Akhil Akkineni: అక్కినేని హీరో అఖిల్ తాజాగా ‘లెనిన్’ విజయంతో మంచి జోష్‌లో ఉన్నారు. మురళీ కిశోర్ అబ్బూరు దర్శకత్వంలో తెరకెక్కిన ఈ చిత్రంలో అఖిల్‌కు జోడీగా భాగ్యశ్రీ బోర్సే నటించింది. కొంత విరామం తర్వాత ప్రేక్షకుల ముందుకొచ్చిన అఖిల్‌కు ఈ సినిమా సక్సెస్ కొత్త ఉత్సాహాన్ని ఇచ్చింది. ఈ నేపథ్యంలో ఓ పాడ్‌కాస్ట్‌లో పాల్గొన్న అఖిల్ తన కెరీర్‌తో పాటు చిన్నతనంలో నటించిన ‘సిసింద్రీ’ గురించి ఆసక్తికర విషయాలు పంచుకున్నారు.
నా నిద్ర టైమింగ్స్‌కు తగ్గట్టే షూటింగ్
అఖిల్ వెండితెర ప్రయాణం హీరోగా మొదలవడానికి చాలా ఏళ్ల ముందే ‘సిసింద్రీ’తో ప్రారంభమైంది. చిన్న వయసులోనే కెమెరా ముందుకొచ్చిన అఖిల్‌ను దృష్టిలో పెట్టుకునే సినిమా షూటింగ్ ప్లాన్ చేసేవారట. ముఖ్యంగా తన నిద్ర సమయాలకు అనుగుణంగానే చిత్రీకరణ జరిగేదని అఖిల్ గుర్తుచేసుకున్నారు. చిన్న పిల్లాడితో షూటింగ్ కావడంతో సాధారణ నటుడిలా సీన్ వివరించి నటన రాబట్టడం సాధ్యం కాదు. దీంతో తన సహజమైన నవ్వు, ఏడుపు, హావభావాలను కెమెరాలో బంధించేందుకు కుటుంబ సభ్యులతో పాటు చిత్ర బృందం చిన్న చిన్న ట్రిక్స్ ఉపయోగించేదని తెలిపారు.
ఏడవాలంటే అమ్మ ‘బై’ చెప్పి వెళ్లిపోయేది!
సినిమాలో తాను ఏడవాల్సిన సన్నివేశాల వెనుక జరిగిన విషయాలను అఖిల్ సరదాగా వివరించారు. కెమెరా ముందు తనతో కావాల్సిన ఎక్స్‌ప్రెషన్స్ చేయించేందుకు తల్లిదండ్రులు కూడా షూటింగ్ టీమ్‌కు సహకరించేవారని చెప్పారు. కొన్ని సందర్భాల్లో కెమెరా వెనుక తన తండ్రి నాగార్జున చేతులు ఊపుతూ తన దృష్టిని ఆకర్షించేవారని గుర్తుచేసుకున్నారు. మరికొన్ని సీన్లలో తాను ఏడవాల్సి వస్తే తన తల్లి ‘బై’ చెప్పి కారులో వెళ్లిపోతున్నట్లు చేసేవారట. అమ్మ వెళ్లిపోతోందనే భావనతో చిన్నారి అఖిల్ సహజంగానే ఏడవడంతో ఆ ఎక్స్‌ప్రెషన్స్‌ను కెమెరాలో చిత్రీకరించేవారని చెప్పారు.
‘నటన చేశానో లేదో.. అవార్డు మాత్రం వచ్చింది’
అప్పట్లో తనకు నటన అంటే ఏమిటో కూడా తెలియదని, చుట్టూ ఉన్నవారు చేసిన చిన్న చిన్న ట్రిక్స్‌కు తాను సహజంగా స్పందించేవాడినని అఖిల్ చెప్పుకొచ్చారు. అలా తీసిన ‘సిసింద్రీ’లో తన నటనకు గుర్తింపు రావడం ఇప్పటికీ ప్రత్యేకమైన జ్ఞాపకమని తెలిపారు. చిన్న వయసులో చేసిన ఆ సినిమాకు ఫిల్మ్‌ఫేర్ గుర్తింపు రావడాన్ని కూడా అఖిల్ సరదాగా ప్రస్తావించారు. తన జీవితంలో ‘మోస్ట్ యూనిక్ ఫిల్మ్ ఎక్స్‌పీరియన్స్’ సిసింద్రీనే అని పేర్కొన్నారు.
1995లోనే అఖిల్‌కు స్టార్ క్రేజ్
1995లో విడుదలైన ‘సిసింద్రీ’ అఖిల్‌ను చిన్న వయసులోనే తెలుగు ప్రేక్షకులకు దగ్గర చేసింది. శివ నాగేశ్వరరావు దర్శకత్వం వహించిన ఈ చిత్రం హాలీవుడ్ మూవీ ‘Baby’s Day Out’ స్ఫూర్తితో రూపొందింది. నాగార్జున అతిథి పాత్రలో కనిపించగా, టబు ప్రత్యేక గీతంలో సందడి చేశారు. చిన్నారి చుట్టూ సాగే కామెడీ, అడ్వెంచర్ సన్నివేశాలు అప్పటి ప్రేక్షకులను ఆకట్టుకున్నాయి. ముఖ్యంగా అఖిల్ క్యూట్ ఎక్స్‌ప్రెషన్స్ సినిమాకు ప్రధాన ఆకర్షణగా నిలిచాయి. అందుకే అఖిల్ హీరోగా పరిచయం కావడానికి చాలా కాలం ముందే ‘సిసింద్రీ అఖిల్’గా ప్రేక్షకుల్లో గుర్తింపు పొందారు.
చిన్ననాటి ‘సిసింద్రీ’ నుంచి హీరోగా ‘లెనిన్’ వరకు..
బాలనటుడిగా వచ్చిన గుర్తింపు ఉన్నప్పటికీ హీరోగా అఖిల్ ప్రయాణం మాత్రం ఎన్నో ఎత్తుపల్లాలతో సాగింది. ‘అఖిల్’తో హీరోగా ఎంట్రీ ఇచ్చిన ఆయన ఆ తర్వాత ‘హలో’, ‘మిస్టర్ మజ్ను’, ‘మోస్ట్ ఎలిజిబుల్ బ్యాచిలర్’, ‘ఏజెంట్’ వంటి చిత్రాలతో ప్రేక్షకుల ముందుకొచ్చారు. ఇప్పుడు ‘లెనిన్’తో మరోసారి ప్రేక్షకులను పలకరించిన అఖిల్.. సినిమా విజయాన్ని ఆస్వాదిస్తున్న సమయంలో తన తొలి సినిమా జ్ఞాపకాలను పంచుకోవడం అభిమానులను ఆకట్టుకుంటోంది. చిన్నప్పుడు తనకు తెలియకుండానే కెమెరా ముందు సహజంగా స్పందించిన అనుభవం నుంచి హీరోగా తనకంటూ ప్రత్యేక గుర్తింపు కోసం సాగుతున్న ప్రయాణం వరకు.. అఖిల్ కెరీర్‌లో ‘సిసింద్రీ’ మాత్రం ఎప్పటికీ ప్రత్యేకమేనని ఆయన మాటల్లో స్పష్టమవుతోంది.
ఇవీ చదవండి: Akhil Akkineni: ఎట్ట‌కేల‌కు నెర‌వేరిన క‌ల.. అఖిల్‌ను కలిసిన ‘అయ్యగారే నెంబర్ వన్’ ఫ్యాన్.. భావోద్వేగ క్షణాలు
Akhil Akkineni: అఖిల్ ‘లెనిన్’ క్లైమాక్స్‌పై సోషల్ మీడియాలో చర్చ.. ‘కృష్ణబాబు’ సీన్‌తో పోలికలు, ట్రోల్స్ ఎందుకు?
Akhil Akkineni: అఖిల్ ‘లెనిన్’ బాక్సాఫీస్ దూకుడు.. రెండు రోజుల్లోనే రూ.37.2 కోట్లు.. మూడో రోజే హాఫ్ సెంచరీ ఖాయమా?
