Hyderabad Tragedy: హైదరాబాద్ పీర్జాదిగూడలో విషాదకర ఘటన చోటుచేసుకుంది. ఆంధ్రప్రదేశ్లోని విజయనగరం జిల్లా దేవపల్లి గ్రామానికి చెందిన వక్కులగడ్డి ఈశ్వర్రావు, అరుణ దంపతుల కుమార్తె తేజస్విని (25) చెరువులో మృతిచెందింది. ఘటనపై మేడిపల్లి పోలీసులు కేసు నమోదు చేసి దర్యాప్తు చేస్తున్నారు. తేజస్విని గతంలో బెంగళూరులో సాఫ్ట్వేర్ ఇంజినీర్గా పనిచేసినట్లు కుటుంబ సభ్యులు తెలిపారు. ఉద్యోగంలో ఒత్తిడిని ఎదుర్కొన్న ఆమె సుమారు ఆరు నెలల క్రితం ఉద్యోగానికి రాజీనామా చేసినట్లు సమాచారం. కొంతకాలం విశాఖపట్నంలో ఉన్న అనంతరం రెండు నెలల క్రితం తల్లి అరుణతో కలిసి హైదరాబాద్కు వచ్చింది. ప్రస్తుతం వీరిద్దరూ పీర్జాదిగూడలోని శంకర్నగర్ కాలనీలో అద్దె ఇంట్లో నివసిస్తున్నారు.
అర్ధరాత్రి ఇంటి నుంచి వెళ్లిన తేజస్విని
పోలీసులు, కుటుంబ సభ్యులు వెల్లడించిన వివరాల ప్రకారం.. శుక్రవారం తల్లీకూతుళ్లు మరో అద్దె ఇంటి కోసం మియాపూర్ ప్రాంతంలో వెతికారు. అనంతరం సాయంత్రం తిరిగి ఇంటికి చేరుకుని నిద్రపోయారు. అర్ధరాత్రి సమయంలో తేజస్విని ఇంటి నుంచి బయటకు వెళ్లినట్లు సమీపంలోని సీసీటీవీ దృశ్యాల ద్వారా గుర్తించినట్లు పోలీసులు తెలిపారు. శనివారం ఉదయం నిద్రలేచిన తల్లి కుమార్తె కనిపించకపోవడంతో స్థానికుల సహాయంతో గాలించారు. చివరకు సమీపంలోని పీర్జాదిగూడ చెరువులో తేజస్విని మృతదేహం కనిపించింది. సమాచారం అందుకున్న పోలీసులు ఘటనా స్థలానికి చేరుకున్నారు. హైడ్రా, డీఆర్ఎఫ్ బృందాల సహాయంతో మృతదేహాన్ని బయటకు తీసి పోస్టుమార్టం కోసం గాంధీ ఆసుపత్రికి తరలించారు.
మానసిక సమస్యలపై తల్లి ఫిర్యాదు
తన కుమార్తె కొంతకాలంగా భయాలు, పీడకలల గురించి చెబుతుండేదని తల్లి పోలీసులకు ఇచ్చిన ఫిర్యాదులో పేర్కొన్నట్లు సమాచారం. ఆమె మానసికంగా ఇబ్బందులు ఎదుర్కొంటున్నట్లు కుటుంబ సభ్యులు తెలిపారని పోలీసులు చెప్పారు. అయితే తేజస్విని మృతికి కచ్చితమైన కారణం ఏమిటనేది పూర్తి దర్యాప్తు, పోస్టుమార్టం నివేదిక అనంతరమే వెల్లడయ్యే అవకాశం ఉంది. ఉద్యోగ ఒత్తిడి లేదా మానసిక సమస్యలే ఈ ఘటనకు ప్రత్యక్ష కారణమని ప్రస్తుత దశలో నిర్ధారించలేము. అన్ని కోణాల్లో విచారణ జరుపుతున్నట్లు పోలీసులు పేర్కొన్నారు.
మానసిక ఒత్తిడి, తీవ్రమైన నిరాశ లేదా ఆత్మహాని ఆలోచనలు ఎదురైతే ఒంటరిగా ఉండకుండా కుటుంబ సభ్యులు లేదా నమ్మకమైన వ్యక్తులతో మాట్లాడాలి. కేంద్ర ఆరోగ్య మంత్రిత్వశాఖకు చెందిన Tele-MANAS మానసిక ఆరోగ్య సహాయం కోసం 14416 లేదా 1800-89-14416 నంబర్లను సంప్రదించవచ్చు. Tele-MANAS అధికారిక సమాచారం
Read also: Hyderabad Crime: కంటైనర్ క్యాబిన్ చూస్తే షాక్ అవ్వాల్సిందే.. సీక్రెట్ గా ఎలా ప్లాన్ చేశారంటే..
Tenali Crime: తెనాలిలో దారుణం.. భార్యను కత్తితో నరికి చంపిన భర్త.. హత్యకు ముందు వీడియో కాల్లో చెప్పిన మాటలు నిజమయ్యాయి
Chittoor Crime: చిత్తూరులో దారుణం.. గుడికి తీసుకెళ్లి భర్తను హత్య చేసిన భార్య.. ప్రియుడితో కలిసి మాస్టర్ ప్లాన్!