Tollywood: టాలీవుడ్ డాన్సర్స్ అసోసియేషన్లో కొనసాగుతున్న వివాదం కీలక మలుపు తిరిగింది. అసోసియేషన్ భవిష్యత్, ఫెడరేషన్ గుర్తింపు, సభ్యుల భద్రత, వేతనాల సమస్యలపై జరుగుతున్న చర్చల మధ్య ప్రముఖ కొరియోగ్రాఫర్ రఘు మాస్టర్ను సభ్యులు టెంపరరీ ప్రెసిడెంట్గా ఎన్నుకున్నారు. ఈ సందర్భంగా రఘు మాస్టర్ చేసిన వ్యాఖ్యలు ఇప్పుడు ఇండస్ట్రీలో చర్చనీయాంశంగా మారాయి. తాను ప్రెసిడెంట్ పదవి కోసం ఇక్కడికి రాలేదని, డాన్సర్స్ అసోసియేషన్ను సరైన దిశలో ముందుకు తీసుకెళ్లాలనే ఉద్దేశంతోనే సభ్యుల మధ్యకు వచ్చినట్లు రఘు మాస్టర్ స్పష్టం చేశారు.
డాన్సర్, మాస్టర్ అనే తేడా లేదు.. అందరూ మెంబర్సే
అసోసియేషన్లో ఎవరూ పెద్దవారు, చిన్నవారు అనే భావన ఉండకూడదని రఘు మాస్టర్ అన్నారు. డాన్సర్ అయినా, మాస్టర్ అయినా అందరూ ముందుగా అసోసియేషన్ సభ్యులేనని పేర్కొన్నారు. మనకు బలమైన యూనియన్ ఉండాలని, అది సభ్యులందరి అభిప్రాయాలను గౌరవిస్తూ ముందుకు సాగాలని చెప్పారు. ముఖ్యంగా అసోసియేషన్లో తీసుకునే ప్రతి నిర్ణయం పారదర్శకంగా ఉండాలని ఆయన అభిప్రాయపడ్డారు. సుమలతతో మాట్లాడిన సమయంలో కూడా అసోసియేషన్ కార్యకలాపాలు అందరికీ స్పష్టంగా తెలుస్తున్నాయా లేదా అని ప్రశ్నించినట్లు రఘు మాస్టర్ తెలిపారు. పారదర్శకతతో వ్యవహరించి ఉంటే ప్రస్తుతం ఏర్పడిన పరిస్థితి వచ్చి ఉండకపోయేదన్న అభిప్రాయాన్ని వ్యక్తం చేశారు.
సుమలత పనితీరు నచ్చుతుంది.. కానీ అక్కడే సమస్య
సుమలత చేసే కొన్ని పనులు తనకు నచ్చుతాయని రఘు మాస్టర్ స్పష్టం చేశారు. అయితే, సభ్యులందరినీ కలుపుకుని పారదర్శకంగా వ్యవహరించి ఉంటే పరిస్థితి మరోలా ఉండేదని అన్నారు. ఇక్కడికి ఎవరూ ఎవరి ప్రభావంతో రాలేదని, ఈ అంశాన్ని ఎవరూ వ్యక్తిగత ప్రయోజనాలకు మిస్యూజ్ చేయకుండా అసోసియేషన్ సమస్యకు త్వరగా పరిష్కారం కనుగొనాలనే ఉద్దేశంతోనే తాను వచ్చానని చెప్పారు. తాను ప్రెసిడెంట్గా పోటీ పడేందుకు వచ్చాననే ప్రచారం కూడా సరికాదని రఘు మాస్టర్ తెలిపారు. తాను అయినా, శేఖర్ మాస్టర్ అయినా, జానీ మాస్టర్ అయినా.. ఎవరైనా సరే వ్యక్తిగత ప్రయోజనాల కోసం కాకుండా యూనియన్ అభివృద్ధి కోసమే పని చేయాలని అన్నారు.
అసలు సమస్య వేతనాలదే.. మనల్ని పక్కన పెడుతున్నారు
డాన్సర్స్ ఎదుర్కొంటున్న ప్రధాన సమస్యల్లో వేతనాల అంశం కూడా ఉందని రఘు మాస్టర్ పేర్కొన్నారు. వేతనాల పెంపు విషయంలో డాన్సర్స్ను పక్కన పెట్టే పరిస్థితి ఏర్పడుతోందని ఆవేదన వ్యక్తం చేశారు. అందుకే బలమైన ఫెడరేషన్ మద్దతు అవసరమని చెప్పారు. ఒక అసోసియేషన్కు సరైన గుర్తింపు, బలం ఉండాలంటే దాని వెనుక పెద్ద వ్యవస్థ ఉండాలని ఆయన వివరించారు. 24 క్రాఫ్ట్స్కు ఉన్న ఫెడరేషన్ తరహాలోనే డాన్సర్స్ అసోసియేషన్కు కూడా సరైన హెడ్, రక్షణ వ్యవస్థ అవసరమని అన్నారు. ఏదైనా పెద్ద సమస్య వచ్చినప్పుడు సంఘటితంగా స్పందించే అధికారం, వ్యవస్థ ఉండాలని తెలిపారు.
ఫెడరేషన్ కింద ఉంటేనే అసోసియేషన్కు బలం
ఫెడరేషన్ గుర్తింపు ఎందుకు అవసరమో రఘు మాస్టర్ తన మాటల్లో వివరించారు. అసోసియేషన్కు ఎదురయ్యే సమస్యలను నిర్మాతలతో చర్చించే స్థాయి ఉండాలని, సభ్యుల తరఫున గట్టిగా మాట్లాడే నాయకత్వం అవసరమని చెప్పారు. రేపు కొత్త ప్రెసిడెంట్ ఎవరైనా వచ్చినా నిర్మాతల వద్దకు వెళ్లి వేతనాల పెంపుపై మాట్లాడగలగాలని అన్నారు. 10 శాతం పెంపు సరిపోదని, అవసరమైతే 15 శాతం పెంపు కోసం కూడా చర్చించగలగాలని తెలిపారు. ఒకవేళ అంత పెంపు సాధ్యం కాకపోతే కనీసం సభ్యులకు ప్రయోజనం కలిగే స్థాయిలో రాజీకి రావాలని పేర్కొన్నారు. ఇలాంటి చర్చలు ఆరోగ్యకరంగా, సభ్యుల ప్రయోజనాలను దృష్టిలో పెట్టుకుని జరగాలంటే ఫెడరేషన్ అండ తప్పనిసరి అని రఘు మాస్టర్ అభిప్రాయపడ్డారు.
1997లో కార్డు తీసుకున్నప్పుడు నాకు ఉన్న భరోసా అదే
తాను 1997లో అసోసియేషన్ కార్డు తీసుకున్న సమయంలో సభ్యత్వం అంటే భద్రత అనే నమ్మకం ఉండేదని రఘు మాస్టర్ గుర్తు చేసుకున్నారు. అసోసియేషన్ వెనుక బలమైన వ్యవస్థ ఉంటేనే సభ్యులకు భద్రత ఉంటుందని చెప్పారు. ఎలాంటి రక్షణ, భరోసా లేని మెంబర్షిప్ను ఎవరూ తీసుకోవడానికి ఆసక్తి చూపరని అన్నారు. సభ్యులకు సమస్య వచ్చినప్పుడు అండగా నిలిచే వ్యవస్థ, అవసరమైతే వారి తరఫున పోరాడే నాయకత్వం ఉండాలని స్పష్టం చేశారు.
అడా కమిటీ ఏర్పాటు.. రీ-ఎలక్షన్స్కు సన్నాహాలు?
ప్రస్తుత పరిస్థితిని ఆరోగ్యకరంగా పరిష్కరించేందుకు తాత్కాలికంగా ఒక కమిటీ ఏర్పాటు చేయాల్సిన అవసరం ఉందని రఘు మాస్టర్ సూచించారు. సభ్యులందరి అభిప్రాయాలను సేకరించి, ఫెడరేషన్ గుర్తింపు కోసం సంతకాలు తీసుకుని పెద్దలకు అందించాలని చెప్పారు. అసోసియేషన్ను సరైన పద్ధతిలో ఫార్మ్ చేసుకుని అధికారిక గుర్తింపు దిశగా ముందుకు సాగిన తర్వాత అవసరమైతే రీ-ఎలక్షన్స్ నిర్వహించుకోవచ్చని పేర్కొన్నారు. మంచి చేయగల వ్యక్తి ఎవరైనా ఎన్నికల్లో నిలబడవచ్చని, వ్యక్తిగత విభేదాలకు చోటు లేకుండా అందరూ కలిసి పనిచేయాలని పిలుపునిచ్చారు.
35 ఏళ్లలో తొలిసారి.. 24 క్రాఫ్ట్స్లో డాన్సర్స్కు షాక్
డాన్సర్స్ అసోసియేషన్కు సంబంధించిన అత్యంత కీలక అంశాన్ని కూడా రఘు మాస్టర్ ప్రస్తావించారు. సుమారు 35 ఏళ్ల చరిత్రలో తొలిసారి అసోసియేషన్కు గుర్తింపు లేకపోవడం వంటి పరిస్థితి ఏర్పడిందని ఆయన ఆవేదన వ్యక్తం చేశారు. 24 క్రాఫ్ట్స్లో ఒక క్రాఫ్ట్ను పక్కన పెట్టి 23 క్రాఫ్ట్స్గా మారడం ఇదే తొలిసారని అన్నారు. ఇది కేవలం కొంతమంది వ్యక్తుల సమస్య కాదని, డాన్సర్స్ కమ్యూనిటీ మొత్తం ఎదుర్కొంటున్న సమస్య అని స్పష్టం చేశారు. అసోసియేషన్ సమావేశానికి రాలేని సభ్యులకు కూడా ఇక్కడ జరిగిన విషయాలను వివరించాలని, ప్రతి అంశంపై సభ్యులు చైతన్యంతో స్పందించాలని సూచించారు.
వారంలోపు కీలక సమావేశం.. సభ్యులకు రఘు మాస్టర్ పిలుపు
ఫెడరేషన్ గుర్తింపు కోసం సభ్యులు స్వచ్ఛందంగా సంతకాలు చేయాలని రఘు మాస్టర్ కోరారు. ఎవరిపైనా ఒత్తిడి లేకుండా, అసోసియేషన్ భవిష్యత్తును దృష్టిలో పెట్టుకుని నిర్ణయం తీసుకోవాలని అన్నారు. వారంలోపు అసోసియేషన్ ఫార్మేషన్కు సంబంధించిన అంశాలతో మరోసారి సమావేశం కావాలని నిర్ణయించినట్లు తెలిపారు. ఈ పోరాటంలో అందరికీ అండగా నిలవాల్సిన అవసరం ఉందని చెప్పారు. శేఖర్ మాస్టర్తో పాటు పలువురు సభ్యులు ఈ సమావేశానికి రాకపోవడాన్ని కూడా ప్రస్తావించిన రఘు మాస్టర్.. వ్యక్తిగత విభేదాలను పక్కన పెట్టి అందరూ కలిసి అసోసియేషన్ బలోపేతానికి పని చేయాలని పిలుపునిచ్చారు.
ప్రస్తుతం డాన్సర్స్ అసోసియేషన్లో జరుగుతున్న పరిణామాలను చూస్తుంటే రాబోయే రోజుల్లో మరిన్ని కీలక నిర్ణయాలు తీసుకునే అవకాశం కనిపిస్తోంది. రఘు మాస్టర్ను టెంపరరీ ప్రెసిడెంట్గా ఎన్నుకున్న తర్వాత ఫెడరేషన్ గుర్తింపు, తాత్కాలిక కమిటీ ఏర్పాటు, సభ్యుల సంతకాల సేకరణ, రీ-ఎలక్షన్స్ వంటి అంశాలు ఇప్పుడు అసోసియేషన్ భవిష్యత్తును నిర్ణయించే కీలక అంశాలుగా మారాయి.
Read also: Tollywood Dancers Row: జానీ–శేఖర్ మాస్టర్ల మధ్య రగడేంటి?.. అసోసియేషన్లో అసలు ఏం జరుగుతోంది?
Viral Dance Row: వార్ మెమోరియల్ వద్ద డ్యాన్స్.. భారత సంతతి వ్యక్తిపై అమెరికాలో చర్యలు?
Tollywood Child Artists: చిన్నారుల క్రేజ్ మామూలుగా లేదుగా.. ఒక్క సినిమాకు లక్షల్లో రెమ్యునరేషన్! టాలీవుడ్లో హైపెయిడ్ చైల్డ్ ఆర్టిస్టులు వీరే
Tollywood Actress: నా నాన్నే నాకు దేవుడు.. భావోద్వేగంగా మాట్లాడిన నటి అభినయ.. దివ్యాంగ పిల్లల తల్లిదండ్రులకు ప్రత్యేక విజ్ఞప్తి