల పాటు ప్రజల అభిప్రాయాలు సేకరించి తుది నిర్ణయం తీసుకుంటామని చెప్పారు.
రెండో బిడ్డ నుంచి ప్రోత్సాహకాలు
కొత్త పాలసీ ప్రకారం పిల్లలను కనడానికి కుటుంబాలకు ప్రోత్సాహకాలు ఇవ్వాలని ప్రభుత్వం ఆలోచిస్తోంది.
ప్రభుత్వం పరిశీలిస్తున్న ముఖ్యమైన ప్రోత్సాహకాలు ఇవి:
రెండో బిడ్డ నుంచి ప్రత్యేక ప్రోత్సాహకాలు
ప్రసవ సమయంలో మహిళలకు రూ.25,000 నగదు సహాయం
పిల్లల కోసం ఉచిత విద్య
ప్రతి నెల రూ.1,000 ఆర్థిక సహాయం
పిల్లల సంరక్షణ కోసం కార్యాలయాల్లో కేర్ సెంటర్లు
తల్లిదండ్రులకు ప్రత్యేక సెలవులు
పురుషులకు కూడా పిల్లల సంరక్షణ సెలవులు
‘ఒకరు వద్దు… ఇద్దరు ఓకే… ముగ్గురు ముద్దు’
ఇప్పటి వరకు కుటుంబ నియంత్రణలో “ఇద్దరే సరిపోతారు” అనే భావన ఉండేది. కానీ ఇప్పుడు పరిస్థితి మారిందని చంద్రబాబు తెలిపారు. భవిష్యత్తులో “ఒకరు వద్దు… ఇద్దరు ఓకే… ముగ్గురు ముద్దు” అనే ఆలోచనను సమాజంలో ప్రోత్సహించాల్సిన అవసరం ఉందని ఆయన చెప్పారు.
ఇతర దేశాల్లో పరిస్థితి
జనాభా తగ్గుదల వల్ల ఎదురవుతున్న సమస్యలను కూడా చంద్రబాబు ఉదాహరణగా చెప్పారు.
జపాన్‌లో TFR – 1.2
దక్షిణ కొరియాలో – 0.7
ఈ దేశాల్లో జనాభా తగ్గిపోవడంతో పని చేసే యువత కొరత తీవ్రంగా ఏర్పడిందని ఆయన తెలిపారు.
మహిళల పాత్ర కీలకం
పిల్లల పెంపకం బాధ్యత మహిళలకే పరిమితం కాకూడదని, భార్యాభర్తలు ఇద్దరూ బాధ్యత తీసుకోవాలని చంద్రబాబు సూచించారు. ఉద్యోగం చేసే మహిళలకు సౌకర్యంగా ఉండేందుకు కార్యాలయాల్లో పిల్లల కేర్ సెంటర్లు ఏర్పాటు చేస్తామని చెప్పారు.
రాజకీయ ప్రభావం కూడా
దక్షిణ భారత రాష్ట్రాల్లో జనాభా తగ్గిపోతుండగా, ఉత్తర భారత రాష్ట్రాల్లో పెరుగుతుందని చంద్రబాబు తెలిపారు. దీని వల్ల భవిష్యత్తులో రాజకీయ ప్రాతినిధ్యంపై కూడా ప్రభావం పడే అవకాశం ఉందని ఆయన పేర్కొన్నారు.
అవగాహన అవసరం
జనాభా పెంపు వంటి సామాజిక అంశాలపై బహిరంగంగా చర్చ జరగాలని, అప్పుడు మాత్రమే ప్రజల్లో అవగాహన పెరుగుతుందని చంద్రబాబు అన్నారు. జనాభాను సక్రమంగా నిర్వహిస్తే తెలుగువారు ప్రపంచంలోనే శక్తివంతమైన మానవ వనరులుగా ఎదగగలరని ఆయన విశ్వాసం వ్యక్తం చేశారు.
AP Population Management Five-Pillar Model (Assembly), 05
ఇవీ చదవండి: Chandrababu at Delhi : ఢిల్లీలో సీఎం చంద్రబాబు వరుస భేటీలు అమరావతికి చట్టబద్ధత, పోలవరం నిధులు, ఫ్రైట్ కారిడార్లు, మఖానా బోర్డు ఏర్పాటుకు విజ్ఞప్తి
CM Chandrababu Naidu : మంత్రులు–కార్యదర్శుల సమీక్ష సమావేశం: పాలనలో సంస్కరణలు, భద్రత, బాధ్యతలపై దిశానిర్దేశం
