AP DSC 2026: ఏపీలో 2,721 టీచర్ ఉద్యోగాలు.. ఏ జిల్లాలో ఎన్ని ఖాళీలు? దరఖాస్తులు ఎప్పటినుంచంటే?

AP DSC 2026: ఉపాధ్యాయ ఉద్యోగమే లక్ష్యంగా ఏళ్ల తరబడి ప్రిపేర్ అవుతున్న అభ్యర్థులకు కీలక అప్‌డేట్ వచ్చింది. ఆంధ్రప్రదేశ్‌లో మరో డీఎస్సీ నియామక ప్రక్రియకు రంగం సిద్ధమైంది. మొత్తం 2,721 టీచర్ పోస్టుల భర్తీకి రాష్ట్ర పాఠశాల విద్యాశాఖ అక్టోబర్ 13న షార్ట్ నోటిఫికేషన్ విడుదల చేసింది. అయితే ఈసారి ఒకే నోటిఫికేషన్ కాకుండా మూడు వేర్వేరు విభాగాలుగా ఉద్యోగాలను ప్రకటించడం విశేషం. స్కూల్ అసిస్టెంట్, ఎస్జీటీ పోస్టులతో పాటు స్పెషల్ ఎడ్యుకేషన్, గురుకులాలు, మోడల్ స్కూళ్లలోనూ ఉద్యోగావకాశాలు కల్పించనున్నారు. పూర్తి నోటిఫికేషన్ నవంబర్ 3లోగా విడుదల కానుంది.

ఏ విభాగంలో ఎన్ని పోస్టులు?

ప్రభుత్వ, జిల్లా పరిషత్, మండల పరిషత్, మున్సిపల్ పాఠశాలల్లో 2,111 పోస్టులను భర్తీ చేయనున్నారు. ప్రత్యేక అవసరాలున్న విద్యార్థులకు బోధించే స్పెషల్ ఎడ్యుకేషన్ విభాగంలో 350 పోస్టులు కేటాయించారు. వివిధ సంక్షేమ గురుకులాలు, సొసైటీలు, మోడల్ స్కూళ్ల పరిధిలో మరో 260 ఖాళీలు ఉన్నాయి.

ఈ జిల్లాల్లో ఎక్కువ ఖాళీలు

జిల్లాల వారీగా పరిశీలిస్తే సాధారణ పాఠశాలల విభాగంలో కర్నూలు జిల్లాలో అత్యధికంగా 389 పోస్టులు ఉన్నాయి. ప్రకాశం జిల్లాలో 266, వైఎస్సార్ కడప జిల్లాలో 206, నెల్లూరులో 165, చిత్తూరులో 130 ఖాళీలు ప్రకటించారు. తిరుపతిలో 99, అనంతపురంలో 92 పోస్టులు ఉన్నాయి. మరోవైపు విజయనగరంలో కేవలం 4, పార్వతీపురం మన్యంలో 8 పోస్టులు మాత్రమే ఉండటం గమనార్హం. ఇవి ప్రాథమిక ఖాళీల వివరాలు మాత్రమే.

దరఖాస్తులు ఎప్పటి నుంచి?

నవంబర్ 3, 2026లోగా పూర్తిస్థాయి డీఎస్సీ నోటిఫికేషన్ అందుబాటులోకి రానుంది. ఆన్‌లైన్ దరఖాస్తుల ప్రక్రియ కూడా ఆ తేదీ నాటికి ప్రారంభమయ్యే అవకాశం ఉంది. అయితే దరఖాస్తుల ప్రారంభ, చివరి తేదీలు, పరీక్ష షెడ్యూల్‌ను పూర్తి నోటిఫికేషన్‌లో అధికారికంగా నిర్ధారించాల్సి ఉంది. అభ్యర్థుల విద్యార్హతలు, వయోపరిమితి, రిజర్వేషన్లు, జిల్లాల వారీ రోస్టర్ వివరాలు కూడా అప్పుడే స్పష్టమవుతాయి.

అభ్యర్థులు ఇప్పుడేం చేయాలి?

డీఎస్సీకి సిద్ధమవుతున్న అభ్యర్థులు తమ విద్యార్హతల సర్టిఫికెట్లు, బీఈడీ లేదా డీఈడీ ధ్రువపత్రాలు, వర్తించే టెట్ వివరాలు సిద్ధంగా ఉంచుకోవడం మంచిది. పూర్తి నోటిఫికేషన్ వచ్చాక తమ అర్హతలకు సరిపోయే పోస్టులను పరిశీలించి దరఖాస్తు చేసుకోవాలి. ఇదిలా ఉండగా, ముందుగా నిర్ణయించిన జాబ్ క్యాలెండర్ ప్రకారం అక్టోబర్ 15న రావాల్సిన ప్రకటనను స్థానిక సంస్థల ఎన్నికల షెడ్యూల్ నేపథ్యంలో రెండు రోజుల ముందుగానే విడుదల చేసినట్లు సమాచారం. ఏటా డీఎస్సీ నిర్వహిస్తామన్న ఎన్నికల హామీలో భాగంగా ప్రభుత్వం ఈ నియామకాలను చేపడుతోంది.

అధికారిక వెబ్‌సైట్: tet2dsc.apcfss.in

Read also: AP Mega DSC Sports Quota Row: ‘ఢీ’ఎస్సీపై వైఎస్సార్ సీపీ వ‌ర్సెస్ గ‌వ‌ర్న‌మెంట్.. మెగా డీఎస్సీపై అట్టుడుకుతున్న AP
DSC Scam: సీబీఐ విచార‌ణ అడిగితే ఎందుకంత భ‌యం? డీఎస్సీపై వైఎస్ జ‌గ‌న్ మ‌రోసారి ప్ర‌శ్న‌ల వ‌ర్షం