Teachers Day 2026: ఉపాధ్యాయ దినోత్సవం సందర్భంగా దేశవ్యాప్తంగా గురువులను స్మరించుకుంటున్న వేళ.. ప్రధాని నరేంద్ర మోదీ జాతీయ ఉత్తమ ఉపాధ్యాయ అవార్డు గ్రహీతలతో ప్రత్యేకంగా సమావేశమయ్యారు. న్యూఢిల్లీలోని తన అధికారిక నివాసంలో జరిగిన ఈ కార్యక్రమంలో వివిధ రాష్ట్రాలకు చెందిన ఉపాధ్యాయులతో ప్రధాని మోదీ ఆత్మీయంగా ముచ్చటించారు. విద్యార్థుల భవిష్యత్తును తీర్చిదిద్దడంలో టీచర్లు చేస్తున్న కృషిని అభినందించడంతో పాటు.. ఆధునిక విద్యా వ్యవస్థ ఎదుర్కొంటున్న సవాళ్లపై కూడా కీలక సూచనలు చేశారు.
గురువులను కలిసిన ప్రధాని మోదీ
దేశానికి మంచి పౌరులను తయారు చేయడంలో ఉపాధ్యాయుల పాత్ర ఎంతో కీలకమని ప్రధాని మోదీ పేర్కొన్నారు. విద్యార్థులకు కేవలం పాఠ్యాంశాలను బోధించడం మాత్రమే కాకుండా.. వారి ఆలోచనా విధానాన్ని, వ్యక్తిత్వాన్ని, సృజనాత్మకతను తీర్చిదిద్దడంలో గురువులు కీలక పాత్ర పోషించాలని సూచించారు. ఈ సందర్భంగా భారత మాజీ రాష్ట్రపతి, ప్రముఖ విద్యావేత్త డాక్టర్ సర్వేపల్లి రాధాకృష్ణన్ సేవలను ప్రధాని మోదీ స్మరించుకున్నారు. ఆయన జయంతిని పురస్కరించుకుని ప్రతి సంవత్సరం సెప్టెంబర్ 5న ఉపాధ్యాయ దినోత్సవాన్ని నిర్వహించుకుంటున్న విషయం తెలిసిందే.
టీచర్ను మోదీ అడిగిన సరదా ప్రశ్న
ఈ సమావేశంలో ప్రధాని మోదీ ఉపాధ్యాయులతో కేవలం అధికారిక విషయాలే కాకుండా సరదాగా కూడా సంభాషించారు. ఓ ఉపాధ్యాయురాలు పిల్లలకు ఇంటర్వ్యూలు చేయడం నేర్పిస్తున్నానని చెప్పగా.. ప్రధాని వెంటనే చమత్కరించారు. “అయితే మీ పిల్లలు ఇంట్లో తల్లిదండ్రులను కూడా వంట ఎందుకు చేశారంటూ ఇంటర్వ్యూ చేస్తున్నారా?” అంటూ మోదీ సరదాగా ప్రశ్నించడంతో అక్కడ నవ్వులు పూశాయి. మరో ఉపాధ్యాయుడు విద్యార్థులకు పబ్లిక్ స్పీకింగ్ నేర్పిస్తున్నట్లు చెప్పడంతో.. ప్రధాని తాను కూడా ఆ టీచర్ విద్యార్థినేనని ఊహించుకుంటే మంచి వక్తగా మారడానికి ఏం చేయాలని అడిగారు. దీంతో ఆ ఉపాధ్యాయుడు కాస్త తడబడినా.. నిరంతర సాధనతో పాటు ప్రధాని వ్యక్తిత్వం నుంచి నేర్చుకోవచ్చని చెప్పడంతో కార్యక్రమం మరింత ఆహ్లాదకరంగా మారింది.
గిరిజన విద్యార్థుల విజయాలపై మోదీ ప్రశంసలు
ఏకలవ్య మోడల్ రెసిడెన్షియల్ పాఠశాలల్లో పనిచేస్తున్న ఓ ఉపాధ్యాయుడు గిరిజన విద్యార్థుల విజయాల గురించి ప్రధానికి వివరించారు. ఒకప్పుడు పాఠశాల ముఖం కూడా చూడని కుటుంబాల నుంచి వచ్చిన పిల్లలు.. నేడు ఉన్నత విద్యపై కలలు కంటూ ఐఐటీ, ఎన్ఐటీ వంటి ప్రతిష్టాత్మక విద్యాసంస్థలను లక్ష్యంగా చేసుకుంటున్నారని తెలిపారు. విద్య ద్వారా వెనుకబడిన వర్గాలకు చెందిన పిల్లలకు అవకాశాలు కల్పించడం ఎంతటి సామాజిక మార్పుకు దారితీస్తుందో ఈ సందర్భంగా చర్చ జరిగింది.
క్యాన్సర్పై అవగాహనకు ప్రశంసలు
మహిళల్లో బ్రెస్ట్ క్యాన్సర్పై అవగాహన కల్పించేందుకు తాను చేపడుతున్న పరిశోధనలు, కార్యక్రమాల గురించి ఓ మహిళా ఉపాధ్యాయురాలు ప్రధానితో పంచుకున్నారు. దీనిపై స్పందించిన మోదీ.. తన నియోజకవర్గమైన వారణాసి (కాశీ)లో పెద్ద ఎత్తున క్యాన్సర్ స్క్రీనింగ్ కార్యక్రమాలు నిర్వహించిన విషయాన్ని గుర్తుచేశారు. ప్రజల్లో ఆరోగ్యంపై అవగాహన పెంచేందుకు ఇలాంటి కార్యక్రమాలు ఎంతో అవసరమని పేర్కొన్నారు.
పిల్లల్లో పెరుగుతున్న స్క్రీన్ టైమ్పై ఆందోళన
ప్రస్తుతం విద్యార్థుల ముందు ఉన్న ముఖ్యమైన సమస్యల్లో అధిక స్క్రీన్ టైమ్ కూడా ఒకటని ప్రధాని మోదీ పేర్కొన్నారు. మొబైల్ ఫోన్లు, సోషల్ మీడియా, డిజిటల్ వినోదానికి పిల్లలు ఎక్కువ సమయం కేటాయించడం వల్ల వారి శారీరక, సామాజిక, సృజనాత్మక కార్యకలాపాలకు సమయం తగ్గుతోందని అన్నారు. పిల్లలను కేవలం పుస్తకాలకే పరిమితం చేయకుండా మైదానాల్లో ఆడేలా ప్రోత్సహించాలని ఉపాధ్యాయులకు సూచించారు. క్రీడలు, కళలు, సాంస్కృతిక కార్యక్రమాలు, ఇతర సృజనాత్మక కార్యకలాపాల ద్వారా పిల్లలను డిజిటల్ ప్రపంచం నుంచి కొంతసేపు బయటకు తీసుకురావాలని చెప్పారు.
డ్రగ్స్పై కూడా అప్రమత్తంగా ఉండాలి
యువతను ప్రభావితం చేస్తున్న మాదకద్రవ్యాల సమస్యపైనా ప్రధాని మోదీ ఉపాధ్యాయులకు సూచనలు చేశారు. విద్యార్థుల ప్రవర్తనలో వచ్చే మార్పులను టీచర్లు నిశితంగా గమనించాలని, అవసరమైన సమయంలో వారికి సరైన మార్గదర్శకత్వం అందించాలని సూచించారు. పిల్లలతో కేవలం టీచర్-స్టూడెంట్ సంబంధం కాకుండా.. వారి సమస్యలను అర్థం చేసుకునే మెంటర్లుగా కూడా ఉపాధ్యాయులు వ్యవహరించాలని ఆయన సూచించినట్లు తెలుస్తోంది.
సిలబస్తో ఆగిపోకండి.. పిల్లల్లోని ప్రతిభను గుర్తించండి
ప్రస్తుత విద్యావిధానంలో ఉపాధ్యాయుల బాధ్యత కేవలం సిలబస్ పూర్తి చేయడం, పరీక్షలకు విద్యార్థులను సిద్ధం చేయడం వరకే పరిమితం కాకూడదని మోదీ సూచించారు. ప్రతి విద్యార్థిలోనూ ఏదో ఒక ప్రత్యేక ప్రతిభ ఉంటుందని.. దానిని గుర్తించి ప్రోత్సహించాల్సిన బాధ్యత గురువులపై ఉందని చెప్పారు. విద్యార్థుల వ్యక్తిగత జీవితాలను, వారి ఆసక్తులను అర్థం చేసుకుని వారికి సరైన దిశను చూపించాలని సూచించారు.
ముఖ్యంగా పిల్లల్లోని ‘బాల్యం’ను కాపాడాల్సిన అవసరం ఉందని ప్రధాని మోదీ పేర్కొన్నారు. చదువు, పోటీ, డిజిటల్ ప్రపంచం మధ్య పిల్లలు తమ సహజమైన ఆటలు, సృజనాత్మకతను కోల్పోకుండా చూడాలని సూచించారు.
దేశ భవిష్యత్తును తీర్చిదిద్దే బాధ్యత గురువులదే
ఉపాధ్యాయ దినోత్సవం సందర్భంగా జరిగిన ఈ సమావేశం విద్యాబోధనలో వస్తున్న మార్పులు, విద్యార్థులు ఎదుర్కొంటున్న ఆధునిక సమస్యలపై చర్చకు వేదికగా నిలిచింది. సిలబస్ దాటి విద్యార్థుల జీవితాలను అర్థం చేసుకోవడం, వారి ప్రతిభను వెలికితీయడం, డిజిటల్ వ్యసనాలు మరియు డ్రగ్స్ వంటి సమస్యల నుంచి వారిని దూరంగా ఉంచడం వంటి అంశాలపై ప్రధాని మోదీ చేసిన సూచనలు ప్రాధాన్యత సంతరించుకున్నాయి.
మొత్తంగా.. మంచి మార్కులు సాధించే విద్యార్థులను తయారు చేయడం మాత్రమే కాదు.. మంచి ఆలోచనలు, విలువలు, బాధ్యతాయుతమైన వ్యక్తిత్వం కలిగిన పౌరులను తీర్చిదిద్దడమే నిజమైన విద్య లక్ష్యమనే సందేశాన్ని ఈ సందర్భంగా ప్రధాని మోదీ ఇచ్చారు.
Read also: Florida Teacher Case: 17 ఏళ్ల విద్యార్థితో అనుచిత సంబంధం.. టీచర్కు 7 ఏళ్ల జైలు శిక్ష! అమెరికాలో సంచలనంగా మారిన కేసు
Khammam Teacher: ఇన్స్టా రీల్స్ వివాదం.. ప్రభుత్వ టీచర్ గౌతమి రాజీనామా ప్రకటన.. అసలు ఏం జరిగింది?
Garuda Purana Teachings: గరుడ పురాణం ప్రకారం ఈ 4 అలవాట్లు ఉంటే లక్ష్మీ కటాక్షం దూరమవుతుందట.. మీలో ఉన్నాయేమో చూసుకోండి!